داواکاریى … نەوزاد بەندى

خودایە ..

منداڵمکەرەوە ،

ئەمەوێ داواى لێبوردن لەو چۆلەکانە بکەم ،

کە زامدارم کردن ..

ئەمەوێ ئەو دارلاستیکانە بپچڕێنم …

ئەو قۆچەقانیانە ، بسووتێنم ،

کە فێرى بەرد هاویشتنیان کردم ..

ئەمەوێ داواى لێبوردن لە بەرد بکەم ،

کە لە خەوم هەڵئەستاند و

ئەمگرتە سەر سنگى ڕیشۆڵە غەریبەکان ..

ئەمەوێ داواى لێبوردن لە پەنجەرەکانى مەکتەب بکەم ،

کە لە داخى مامۆستایەکى دار بە دەست ،

ئەمانکردن بە خۆڵ ..

خودایە منداڵمکەرەوە ..

ئەمەوێ داواى لێبوردن لەو زەردەواڵانە بکەم،

کە ئەمکوشتن بۆ ئەوەى لە بەهەشتا ،

خورمایەکم دەستکەوێ ..

ئەمەوێ داواى لێبوردن لەو درەختانە بکەم ،

کە گەڵا و ..

کە گوڵ و ..

کە بەر و

کە چڵ و ..

کە لقیان زامدار بوون بە دەستم ..

ئەمەوێ بگاتە کۆڵانى مناڵیم ،

شنەیەک ..

دێراوێ ..

لە دەریاى هەڵبەستم ..