جه‌مال غه‌مبار به‌شداری دووه‌مین دیداری شیعری له ماڵبۆڕنی ئوسترالیا کرد
جه‌مال غه‌مبار به‌شداری دووه‌مین دیداری شیعری له ماڵبۆڕنی ئوسترالیا کرد
* ئێواره‌ی ڕۆژی شه‌ممه 06.12.2008 به ئاماده‌بوونی هه‌ر یه‌ک له باڵیۆزی عێراق له وڵاتی ئوسترالیا د. غانم ئه‌لشبلی و به‌رپرسی به‌شی فه‌رهه‌نگیی باڵیۆزخانه د. هیشام تۆفیق و ژماره‌یه‌ک له ئه‌ندامانی کۆمیونیتییه‌کانی کورد و عه‌ره‌ب و کلدانیی و ئاشورییانی دانیشتووی شاری ماڵبۆرن له ویلایه‌تی ڤیکتۆریا ی ئوسترالیا ، دووه‌مین دیداری شیعر له لایه‌ن مونته‌دای ئوسترالی – ئێراقی
(Forum (Australian Iraqi سازکرا.
سه‌ره‌تا جێگری سه‌رۆکی مونته‌دا د. خه‌یری ئه‌لسه‌عد دیداره‌که‌ی کرده‌وه و له وته‌یه‌کی کورتدا ئاماژه‌ی بۆ ئه‌وه کرد که ئه‌م مونته‌دایه ته‌رخانه بۆ ده‌نگ و ڕه‌نگه جیاوازه‌کان و هه‌ر یه‌ک ئازادانه هه‌ست و موعاناته‌کانی خۆی ده‌رئه‌بڕێت . پاشان ئاماده‌بوونی شاعیرانی سه‌ر به نه‌ته‌وه جیاوازه‌کانی بۆ ئه‌م دیداره‌ی دووه‌می شیعر به‌رز نرخاند و ئه‌وه‌شی وه‌بیر ئاماده‌بووان هێنایه‌وه که سه‌رکه‌وتنی یه‌که‌مین دیداری شیعر که له نۆڤه‌مبه‌ری 2007 سازکرا وای له مونته‌دای ئوسترالی -ئێراقی کرد که ئه‌م دیداری دووه‌مه سازبکات و بکرێته چالاکییه‌کی ساڵانه و له‌م وه‌رزه‌دا سازبکرێت .
ژماره‌یه‌ک شاعیری ناسراو به‌شداری دیداره‌که‌یان کرد ، له‌وانه هه‌ر یه‌ک له یه‌حیا ئه‌لسه‌ماوی و خالید ئه‌لحلی له ئێراق و جه‌مال غه‌مبار له کوردستان .
شاعیر جه‌مال غه‌مبار که بۆ دووه‌مین جاره بانگهێشتی ئه‌م دیداره ئه‌کرێت ، چه‌ند قه‌سیده‌یه‌کی به هه‌ردوو زمانی کوردی و عه‌ره‌بی خوێنده‌وه . یه‌کێک له قه‌سیده‌کانی که به ناونیشانی
( گۆرانییه‌کی شکاو وه‌ک دڵی من ) که له‌لایه‌ن نوسه‌ر و ڕۆژنامه‌وان سه‌ڵاح به‌رواری ته‌رجه‌مه‌ی زمانی عه‌ره‌بی کراوه ، به هه‌ردوو زمانی کوردی و عه‌ره‌بی خوێنده‌وه و هه‌ر له وێدا پێشکه‌شی شاعیری گه‌وره‌ی کۆچکردوو ( مه‌حمود ده‌روێش )ی کرد وه‌ک وه‌فایه‌ک بۆ قه‌سیده به‌ناوبانگه‌که‌ی ده‌روێش ( جگه له – بــا – کورد چیتر شک نابات ) که بۆ شاعیروڕۆماننوسی گه‌وره‌ی کورد ( سه‌لیم به‌ره‌کات ) ی نووسیوه و ساڵی 2005 له وڵاتی شام خوێندویه‌تییه‌وه . جه‌مال ئه‌وه‌شی ڕاگه‌یاند که ئه‌و قه‌سیده‌یه‌ی ده‌روێشی کردۆته کوردی و له‌گه‌ڵ ئه‌و هه‌ڤپه‌یڤینه درێژه‌ی که به‌ڕێز عه‌بده وازن له‌گه‌ڵ ده‌روێشی سازداوه له کتێبێکدا له ساڵی 2006 چاپ وبڵاوکردۆته‌وه .
له یه‌کێک له قه‌سیده‌کانیدا ، جه‌مال باسی له ئازاره‌کانی هه‌ڵه‌بجه و ئه‌نفال کرد و وه‌ک خه‌مێکی گه‌وره‌ی کوردانه و هاوزه‌مان ئینسانییانه‌ش وێنای کردبوو .
له کۆتایی دیداره‌که‌دا ، به‌ڕێز باڵیۆزی ئێراق له وته‌یه‌کی کورتدا وێڕای پیرۆزبایی گه‌رم ، پێزانینی خۆی بۆ ئه‌رک و ماندووبوونی ئه‌م پۆله شاعیره ده‌ربڕی و هیوای ئه‌وه‌ی خواست که له ساڵی ئایینده‌دا ئه‌م دیداره فراوانتر بکرێت و بواره ئه‌ده‌بیی و هونه‌رییه‌کانی تریش بگرێته‌وه .
دیداره‌که نزیکه‌ی سێ سه‌عات و نیوی خایاند و په‌یامنێرانی ڕادیۆی کوردی له ماڵبۆرن و ڕادیۆی ئێس . بی . ئێس ئاماده‌ی بوون و هه‌ر یه‌ک به جیا دیدارێکی ڕادیۆیی کورتیان له‌گه‌ڵ جه‌مال غه‌مباردا سازکرد .
