Skip to Content

Wednesday, June 19th, 2024
نەمتوانیووە خۆم یەکلایى بکەمەوە…… محەمەد کوردۆ

نەمتوانیووە خۆم یەکلایى بکەمەوە…… محەمەد کوردۆ

Closed
by March 1, 2009 ئەدەب

نەمتوانیووە خۆم یەکلایى بکەمەوە
   محەمەد کوردۆ

دەنگێکى دوور
لەو دیو چەندین چیاى گەورەى پڕ تەمەوە
بانگم دەکات
دەنگێکى زۆر نازەنینە
دەنگى ژنێکى شیرینە
هێدى هێدى
دەڕژێتە ناو گوێچکەمەوە
سەرم دەبەستێ بە ژانء
پێم بە شەقاوى گرانء
دڵم بەدارى خەمەوە
دەڵێ کوردۆ گیان بمبورە
ماڵى ئێوە
زۆر لە ماڵى ئێمە دوورە
من کە بەرگەى ئەم دوورییەم بۆ نەگیرا
لەخۆم پرسى:
بۆچى درۆى لەگەڵ بکەم؟
بۆچى بیگرم بەدەمەوە؟
خۆم سەربڕىء
تۆم سەربڕىء
دەرگایەکى دیکەم نەبوو بیکەمەوە!
هەر دەنگەکە لێم دەپرسێ:
کوردۆ ئێستا خەریکى چیت؟
منیش درۆى لەگەڵ ناکەم
دەڵێم دواى تۆ
بۆنى خۆشى ژنێکى شۆخ
رژایە ناو
دڵء
گیانء
سینەمەوە
ئەو دڵى خۆى داوە بە من
وەلێ من هێشتا هەر کاسء حەپەساوم
لە کۆستێکى دى ترساوم
نەمتوانیووە
خۆم یەکلایى بکەمەوە
نەمزانیووە
دڵى خۆم بدەم بەو ژنە
یان دڵى خۆى
بدەمەوە؟!
                              mhamadkurdo@yahoo.com    
***

*ئەم شیعرە لە دیوانى (ژەنەراڵى خۆشەویستییدا)، بڵاوکراوەتەوە، کە یەکێکە لە کتێبە چاپکراوەکانى گۆڤارى (هەنار)ء لەو رۆژانەدا لە سلێمانى چاپکراوە.

Previous
Next
This site is registered on wpml.org as a development site.