ده‌رباره‌ی من و خۆمه‌که‌ی حه‌مه‌ی کاکه‌ڕه‌ش
ده‌رباره‌ی من و خۆمه‌که‌ی حه‌مه‌ی کاکه‌ڕه‌ش
سه‌رنج: له‌م رۆژانه‌دا برای به‌ڕێز کاك حه‌مه‌ی کاکه‌ڕه‌ش شیعری ( من و خۆم ) ی بۆ ناردم و به‌لامه‌وه پڕه له وێنه‌ی جوان و بیری جوان و ورده‌کاری هونه‌ری . دوای خوێندنه‌وه‌ی ئه‌م کورته نامه‌یه‌م بۆ نارد که بریتیه له هه‌ستێکی تایبه‌تی خۆم و هیوادارم نه‌خرێته خانه‌ی خوێندنه‌وه‌یه‌کی ئه‌ده‌بی یا جۆرێك له جۆره‌کانی شیکردنه‌وه‌و لێکۆڵینه‌وه. وه‌ك وتم یه‌که‌مین هه‌ستی دوای خوێندنه‌وه‌ی شیعره‌که‌یه‌و وه‌ك ده‌ستخۆشی لێکردنێکی په‌له و بێپلان وایه‌و به چاکیشم زانی وێنه‌یه‌کی بۆ خوێنه‌رانی به‌ڕێزی ده‌نگه‌کان بنێرم.
سه‌لام محه‌مه‌د
برای به‌ڕێزم کاکه حه‌مه:
ئه‌م ده‌قه‌ی من و خۆم که بۆتان ناردووم و ده‌ستتان خۆشبێت ، ته‌نیا هه‌ر شیعر نییه و هه‌وڵدانێکی سه‌رکه‌وتووه بۆ دۆزینه‌وه‌ی شێوه‌یه‌کی تازه‌ی شیعرنووسین . رۆمان و کورته چیرۆك و فه‌لسه‌فه و زۆر شتیتری به بێ هیچ هه‌ناسه‌بڕکێیه‌ك به خۆیه‌وه گرتووه. ئاوازێکی نوێیه و ته‌نانه‌ت سه‌ماکه‌ی زۆربایشم تیادا به‌دیکرد. پڕه له تابلۆی هونه‌ری سه‌رنجڕاکێش که به ته‌نیا ته‌ماشاکردنێك شاره‌زای واتای ره‌نگه‌کان و مه‌تاهه‌ی رێگا به‌ناویه‌کداچووه‌کانی نابین.
نزیکبوونه‌وه‌یه‌‌کی هه‌ستپێکراوه له مه‌مله‌که‌تی پرسیاره ئه‌زه‌لیه‌کان. هه‌موو ئه‌مانه له قاڵبێکی ساده و ساکار و بێ موباله‌غه‌ی ئه‌وتۆدا که وه‌ك ماستاوه که‌لله‌ته‌زێنه‌که‌ی هاوینانی لای خۆمان به ئاسانی ده‌چێته خواره‌وه . ململانێیه‌کی دروست و سروشتییه له نێوان من و خۆمدا که وا تێده‌گه‌م ئه‌گه‌ر بوونه یه‌ك ئه‌وسا چاویان عه‌ینه‌کی ناوێت و به راده‌ی شه‌ش له سه‌ر شه‌ش ده‌ڕواننه نهێنیه ئاڵۆزه‌کانی بوون و نه‌بوون . هه‌ر ئه‌و جیاوازی و یه‌کنه‌گرتنه‌وه‌یه‌ی نێوان من و خۆمه که زیڕه‌ی له سه‌رجه‌می داهێنه‌ران هه‌ستاندووه و په‌ڕوباڵیانی داوه‌ته به‌ر ره‌شه‌با و زریانه به ته‌وژمه‌که‌ی بیرکردنه‌وه‌و لێکدانه‌وه و گه‌ڕان به شوێنی راستیه‌کاندا.
له‌م ره‌شبه‌ڵه‌که گه‌رمه‌ی هاواری وشه و ئاواز و تابلۆدا داهێنه‌ران ئاره‌قه‌ی شین و مۆریان لێده‌کێته‌وه و پرسیار و حه‌په‌سان و بێهووده‌یی خه‌ریته‌ی پڕ له نهێنی جۆراوجۆری له سه‌ر ته‌خته‌ی روخساریان هه‌ڵکۆڵیوه و ره‌شبه‌ڵه‌کیش تا دێت به تاوتر و گه‌رمتر ده‌بێت . بۆته حه‌لقه‌ی زیکری ده‌روێشه‌کانی وشه و حاڵ و جه‌زبه گرتوونی و که‌سیان نایانه‌وێ یا راستتر ناتوانن بۆ ساتێکی کورتیش ده‌ست به‌رده‌ن و له بازنه‌ی شاییه‌که که رێك له بازنه‌ی سووڕخواردنه‌وه‌ی هه‌میشه‌یی تابلۆی ( به‌نده‌کان ) ی ڤان کوخ ده‌چێت بێنه ده‌ره‌وه‌و پشووبده‌ن. وازیش له نووسین بهێنن تازه کار له کار ترازاوه و هه‌ر ئه‌و مێشکه‌یه تا مردن له ناوسه‌ردا ده‌مێنێته‌وه.
ره‌نگه ( من و خۆم ) کۆپله‌یه‌ك بێت له چامه‌یه‌کی درێژ که ( به ئاره‌زووی خۆت و بێ ئاره‌زووی تۆ ) له‌و به‌ره‌به‌یانه مه‌سته‌دا گوێت به ده‌نگی ئه‌وه‌ڵ سه‌حه‌ره‌ی سێوه زرنگابێته‌وه‌و و کورته سه‌ردانێکی هێلانه ئاسمانیه‌که‌ی خه‌ون و خه‌یاڵت کردبێت و به‌م نزیکانه بگه‌ڕێیته‌وه سه‌ری و به‌رده‌وامی پێبده‌یت، ره‌نگه وایش نه‌بێت و له زه‌مه‌نی شیعردا جیاوازیه‌کی ئه‌وتۆ له نێوان ده‌قیقه‌یه‌ك و ساڵێکدا نییه. ئه‌ی که راده‌ی گونجان و تێگه‌یشتنی( خۆم بۆ من) وابێت ئاخۆ ده‌بێ ئه‌و تێگه‌یشتنه بۆ یه‌کێکیتر چۆن چۆنی بێت . نازانم له گه‌ڵمای یا نا به‌ڵام پێموایه له توانای هیچ که‌سێکدا نییه له که‌سێکیتر تێبگات. ئه‌گه‌ر من و خۆمی مرۆڤ له زمانی یه‌کدی حاڵی بوونایه ئه‌وسا ده‌بوونه بنه‌مایه‌ك بۆ هه‌نگاوی دووه‌م و که‌سی دووه‌م و به‌ڕاستیش دونیایه‌کی سه‌یرو جه‌نجاڵه.
خۆزگه زووتر شیعره‌که‌تم ده‌خوێنده‌وه که به هۆی دابڕانێکی دوورو درێژه‌وه له جیهانی خوێندنه‌وه‌و نووسین زۆر به‌رهه‌می نایابم له کیسچووه . دڵنیام چه‌ند جارێکی تریش شیعره‌که‌تان ده‌خوێنمه‌وه و شایانی ئه‌وه‌یه له لایه‌ن که‌سانی شاره‌زاوه لێکۆڵینه‌وه‌ی راسته‌قینه‌ی له سه‌ر بنووسرێت . ئه‌وه‌ی که من لێره‌دا نووسیومه هه‌ندێ وشه‌ی راگوزارین و دیاره که دیاری شوانیش هه‌ر هه‌پڵۆکه.
براتان / سه‌لام محه‌مه‌د
سوید – 16 / 09 / 2008
