کاکه ئارام ئه‌حمه‌د ناحه‌قیه ته‌ڕ و ووشک پێکه‌وه بسوتێنی
کاکه ئارام ئه‌حمه‌د ناحه‌قیه ته‌ڕ و ووشک پێکه‌وه بسوتێنی
وه‌ڵامێک بۆ کاک ئارام ئه‌حمه‌د
نوسینی: دلێر محمد عه‌لی
سه‌ره‌تا هیوادارم ماڵپه‌ڕی کوردستانپۆست (STOP)ه‌که‌ی لابردبێت له‌سه‌رمان و ئه‌م وه‌ڵامه بڵاوبکاته‌وه
کاک ئارام ئه‌حمه‌د له نوسینێکدا به‌ناوی (ژاوه‌ژاو و ئاژاوه‌کانی ناو هه‌ردو چاک) که له ماڵه‌په‌ڕی کوردستانپۆستدا بڵاوی کردوه‌ته‌وه، هه‌ست و تێڕوانینی خۆی سه‌باره‌ت به ناوه‌ندی چاک و و گروپی چاک.بی به هه‌ندێ ناحه‌قیه‌وه ده‌رده‌بڕێت. وێڕای ڕێزگرتن له بۆچونه‌که‌ی به‌ڵام به‌داخه‌وه قوربانی و تاوانباری خستوه‌ته هه‌مان تای ته‌رازوه‌وه.
گه‌ر کاک ئارام وه‌ک ئه‌ندامی چاک.بی ( ئێستا یان پێشوو) و ده‌سته‌ی کوردستانپۆست تۆزێک وردبینانه سه‌یری هه‌نگاوه‌کانی پێش جیابونه‌وه و دوای جیابونه‌وه‌ی بکردایه له‌و باوه‌ڕه‌دام ئه‌م نامه‌شی به‌شێوه‌یه‌کی دیکه ده‌نوسی و ئیحتیماله به شێوه‌یه‌ک له شێوه‌کان له‌سه‌ر کۆمه‌ڵێک به‌ڵگه‌ی حاشا هه‌ڵنه‌گر به‌شێکی زۆری له ڕۆشنبیرانی کورد ئاگادار ده‌کرده‌وه له ڕاستیه‌کان. به‌ڵام کاک ئارام و هه‌موو ستافی کوردستانپۆست و چه‌ند ماڵپه‌ڕێکی دیه‌که‌ی کوردی ده‌رگایان خسته سه‌ر پشت بۆ هه‌موو جۆره سوکایه‌تیپێکردنێک به ناوه‌ندی چاک و ته‌نانه‌ت ئاماده نه‌بوون گوێ له ڕاستیه‌کانیش بگرن یان ڕێگه بده‌ن به‌رگری له‌و ناحه‌قیانه‌ش بڵاوبکرێته‌وه لایان، ئه‌مه بێجگه له‌وه‌ی که ته‌نانه‌ت چالاکیه‌کانی ناوه‌ندی چاکیشیان بڵاو نه‌ده‌کرده‌وه.
ڕاستیه‌ک هه‌یه له‌وه ده‌چێت هه‌تاوه‌کو ئێستاش نه به‌رێزی کاک ئارام و کۆمه‌ڵێک خه‌ڵکی تر ئاماده بن گوێی لێبگرن، ئه‌ویش ئه‌وه‌یه که ئه‌ندامانی ناوه‌ندی چاک وه‌ک لێکۆڵه‌وه‌ر و به 3 لێکۆڵینه‌وه‌ی جیاواز به‌شداریان له کۆنگره‌ی هه‌ولێردا کرد، و وه‌ک هه‌موو لێکۆڵینه‌وه‌کانی دیکه له‌لایه‌ن لیژنه‌یه‌کی لێهاتوه‌وه هه‌ڵسه‌نگێنرا و ئه‌گه‌ر په‌سه‌ند نه‌کرایه نه‌ده‌خرانه ناو به‌رنامه‌ی کۆنگره‌وه، ناوه‌ندی چاک ته‌نانه‌ت وتاری نه‌بووه له کۆنگره‌دا، ئێمه له‌وێ و له‌به‌رده‌م میدیا و چاوپێکه‌وتنه‌کانیشدا ڕه‌خنه و بۆچونی خۆمان هه‌بووه، ته‌نانه‌ت یه‌کێک له‌ئه‌ندامانی چاک.بیش ئاماده‌بوو تێیدا. من پێم وایه، پێویسته کورد له هه‌موو بۆنه‌یه‌کی پابه‌ند به مافی گه‌لان و باسی جینۆسایدا، له‌هه‌رکوێی جیهاندا بێت ده‌نگی هه‌بێت، له‌به‌ر ئه‌وه‌ی ئێمه مافخوراوین. ئه‌گه‌ر کاک ئارام پێی وابێت هه‌رکه‌سێک به‌شداری له‌و کۆنگره‌دا کردبێت، چوه‌ته باخه‌ڵی ده‌سه‌ڵاته‌وه، زۆر هه‌ڵه‌یه، خۆ ده‌یان ڕۆشنبیر و لێکۆڵه‌ری بیانیشی تێدابوو ئایا ئه‌وانیش به‌هه‌مان شێوه چونه باخه‌ڵی ده‌سه‌ڵاته‌وه؟ به‌ڵام له‌به‌ر ئه‌وه‌ی گروپی چاک.بی له قۆناغی خۆگرتنه‌وه‌دابوون و ئامانجی سه‌ره‌کیان به‌هه‌ر نرخێک بوبێت ئه‌ندامگیری و لێدانی ناوه‌ندی چاک بوو ، هه‌روه‌ها له‌به‌ر ئه‌وه‌ی که‌س و لایه‌نی ئه‌نتی ده‌سه‌ڵاتی کوردستان و به‌تایبه‌ت ئه‌نتی (ینک ، پدک) زۆرن له‌لایه‌ک و له‌به‌ر نه‌بوونی توانای به‌شداریبوونی پسپۆڕی له‌و کۆنگره‌دا له‌لایه‌کی تره‌وه ، باشترین و سیاسیترین هه‌ڵوێست ئه‌و هه‌ڵا هه‌ڵایه بوو که هه‌موتان ئاگادار و به‌شداربوون تێیدا، به مه‌رجێک پێش جیابونه‌وه یه‌کێک له کێشه هه‌ره سه‌ره‌کییه‌کانی ناو ناوه‌ندی چاک، پابه‌ندبوون و پاره و یارمه‌تی وه‌رگرتن له‌م حیزب و ئه‌و حیزب بوو له پشت ده‌سته‌ی به‌رێوه‌به‌ره‌وه و موئامه‌ره‌کردن له‌و که‌سانه‌ی ده‌یانه‌ویست ڕێچکه‌ی بێلایه‌نی ناوه‌ندی چاک بپارێزن.
من به‌ش به حاڵی خۆم یه‌کێک بووم له‌و که‌سانه‌ی به‌شداریم کرد له‌و کۆنگره‌دا و به لێکۆڵینه‌وه‌یه‌ک له‌سه‌ر (به‌راوردکردن له نێوان سیستمی حوکمڕانی له ئه‌ڵمانیای نازی له کاتی هۆڵۆکۆست و عێراقی به‌عسی له کاتی ئه‌نفالدا) که ئێوه ئاماده نه‌بوون بڵاوی بکه‌نه‌وه.
کاک ئارام باس له‌و نامانه‌ی له‌گه‌ڵ گریگۆری ستانتۆندا ئاڵوگۆر کراون و ته‌نها پشت به یه‌ک وه‌ڵامی ناوه‌ندی چاک به‌ستووه که به هه‌ڵه‌ی ئه‌نقه‌ست وه‌رگێڕدراوه بۆ ده‌ربازکردنی تاوانبار و توانبارکردنی قوربانی، هه‌ڵبه‌ته وه‌رگێڕی نامه‌که ئاماده نه‌بووه ناوی خۆی بخاته سه‌ر له‌به‌ر ئه‌وه‌ی ده‌زانێت هه‌ڵه‌کان ده‌رده‌که‌ون و توانای به‌رگریکردنی نامێنێت، به‌س ئایا که‌س پرسی کرد، بۆ ئه‌م نامه نوسراوه و له‌سه‌ر چ ڕۆشناییه‌ک نوسراوه، ئایا ئه‌م نامه تۆمه‌ته یان رونکردنه‌وه‌یه، پرسیار ده‌که‌م ئایا ئه‌گه‌ر کاک ئارام ئه‌حمه‌د یان هه‌ر که‌سێکی دیکه تۆمه‌تبار بکرێت به تیرۆریست و پاڵپشتی تیرۆر چی ده‌کات، ئایا ئه‌گه‌ر ئارام ئه‌حمه‌د یان هه‌ر که‌سێکی دیکه درۆی به‌ده‌مه‌وه هه‌ڵبه‌سرێت و له ڕێی ڕیایی و هه‌ڵسوکه‌وتی بازاڕیه‌وه بیانه‌وێت خه‌ڵکی پێ چه‌واشه بکه‌ن و سوکایه‌تی پێبکه‌ن چی ده‌کات؟ ئه‌گه‌ر که‌سانێک به‌ڕواڵه‌ت خۆیان به پاڵپشت و ئه‌ندامی حیزبێک بزانن و له‌ژێره‌وه نه‌فره‌تی لێبکه‌ن بۆ نزیکبونه‌وه له کابرایه‌کی بیانی و قبوڵیکردنی به‌تیرۆریست ناوزه‌نگکردنیان بن و تاوانه‌که بخه‌نه پاڵ تۆ چیده‌که‌یت؟؟ و زۆر شتی تر کاکه ئارام، هه‌ڵبه‌ته ناوه‌ندی چاک ده‌قی هه‌موو ئه‌و ئیمایلانه‌ی گریگۆری بڵاوده‌کاته‌وه له‌گه‌ڵ وه‌رگێڕانی به‌کوردیشه‌‌وه، له‌و کاته‌دا ڕاستیه‌کان بۆ هه‌موو که‌س ده‌رده‌که‌وێت و با ویژدان دادوه‌ر بێت.
کاک ئارام ناحه‌قییه‌کی دیکه ده‌کات که ناوه‌ندی چاک به ناوی ( چاکی ئه‌میر و دلێر) ده‌بات، له‌به‌ر ئه‌وه‌ی له هیج کاتێکدا و له هیچ هه‌نگاوێکدا ئه‌و دوو که‌سه که خۆم یه‌کێکیانم خاوه‌ن بڕیار نه‌بوین و له زۆر جاریشدا له ده‌نگداندا که‌مینه‌مان هێناوه به‌ڵام ئه‌رک و به‌رپرسیارێتی هه‌موو هه‌نگاوه‌کانیش وه‌ک باقی ئه‌ندامانمان گرتۆته ئه‌ستۆ له‌به‌ر ئه‌وه‌ی ناوه‌ندی چاک ڕێکخراوه، پێده‌چێ چاک.بی وابێت ئه‌وه کاری خۆیانه و په‌یوه‌ندی به‌منه‌وه نیه، به‌س له‌کاتێکدا که جیانبونه‌وه نه‌بوو ده‌بوایه ده‌سته‌ی به‌ڕێوه‌به‌ر و هه‌موو ناوه‌ند به ئاوازی 1-2 که‌سی دیاریکراو بجوڵایه‌ته‌وه بێگوێدان به ڕا و بۆچونی هه‌موو یان زۆه‌ینه‌ی ده‌سته‌ی به‌رێوه‌به‌ر، که ئه‌وه‌ش یه‌کێک بوو له هۆکاره گرنگه‌کانی جیابونه‌وه‌یان له باقی ده‌سته‌ی به‌ڕێوه‌به‌ر و ئێستا پێویسته باجه‌که‌ی بدرێت.
ناحه‌قیه‌کی دیکه‌ی کاک ئارام و زۆر که‌سی دیکه‌ش له ناوه‌ندی چاکی ده‌که‌ن له‌وه‌دایه که ده‌ڵێن لایه‌نگری ده‌سه‌ڵاتی کوردی یان حیزبی سیاسی ده‌سه‌ڵاتداره، به‌بێ ئه‌وه‌ی هیچ به‌ڵگه‌یه‌ک هه‌بێت، ئێمه نه‌بودجه‌مان هه‌بووه ونیشمانه له‌لایه‌ن ئه‌و ده‌سه‌ڵاته‌وه، نه یارمه‌تی دارایی یان ڕێکخراوه‌ییمان هه‌یه له‌لایه‌ن هیج حیزبێکه‌وه، نه ئه‌ندامی حیزبیشمان هه‌یه له ناوه‌ندی بڕیاردا، نه به‌یانێک یان هه‌نگاوێکمان ناوه له‌به‌رژه‌وه‌ندی حیزبێک یان لایه‌نێکی دیاریکراو بێت، به‌ڵام گروپی چاک.بی یارمه‌تی دارایی، پاڵپشتیکردنی حیزبی ، موئامه‌ره‌کردن له ئێمه، کاری دزێوی ژێربه‌ژێر بۆ به‌رژه‌وه‌ندی تایبه‌ت و هه‌ره‌شه‌کردن له ئه‌ندامان، به‌شێکی دیاره له کرده‌وه‌کانیان. له چاک.بی دا ئه‌ندامی سه‌رکردایه‌تی و پله به‌رزی حیزبی چه‌ند حیزبێکی تێدا کار ده‌کات، پرسیارێک له کاک ئارام ده‌که‌م ئایا پێی وایه ڕێکخراوێکی مه‌ده‌نی به‌و جۆره ئه‌ندامانه، ئه‌توانێت سه‌ربه‌خۆیی خۆی بپارێزێت؟ یان ده‌بێته بنکه‌ی ململانێی سیاسی که دوره له ئامانجه ده‌ربڕاوه‌کانی ڕێکخراوێکی مه‌ده‌نی؟ ئایا ڕێکخراوی دژ به جینۆساید چ کارێکی هه‌یه به ئه‌جنده‌ی سیاسی و حیزبی و ململانێی ده‌سه‌ڵاته‌وه؟
ناوه‌ندی چاک بۆ به‌رگریکردن له مافی بوون و پاراستنی شه‌خسیه‌ت و به ئاسوده‌ژیانی میلله‌تێک دامه‌زرا، بۆ نوسینه‌وه‌ی مێژوویه‌کی پڕ له ئازار و نه‌هامه‌تی و تاوانی جۆربه‌جۆر له‌به‌رچاوی کۆمه‌ڵگه‌ی نێوه‌ده‌وڵه‌تی بێشه‌رمدا دامه‌زرا، بۆ به‌کارهێنانی ئه‌و یاسا و ڕێککه‌وتننامه نێوه‌ده‌وڵه‌تیانه‌ی له‌سه‌ر مافی مرۆڤ و گه‌لان واژۆکراون بۆ وه‌دیهێنانی مافی ژیانێکی سه‌ربه‌خۆ بۆ گه‌وره‌ترین گه‌لی ژێرده‌سته‌ی ئه‌م سه‌رده‌مه دامه‌زرا، بۆ ملکه‌چکردنی ئه‌و کۆمه‌ڵگا نێوده‌وڵه‌تیه پڕله‌شه‌رمه‌زاریه بۆ داننان به مافه‌کانی گه‌له‌که‌مان دامه‌زرا ، بۆ پرکردنه‌وه‌ی ئه‌و که‌لێنه‌ی که حیزبه کوردستانیه‌کان له‌به‌ر ململانێی ده‌سه‌ڵات و گیرفان پڕکردن نه‌یانده‌‌په‌رژایه سه‌ر گرنگترین و به‌هێزترین دۆزی نیشتمانی، دامه‌زرا. نه‌ک بۆ ململانێی حیزبی و ده‌سه‌ڵاتگرتن، یان به‌کارهێنانی بۆ گه‌یشتن به پێگه‌یه‌کی شه‌خسی، ئێمه بڕیارمان دابوو سه‌ربازی وونبوو بین، دڵنیابه من و ئه‌ندامانی دیکه‌ی ناوه‌ندی چاک هه‌روا ده‌مێنینه‌وه.
ناوه‌ندی چاک و ئه‌ندامانی له ماوه‌ی پتر له ساڵێکه دوچاری شه‌ڕێکی قێزه‌ون و هێرشی دڕندانه‌ی دور له هه‌موو پێوه‌رێکی ڕێکخراوه‌یی و مرۆڤایه‌تی بوه‌ته‌وه به ئامانجی به‌خۆڵه‌مێشکردنی سوکایه‌تیپێکردنی، و ڕیسواکردنی هه‌موو هه‌وڵێکی هه‌نووکه‌یی و ئاینده‌یی دڵسۆزانه له‌پێناو مافه‌کانی کورد وه‌ک مرۆڤ و وه‌ک نه‌ته‌وه، و دورخستنه‌ی دڵسۆز و خه‌مخۆران له‌و جۆره کارانه، که به‌داخه‌وه زۆر له ڕۆشنبیرانی وه‌ک کاک ئارام، به‌شدار یان شایه‌تی نیگه‌تیڤ بوون، هه‌ندێکیشیان به‌نزیان ده‌کرد به ئاگره‌که‌دا بۆ ئه‌وه‌ی خۆڵه‌مێشه‌که‌ی وردتر و سوکتربێت.
له کۆتاییدا ده‌ڵێم کاک ئارام ناحه‌قیت کرد و دادوه‌رێکی مافپارێزه‌ر نه‌بویت، کێشه‌کانی ناوه‌ندی چاک ته‌نها ئه‌ندامانی هه‌ردولا به‌رپرس نین تێیدا، ئێوه‌ی ڕۆشنبیر و حیزبه سیاسیه‌کانیش پرشی زۆرتان به‌رده‌که‌وێت.
