قه‌ده‌غستان…..ناسر یه‌زدانی
((قه‌ده‌غستان))
من
کوڵۆ کوڵۆ ئه‌بارێم و
کانی کانی ئه‌ته‌قێم و
رووبار رووبار ئه‌چمه خاکا کورت ئه‌بمه‌وه
لاواز بوونم ته‌سبێحێکه سووڕم ئه‌ده‌ن ماسیه‌کانم
د
ا
ئ
ه
چ
و
ڕ
ێ
ن
تۆش
گه‌ڵا گه‌ڵا باڵا ئه‌که‌یت و
سه‌رپه‌نجه‌ی سه‌وزت سه‌رسنگی ئاسمان ئه‌خورێنێ و
قاچی ڕوتیشت له رووبارێکا ئه‌شۆی
که ئێستا له‌به‌ر ده‌س کورتی
ته‌نیا چاوی تاسه ئه‌برێته تۆ و
به هه‌زار هه‌ناسه‌ش هه‌نارێکی بۆ ناخورێ
ئه‌ویش
گلار گلار هه‌ناره‌کان ئه‌ته‌کێنێ
توند توند پێستی هه‌نار ئه‌گرێته له‌شی رووبار
هێور هێور
ته‌وره‌که‌شی تیژتر ئه‌کا
ته‌نانه‌ت من
نه‌م نووسیوه شعرێکیش که
نه‌م خوێندبێ
ته‌نانه‌ت تۆ
نه‌م نووسیوه شعرێکیش که
نه‌ت بیستبێ
ته‌نانه‌ت ئه‌و
نه‌م نووسیوه شعرێکیش که
نه‌ی دراندبێ
_ ئه‌مه شه‌که‌ت بوونی له‌شی رووبارێکه
وه‌ختێ هیوای به موعجیزه‌ی جازیبه‌ی زه‌وی نامێنێ و
ئاره‌ق ئه‌کا و ئه‌بێ به هه‌ڵم_
ئه‌مه بێ ده‌سه‌ڵاتی خاوه‌ن کانی یه
له شکۆی شه‌وه زه‌نگێکا تا ده‌س بوه‌شێنێ
له چی تارمایی گورگه و چی نه‌هێنی و
چی ته‌لیسمی نه‌کراوه‌یه
ته‌نانه‌ت تۆ
پێت نه‌داوم هه‌نارێکیش هه‌ڵیمژم …
ته‌نانه‌ت ئه‌و…
پێت نه‌داوم هه‌نارێکیش
کاڵ کاڵ هه‌ڵی نه‌مژی بێ
ئه‌مه سێ و دووی نیگای نه‌مامێکه
وه‌ختێ به ده‌م بای ریشه‌وه ئه‌شنێته‌وه‌و
له زریانی ده‌ور و پشتا
بیر له هێلانه چۆله‌که ئه‌کاته‌وه
ته‌نانه‌ت ئه‌و
چاو ئه‌برێته من ئه‌شڵه‌ژێ
ئه‌شڵه‌ژێ و تووڕه ئه‌بێ
تووڕه ئه‌بێ و پا و پلی ته‌وره‌که‌ی ئه‌شوا
ئه‌مه چاو بڕکێی هه‌ره‌س هێنانی کێوێکه له دوو که‌و
ده‌نووک سوورباو تر له هه‌نار
وه‌ختێ له قه‌ده‌غستانی هه‌نارا
من شێت ئه‌بم
تۆ وشک ئه‌بی
ئه‌و ئه‌نووسێ
….ئام رووباره
به‌رد له سه‌ر به‌رد
به‌رد له سه‌ر به‌رد
بخنکێنن
1379 هه تاوی
ناسر یه‌زدانی
دیوانده‌ره
