لەگەڵ خۆمدا چەند غەریبم

 لەگەڵ خۆمدا چەند غەریبم
 ئاوێزان نورى
 
 لەگەڵ سووتانى باڵى پەروانەیەكدا
 بە شەمعى ژوورەكەم
 من دەسوتێم
 لەگەڵ شكانى پەنجەرەى ماڵێكى چۆڵدا
 من دەشكێم
 لەگەڵ وشكبوونى گەڵایەك
 بەدارى مەینەتى پایزەوە
 هەڵدەوەرێم
 لەگەڵ هەناسەی ماندووى چۆلەكەیەكدا
 ماندوو دەبم
 لەگەڵ ئازارى گوڵێكى نێو باخچەكەم
 بە دڕكی قەدو باڵاى خۆیەوە
 ژان دەگرم
 لەگەڵ "با"دا سەما دەكەم
 لەگەڵ ئاوابوونى خۆردا
 ئاوا دەبم
 لەگەڵ ووتنەوەى تەراتیلەكانى كڵێسادا
 لەخاچ دەدرێم
 لەگەڵ بانگى موحەمەد
 پڕ دەبم لە گووناه
 لەگەڵ باراندا
 تەڕ دەبمو
 لەگەڵ غەریزەكانى پیاوێك
 ژنێتیم لىَ دەچۆڕىَ
 لەگەڵ رۆیشتنەكانى یار
 غەرقى فیراق دەبمو
 لەگەڵ خۆمدا
 تەنیایى رادەموسم
 مەراق تەق تەق
 لە دەرگاى بێئومێدیم دەداو
 رۆژانە دێت
 سورەتی تەنیاییم لەسەر دەخوێنىَو
 ئایەتەكانى نامۆییم بۆ شیتەڵ دەكاتەوە
 دەڵىَ: ئەو شەوەى تۆ تێیدا لە دایك بوویت
 ئەستێرەكان دەیانزریكاند لە حەژمەتى مانگ گیراندا
 بۆیە نە بەر تریفەى مانگ كەوتىو
 نە ئەستێرە ئاگاى لە دایكبوونت بوو
 تا لە كەژاوەى خۆیاندا بتخەوێنن
 ئەو وەرزەى تۆ تێیدا لە دایك بوویت
 گوڵەكان دەگریان بۆ نەهاتنى باران
 بۆیە بىَ خەبەر بوون لە تۆو
 هەندىَ لە بۆنو جوانى خۆیان پێوە نەكردى
 ئەو كاتەى تۆ تێیدا لە دایك بوویت
 كاتژمێرى ژیان لە چركە چرك كەوتبوو
 بۆیە هەرگیز نەچوویتە لیستى بوونەوە
 ئاى لە خۆم
 ئەو شەوە بوو زەمەن
 قامكەكانمى لەسەر وەتەرى بێدەنگى داناو
 ئاوازە نامۆییەكانى خۆى فێر كردم
 گەرووى پڕ كردم لە نۆتەى  خنكاوو
 گۆرانیە شكاوەكەى خۆی پىَ وتمەوە
 ئاى خودا
 وەك قەرەجێك
 نێو لەپى زەمەنم خوێندەوە
 هێماى ژیانم كورتو
 هێڵى بەختیاریم دیار نەبوو
 بە كوچەكانى عەدەمدا تێپەڕیمو
 بەسەر باڵى بوراقێكى ئەندێشە
 روو لە ئاسمانێكى نادیار هەڵكشام
 هەر ئەوەندەم پىَ كراو
 هەر وەكو ئێستاش غەریب بووم لەگەڵ خۆمدا
 لەگەڵ تارمایى خەمێكى بىَ كۆتادا دەژیمو
 لەگەڵ تەواوبوونى ئەم شیعرەش دەمرم
 
 مانگى 6ى 2008
 Awezan_n@yahoo.com