مرۆڤێک گه‌وره‌تر له گه‌وره‌یی
مرۆڤێک گه‌وره‌تر له گه‌وره‌یی
هه‌ڤاڵ کوێستانیساڵ و شتێک دوای شه‌هید بوونتان چووینه ئه‌و ماڵه‌ی که له گوندی ته‌نگیسه‌ر دواهه‌مین مه‌نزڵتان بوو. جووته پێڵاوه لاستیکه به‌جێ ماوه‌کانتان ، هێشتا له ناو تاقی ژووره گڵینه‌که‌ی ماڵی حاجی ساڵح دابوون.
نازانم ئێستا ئه‌و جووته پێڵاوه هه‌رماون یان نا.. ئه‌گه‌ر ماشبن، نازانم داخۆ له هیچ مۆزه‌خانه‌یه‌کی نیشتیماندا جێگای شایسته‌یان بۆ ته‌رخان کراوه‌یان نا.. به‌ڵام ئه‌وه‌ی ده‌یزانم ئه‌وه‌یه ، ئه‌و پێڵاوانه ، لای زۆرینه‌ی خه‌ڵکی کوردستان ، زۆر له تاجی سه‌ر سه‌ری شابازرگانه‌کانی ئه‌مڕۆی سیاسه‌ت به‌رزترو به‌نرختن.
ئێوه له سه‌رده‌مێکی دژوارداو به ته‌مه‌نێکی کورته‌وه و له مه‌ودایه‌کی زه‌مه‌نی پێوانه‌یی یه‌کجار کورتا ، په‌یامێکی مه‌زنتان گه‌یاندو ته‌وژمێکی به‌هێزی فیکری و ئه‌خلاقی و روحی و شارستانیتان تێکه‌ڵ به سیاسه‌ت کردو بووشن به سومبڵی خه‌سڵه‌ته هه‌رێ جوانه‌کانی سیاسه‌ت و فیکرو کردار . له‌وێشه‌وه ، له دیدی ئێمه‌دا ، بوون به ئه‌فسانه‌ی ناو دنیای سیاسه‌ت. سیاسه‌تێک که له دیار نه‌مانی ئێوه‌دا و له سه‌رده‌ستی چه‌ندانێک له هاوسه‌نگه‌ره کۆنه‌کانی ئه‌وکاته و حازر خۆره‌کانی ئێستاکه ، له زۆربه‌ی هه‌ره زۆری خه‌سڵه‌ته فیکری و ئه‌خلاقی و ئینسانی و ئایدیاییه‌کانی رووتکراوه‌ته‌وه و له‌زۆرتر کردنی قودره‌ت و سامان به‌ولاوه په‌یامێکی دیکه‌ی نه‌ماوه.
ئێوه که جوانترین کاته‌کانی سی ساڵه‌ی ته‌مه‌نتان بۆ سڕینه‌وه‌ی که‌وشه‌نی نێوان چینه‌کان و بۆ به‌رقه‌رار کردنی دادپه‌روه‌ری کۆمه‌ڵایه‌تی به‌خت کرد ، که چی ئێستا دوای 18 ساڵ له ئه‌زموونی حوکم و دوای چه‌ندین ده‌یه له بانگه‌شه‌ی سۆشیالیزم و دادپه‌روه‌ری کۆمه‌ڵایه‌تی و له یه‌کسانی ، هه‌تا دێ بۆشایی و زه‌ندۆڵی نێوان چینه‌کان گه‌وره‌تر ده‌بێ… نه‌ک هه‌ر ئه‌وه ، ها‌توون شه‌هیده‌کانیشیان به‌سه‌ر چینی به‌رزو نزما به‌ش به‌ش کردوه. چینی شه‌هیده ده‌وڵه‌مه‌نده‌کان و چینی شه‌هیده هه‌ژاره‌کان ، چینی شه‌هیده سه‌رکرده‌کان و چینی شه‌هیده ره‌ش و ڕووته‌کان.. ئێوه که هه‌میشه له گه‌ڵ چینیی چه‌وساوه و زه‌حمه‌تکێشانی کوردستاندا بوون ، ئێستا ئێوه‌شیان خستۆته ناو چینی خواپێداوانی سه‌ره‌وه.. چینی سه‌رکرده شه‌هیده‌کان.
ئێوه که خه‌وتان به‌وه‌وه ده‌بینی گه‌ڕه‌که‌کانی کووران و قه‌ره‌جاوه بگه‌یه‌ننه ئاستی گه‌ڕه‌که‌کانی ناو قه‌سران و عه‌قاری.. ئه‌وا ئێستا جیاوازیان خستۆته نێوان گه‌ڕه‌که‌کانی شه‌هیدانیشه‌وه.. گه‌ڕه‌کی سه‌رکرده شه‌هیده‌کان بۆ ژماره‌یه‌ک خێزان و خێزانی سه‌دان هه‌زار شه‌هیدیش له قه‌ره‌جاوه‌و کوورانی ئه‌وساش جێیان نابێته‌وه..
ئه‌و کاته‌ی حیزب به‌نانه ره‌قه‌ی دێهات و به پیتاک و به داهات و به هاوکاری خه‌ڵک ده‌ژیا ، ئێوه خه‌وتان به کوردستانێکه‌وه ده‌بینی که له به‌هه‌شتێکی بچکۆله بچێ.. دێیه‌کانی له سه‌ر شێوه‌ی هاوچه‌رخ دابڕێژرێن و هه‌موو خزمه‌ت گوزاریه‌کانی شاریان تێدا بێ و له شارێکی مۆدێرنی بچووک بچن . که چی ئێستا شار خۆی بۆته لادێ.. لادێش نه‌ک هه‌ر توانای به‌رهه‌مهێنانی نه‌ماوه ، به‌ڵکو ته‌نانه‌ت ماست و هێلکه و پیوازیشی له شاره‌وه و شاریش له ووڵاتانی ده‌وروبه‌ره‌وه بۆ دێ . ئه‌و حیزبه‌ی ئه‌و کاته له سه‌ر داهاتی خه‌ڵک ده‌ژیا ، ئێستا زۆرینه‌ی داهاتی هه‌موو ووڵات بۆخۆی ده‌باو له لاواز کردنی ئیراده‌ی خه‌ڵک و له ده‌وڵه‌مه‌ند کردنی تاقمێکداو له به‌هێز کردنی حیزبی سه‌رۆک و ده‌سه‌ڵاتی سه‌رۆکی حیزبدا به‌کاری دێنێ.
ئێوه ده‌تانه‌ویست حیزب بێته قوتابخانه‌ی دروستبوونی نه‌وه‌یه‌کی هۆشیاری نوێ.. نه‌وه‌یه‌ک که لێوان لێو بێت له رۆشنبیری و له ئیراده‌و له توانستی به‌رهه‌مهێنان و له ئینتیمای نیشتیمانی و نه‌ته‌وایه‌تی.. که‌چی ئێستا حیزب بۆته مه‌شقگایه‌کی گه‌وره‌ی به‌رهه‌مهێنانی چه‌کدار و سیخوڕو قامچی به‌ده‌ست.. ده‌تانه‌ویست حیزب له خزمه‌تی خه‌ڵک و نیشتیمانه‌که‌یدا بێ.. که‌چی ئێستا خه‌ڵک کراوه‌ته ئامێرو له خزمه‌تی مه‌کینه‌ی حیزب و ده‌سه‌ڵاتی تاقمێک دایه.
ئێوه ده‌تانه‌ویست عیشقی مرۆڤ ، عیشقی ووڵات ، عیشقی فیربوون ، عیشقی خزمه‌ت و عیشقی جوانی له ناخی مرۆڤی کوردا بچێنن.. که‌چی ئێستا هه‌موو ئه‌و که‌مانه ره‌نگینه‌ی عیشقانه ، له سای ده‌سه‌ڵاتی خۆماڵیدا ، له کاڵبوونه‌وه و ئاوابووندان.
ئێوه که هه‌میشه باوه‌ڕی قووڵتان به گۆڕان و به حیزبی مۆدێرن و به رابه‌رایه‌تی به کۆمه‌ڵ و به ئازادی تاک و به ئازادی رۆژنامه‌گه‌ری و به ئازادی بیروباوه‌ڕو به قبووڵکردنی یه‌کتریی و به سه‌روه‌ری یاساو به‌یه‌کسانی ژن و پیاو و به به‌ره‌و پێشه‌وه‌چوونی کۆمه‌ڵ هه‌بوو ، که‌چی ئێستا کۆمه‌ڵ به‌ره‌و دواوه چوه‌و حیزب بۆته عه‌شیره‌تێکی گه‌وره‌و رابه‌رایه‌تی به‌کۆمه‌ڵیش ، به ئیتاعه‌و وه‌لائی کوێرانه‌ی گشتی بۆ سه‌رۆک گۆڕاوه و سه‌رۆک و بازنه ته‌سکه‌که‌ی ده‌وریشی ، له سه‌رووی یاساو کۆمه‌ڵه‌وه‌ن و هه‌موو پێوانه‌و رێساکانیشیان چه‌وت و شێواند‌وه ، بۆ ئه‌وه‌ی ئه‌و گه‌نده‌ڵیه سیسته‌ماتیکیه‌ی ئه‌وان خوڵقاندوویانه ، سرووشتی و ئاسایی بنوێنێ.. هه‌رکه‌سێکیش جورئه‌ت بکاو چرای فیکرو ئاڵاکه‌ی ئێوه هه‌ڵگرێ ،.. هه‌رکه‌سێک داوای ئازادی تاک و .. ئازادی راده‌ربڕین و.. ئازادی بیروباوه‌ڕو داوای گۆڕان و ته‌نانه‌ت گه‌ڕانه‌وه‌ش بۆ پرینسیپه سه‌ره‌تایه‌کانی شۆرش بکا..ئه‌وه‌ی به‌عس وه‌ختی خۆی پێشمه‌رگه‌ی پێ تۆمه‌تبار ده‌کرد، ئێستا ئه‌وان به هه‌مان ده‌ستوور تۆمه‌تی گێره‌شێوێنی و ئاژاوه‌چی ده‌ده‌نه پاڵ و به ده‌ستووری ناو دارستانیش فه‌رمانی نان بڕین و ده‌رکردن و هه‌تا تتیرۆرکردنیشی به‌سه‌ردا ده‌سه‌پێنن.. ئه‌وه له کاتێکدا حیزب پڕه له کۆنه جاش و کۆنه به‌عسی و فایل دارو .. شتی دیکه‌ش.. بمبه‌خشن ئه‌گه‌ر بڵێم ، ئه‌گه‌ر ئێوه‌ش ته‌شریفتان لێره‌بوونایه و داوای ریفۆرم و گۆڕینی بنه‌ڕه‌تیتان کردبا ، هیچ به دووری نازانم ، هه‌مان تۆمه‌تیان بۆ ئێوه‌ش هه‌ڵبه‌ستبا.. ئێوه‌ی له گه‌وره‌یی گه‌وره‌تر..
هه‌ڤاڵ کوێستانی
30/01/2009
له‌نده‌ن
