Skip to Content

Thursday, May 23rd, 2024
بۆ گوڵێك كه‌ له‌ هه‌موو گوڵه‌كان به‌ڕه‌نگترودره‌وشاوه‌تره‌..(دایكم)

بۆ گوڵێك كه‌ له‌ هه‌موو گوڵه‌كان به‌ڕه‌نگترودره‌وشاوه‌تره‌..(دایكم)

Closed
by October 18, 2008 ئەدەب

 
              بۆ گوڵێك كه‌ له‌ هه‌موو گوڵه‌كان به‌ڕه‌نگترودره‌وشاوه‌تره‌..(دایكم)
 
 
 
 -ق-
          
 هاوڕێكانم بۆ (دایكم) بخوێننه‌وه‌
 ئه‌م سه‌مایه‌ ،ئه‌م گریانه‌، ئه‌م ئایه‌ته‌
 من ڕووم نایه‌ت فریشته‌ بدوێنم
 من ناتوانم له‌خودا بپرسم
 چۆن خوداى گه‌ورۆنه‌ى سه‌رده‌مى منداڵیم
 پرسیارى لێده‌كرێت ،
 ئایه‌تى بۆ ده‌خوێندرێته‌وه!‌
 من سه‌ر له ‌كارى خودا ده‌رناكه‌م !
 هه‌ر ئه‌وه‌نده‌ ده‌بێژم :
 بۆى بخویێننه‌وه‌ ئه‌م گریانه‌م..ئه‌م ئایه‌ته‌م..
 
  -و-
 
 دونیاى خڕى وه‌ك سێو
 له‌ من ده‌ست پێ ده‌كات
 من له‌ (دا یكم)
 ئه‌و لـه‌ گوڵ و
 ئه‌و له‌ دایكم و من له‌ ئه‌و بووین
 له‌كۆتاجار ئه‌من ده‌مرم و
 (دایكم) و گوڵیشم هه‌ر ده‌‌مێنن.
 
 
 
 
 
 
 
 -ر-
 
 هه‌رده‌م هه‌ست به ‌گوڵى (دایكم) ده‌كه‌م
 ئه‌و له ‌سپێده‌یه‌كى زیوینى ده‌ژیت
 ئه‌و سه‌یرى گوڵى من ده‌كا و
 له‌ پێشیشا بۆم ده‌دوێـنێت
 ئاخر من ئه‌و ده‌ناسمه‌وه‌ و
 له‌ جوانترین باخدا ئه‌بینم
 باخێك ئێستا له‌سه‌ر ڕووى
 كڵۆ سێوه‌كانى
 ماچى گوڵه‌كه‌ى منى له‌سه‌ر جێماوه‌!
 
 
  -ب-
 
 كه‌ گوڵ له‌به‌یانییه‌كى به‌هاردا
 سه‌ما ده‌كا ئه‌و خه‌و ده‌یباته‌وه‌
 هاڵاوى ئه‌و به‌سه‌ر پێده‌شتا ده‌ڕوا و
 ئه‌وبه‌ سه‌ماى گوڵه‌كان ده‌له‌رێته‌وه‌
 ئێستا ده‌زانم
 ئه‌و هاوڕێى پێده‌شت وگوڵه‌كانه‌ (دایكم).
 
 
  -ا-
 
 گۆرانیه‌كانى كه‌ (دایكم) ده‌یچڕێ
 ئاوازى له‌ شه‌ماڵه ‌و گوتنى هى بولبوله‌
 ئه‌و هۆنراوه‌ى ئه‌و دایده‌نێ
 پڕه‌ له ‌فڕین و حه‌زین و رۆچوون و مه‌ستى
 ئاوازه‌ خۆشنووده‌كانى ئه‌و تفه‌ له ‌جه‌للاد…
 ئاى ناشرین ترین بوونه‌وه‌ر له‌ لاى (دایكم)
 جه‌لاد……جه‌لاد…….جه‌لاد……جه‌لاد…
 
 
   -ن-
 
 (دایكم) ژنێكه‌ له‌ نورى شه‌و و
 تریفه‌ى مانگ و تیشكى ئه‌ستێره‌
 جه‌سته‌ى قه‌ڵاییه‌كى به‌رز و پرشه‌نگداره‌
 ئه‌وانه‌ى بۆ ژیانی ئه‌و جه‌للادیشن
 نزمه‌ پردى ڕووخاو و توله‌ى شه‌ون
 جه‌لاد لاى ئه‌و مه‌ستێكه‌
 لێ بێ خه‌ون!
 
 
  -ت- 
 
 (دایكم) دواى هه‌موو نوێژه‌كانى
 جه‌للاده‌كان به‌ نه‌فره‌تى خودا ده‌كا
 ئه‌و جه‌لادانه‌ى خوێنى ئازیزترین و
 پاكترین كه‌سى ئه‌ویان خوارد
 ئه‌و جه‌لادانه‌ى له‌ ده‌ره‌وه‌ى شاردا
 پاكترین فریشته‌یان كوشت و
 تیشكه‌كانی خۆریان كوژانده‌وه‌!
 
 
 -ب-
 
 ئه‌و باوكه‌ى جه‌للاده‌كان كوشتیان
 قه‌تاره‌كه‌ى بۆ (دایكم ) به‌جێماوه‌ و
 ئه‌وقه‌تاره‌ى میهره‌بانترین كه‌سیان
 له‌سه‌ر پشتى هه‌وره‌كان هه‌ڵگرتووه‌
 كه‌چى ئه‌و قه‌تاره‌یه‌ بێ زه‌ناییه‌
 ئه‌و قه‌تاره‌ییه‌ بێ سه‌رنشینه‌ بێ سه‌ر…..
 
 
 
 
 
  -م –
 
 (دایكم)وفرمێسك دوو هاوڕێن
 من له‌ مێژووى دێرینى
 هاوڕێیه‌تیان تێناگه‌م
 ئه‌و دووانه‌ هێنده‌ به‌یه‌كه‌ون
 هه‌ردووكیان یه‌ك ڕه‌نگیان گرتووه‌ و
 یه‌ك جلیش ده‌پۆشن 
 ئه‌ویش ڕه‌نگێكى زیوینى خه‌مناكه‌ و
 ئه‌و له‌كڵۆییه‌ك به‌فرى سه‌ر لووتكه‌ و
 دڵۆپه‌ئاونگێكى سه‌ر گوڵێك پاكتره و‌
 دڵى ئه‌و له‌هى فریشته‌ بێگه‌رد تره‌
 ئه‌وه‌ى پاكترین بوونه‌وه‌ره‌ له‌لام (دایكم).                   
 
    ئازارى 2007
 
         
 
                                                                  
 
 *پێشكه‌ش به‌(دایكم)،له‌یادى سێزده‌ ساڵوه‌گه‌ڕى شه‌هیدبوونى (باوكم)دا.
 *ئه‌و دایكه‌ى پێنج منداڵى به‌ته‌نیا و، له‌سه‌خترین كاتدا گه‌وره‌كرد و، بێ ئه‌وه‌ى ماناى شه‌كه‌ت بوونیش بزانێت.
  *له‌پاشكۆى ئه‌ده‌ب وهونه‌رى ڕۆژنامه‌ى (كوردستانى نوێ)دا بڵاوكراوه‌ته‌وه.‌
 
 
 
 
 
                            
 
 

Previous
Next
This site is registered on wpml.org as a development site.