حیكمەت و مەنتق
حیكمەت و مەنتق
سمكۆ عەبدولكەریمئەگەر پیاو بیەوىَ مەنتق و حیكمەت بە یەكەوە گرىَ بدات ئەوە دەبىَ بۆ هەر كارێكى نامەنتقى حیكمەتێك بدۆزێتەوە ، ئەو مەنتقەى لە شوێنێكەوە بۆ شوێنێكى دیكە جیاوازى هەیەو حیكمەتەكەشى لە كەسێكەوە بۆ كەسێكى دیكە دەگۆڕىَ
ئیمزانەكردنى یاساى باری كەسێتى لە لایەن سەرۆكى هەرێمى كوردستانەوە كارێكى زۆر نا مەنتقى بوو ، نامەنتقى بەو مانایەى ناكرىَ یاسایەكى ئەوها گرنگ بچێتە بەردەستى سەرۆكى هەرێم نەیخوێندبێتەوە ، ئەگەر خوێندبێتیەوەش چۆن دەرفەتى ئەوەى نەبوە ئیمزاى بكات ، بۆیە پێم وایە لە پشتەوەى ئەو ئیمزانەكردنەیدا ئەگەر نامەنتقیش بىَ حیكمەتێك هەیە .
ئەو حیكمەتەى لە یاساى رۆژنامەگەرى كوردستانیشدا بەكارهێندرا ، پێیان زوڵم بوو رۆژنامەنووس لە كوردستان حەسانەى هەبێت و لەسەر كارى رۆژنامەگەرى دەستگیر نەكرىَ .
بەهەرحال ئێمە ئەگەر هەر خەریكى ئەوە بین بۆ هەر كارێكى نامەنتقى حیكمەتێك بە نمونە بێنینەوە ، ئەوە باوەڕ ناكەم هیچ شتێك بىَ حیكمەت بێت ، بەڵام چ حیكمەتێك .
ئەو حیكمەت و مەنتقەى لە رادێوى (زێد)دا هەیە ، ئەو رادێویەى ماوەیەكە لە هەولێر كەتۆتەكار و بانگەشەى ئەوە دەكات كە دەنگى باب و باپیرانە ، پیاو هەتا گوىَ لەو رادێویە رانەگرىَ نازانىَ رادێوى (زێد) زێد و دەنگى باب و باپیران یانى چى ، چونكە ئەوەى ئێمە پێشتر تێگەیشتبووین ئەوها نییە ، گۆرانى ئینگلیزى و هیندى بەشێكى سەركى دەنگى رادێوكە پێكدێنن ، هەركە دەڵىَ زێد رادێو زێدى باب و باپیران گۆرانییەكى ئینگلیزى یان هیندى پیاو بۆ خاى بڵىَ زۆرجاریش كوردیت گوىَ لێدەبىَ ، رەنگە ئێمە ئەوەمان پێ كارێكى نامەنتقى بىَ ، بەڵام ئەگەر دیقەتى ئەوە بدەین كە قسەیەك هەیە دەڵىَ زمانى كوردى بە شێوەیەك لە شێوەكان دەچێتەوە سەر هیند و ئەوروپییەكان ، ئەوە تارادەیەك دەگەینە ئەو راستییەى كە لەوانەیە ئەو مەسەلەیە پەیوەندى بەو مەسەلەیەوە هەبىَ .
لەوانەشە لێنەدانى گۆرانى عەرەبى و فارسى و توركیش لە رادێوى زێدى باب و باپیران حیكمەتێكى تێدا بێت ، دووریش نییە حیكمەتەكە پەیوەندى بە ئاسایشى نەتەوەییەوە هەبێت.
ئەو حیكمەتەى زۆرجار لە نووسینیشدا دەبینرێت ، كاتێك نووسەرێك لە كۆتایى رستەكەیدا ، یەك دەرزەن نیشانەى پرسیارو سەرسوڕمان و خاڵبەند ریز دەكات ، هەر ئەوەنا نووسەرمان هەیە قسە بێتە قسەى خۆى بە مەلیكى نادات ، بەڵام ئامادەیە لە هەموو شوێنێك ، هەر بڵاوكراوەیەك ئەگەر بۆ یەكجار لەسەر ئاستى گەرَِكێكیش دەرچىَ تێدا بنووسىَ ، بەڕاستى پێم سەیرە نووسین بگاتە ئەو ئاستەى هەر بە باى كەیت ، بەڵام نا رەنگە ئەمەشیان حیكەمەتێكى تێدا بىَ .
ئەو حیكمەتەى ماوەیەكە شتى دیكەشى گرتۆتەوە ، ئێستا ئەگەر بتەوىَ كەسێك لە شوێنێكەوە بگوازیتەوە بۆ شوێنێكى دیكە ، ئەوە كەسەكە حیكمەتى خۆى بەكار دێنىَ و یەك دونیا ئیمزا لە دژى نامەنتقیەكەت كۆدەكاتەوە ، بۆ ئەوەى لە شوێنەكەى لانەدرىَ ، لەوەش گەڕىَ كە تا دوا هەناسە لە خەبات و تێكۆشانەكەى بەردەوام دەبێت بۆ دەستبەردار نەبوون لە كورسییە دەوارەكەى، خۆ ئەگەر لاشدرا ئەوا دەیخاتە قالبى حزبایەتى و هەزار و یەك ئاین و ئۆینى بۆ دێنیتەوە .
