Skip to Content

Saturday, March 2nd, 2024
هه‌ڵبژاردن وه‌ك هه‌لێكی زێڕین بۆ وازهێنان له‌ موژده‌وه‌همیه‌كان

هه‌ڵبژاردن وه‌ك هه‌لێكی زێڕین بۆ وازهێنان له‌ موژده‌وه‌همیه‌كان

Closed
by April 16, 2009 گشتی

هه‌ڵبژاردن وه‌ك هه‌لێكی زێڕین بۆ وازهێنان له‌ موژده‌وه‌همیه‌كان
 ( حیزبه‌كان پڕبون له‌شه‌یتان , هه‌مو ساتێكیش خه‌ونی شه‌یتانی ده‌بینن )
پێشڕِه‌و حه‌مید

گه‌لێك خاوه‌نی كه‌سانی دڵسۆزو سه‌ركرده‌ی خاون ئه‌قڵی دیبلۆماسیی و سیاسیانه‌ی باڵابێت و گه‌لێكی هۆشیاربێت و ئاگاداری ڕه‌وته‌كانی گۆڕانبێـت له‌هه‌موو بواره‌كانی سیاسی و ئابوری و كولتور و  هتد,ئه‌وا مه‌حاڵه‌ به‌ئاسانی ( هه‌لی زێڕین ) ی وه‌ده‌ست بكه‌وێت بۆده‌ربازبون له‌ قه‌یرانه‌كان ئه‌گه‌ر ڕوبه‌ڕوی قه‌یرانه‌كان بنه‌وه‌ , به‌ڵام هه‌رگه‌لێكی هوشیاریش ئه‌گه‌ر بۆده‌ربازبونیان له‌قه‌یرانه‌كان و دروستكردنی كیانیكی تایبه‌ت به‌خۆیان ( هه‌ل ) یان بۆڕه‌خسابێت ئه‌وا وه‌ك ئێمه‌ی كورد له‌ده‌ستیان نه‌داوه‌وه‌ و سه‌ركرده‌كانیان گه‌مه‌زانێكی باشی ناوگۆڕه‌پانی كێشه‌ سیاسیه‌ ئاڵۆزه‌كان بوه‌و به‌به‌كارهێنانی ( ئه‌قڵ ) و ته‌كتیكی دیبلۆماسیانه‌ی خۆیان كه‌م تازۆر توانیی ویانه‌ به‌ سود وه‌رگرتن له‌ ڕه‌وته‌كانی گۆڕانی سه‌رده‌مه‌ جیاجیاكانی خۆیان سود وه‌ربگرن و ته‌واوی قه‌یرانه‌كانیان تێپه‌ڕێنن و ببنه‌ خاوه‌ن كیانێكی سه‌ربه‌خۆو وڵات گه‌لێكی به‌هێز ,وه‌ك وڵاتانی ئه‌وروپا كه‌ به‌شێوه‌یه‌كی بنه‌ڕه‌تی له‌دوای جه‌نگی دووهه‌می جیهان سودیان له‌ ئه‌زمونی تاڵی شه‌ڕ وه‌رگرت و هه‌لێكه‌یان قۆزته‌وه‌ بۆ بونیات نانه‌وه‌ی وڵاته‌كانیان .
له‌ ده‌ست دانی هه‌لی زێرین بۆده‌ربازبون له‌قه‌یرانه‌ سیاسه‌كانیان , یان گرتنه‌ ده‌ستی ده‌سه‌ڵات له‌سه‌ر ده‌ستی حیزب و گروپه‌ جیاوازه‌كان له‌پانتای  عێراق وكوردستاندا له‌ماوه‌ی ( 80 )  ساڵی ڕابردودا , له‌ئه‌ژماركردن نایه‌ت به‌تایبه‌تی ئه‌و هه‌لانه‌ی كه‌ بۆ ( كورد ) ئاماده‌ییان هه‌بوه‌و له‌ده‌ستیان داوه‌ , هه‌وه‌ها  له‌دوای ڕوخانی ڕژێمی پاشایه‌تی له‌ عێراق له‌ ( 14/7/1958 ) هه‌لێكی زێرین بۆ ( شیوعیه‌كانی عێراق ) هاته‌پێشه‌وه‌ كه‌ حوكمی عێراق بكه‌ن و زیاتر پێگه‌ی جه‌ماوه‌ری خۆی به‌هێزتر بكات كه‌ له‌وكاته‌دا خاوه‌نی گه‌وره‌ترین پێگه‌ی جه‌ماوه‌ری بو , له‌دوای له‌ده‌ست دانی ئه‌و هه‌له‌ به‌بیانوی كۆمه‌ڵێك به‌هانه‌ی بێمانای ئه‌وسه‌ردامانه‌ی ژیانی حیزبی شیوعی و ڕه‌وشی سیاسی و كۆمه‌ڵاتی و ئابوری له‌عێراقدا , ئه‌وا جارێكی تر مه‌حاڵه‌ ( شیوعیه‌كانی كوردستان و عێراق  ) هه‌لێكی وه‌هایا بۆبڕه‌خسێت  بۆحوكمكردنی وڵاتێكی پڕله‌كێشه‌ی سایسی و ئیداری وه‌ك كوردستان و عێراق  , به‌ڵكوئه‌و حیزبه‌ توانای ڕێكخستنه‌وه‌ی شه‌قامی سیاسی و فیكری خۆیشی نابێت كه‌ له‌و سه‌رده‌مانه‌دا به‌ ته‌نها بانگه‌وازێكی بچوك بتوانێت ( 3 ) ملێون مرۆڤ بخاته‌ سه‌رشه‌قامه‌كان و پێگه‌ی جه‌ماوه‌ر خۆی به‌هێز بكات ئه‌ویش له‌به‌ر ئه‌و گۆڕانكاریانه‌ی كه‌ئه‌مڕۆ ڕوئه‌ده‌ن و حیزبی شیوعیش به‌فیكرێكی دۆگماوه‌ مامه‌ڵه‌ی له‌ته‌كدا ده‌كات , بۆمیلله‌تی كوردیش چه‌ندین ( هه‌ل ) چونه‌ته‌ پێش بۆئه‌وه‌ی به‌خه‌ونی له‌مێژینه‌ی خۆی شادبێت و ببێته‌ خاوه‌نی كیانێكی سه‌ربه‌خۆ به‌ڵام سایه‌تی دوفاقیه‌ت و ترس له‌بڕیاردانی چاره‌نوس ساز , تائێستاش به‌ پاشكۆی خۆیی حكومه‌تی ناوه‌ند به‌ستووه‌ته‌وه‌و توانایی خۆده‌ربازكردنی نییه‌ له‌مۆته‌كه‌ی بێبڕوابون به‌ سه‌روه‌ت و و مێژوو قوربانییه‌كای خۆی بۆ جاردانی بون به‌ده‌وڵه‌ت و ناشتوانێت واز له‌و ده‌وڵه‌تانه‌بهێنێت كه‌ ده‌زانێت هه‌ركات به‌رژه‌وه‌ندینان له‌گه‌ڵ كوردا یه‌كی نه‌گرتوه‌ پشتی تێده‌كه‌ن .
ئایا ئه‌م هه‌له‌ی تر , ئه‌م هه‌ڵبژاردنه‌ی كه‌بڕیاره‌ له‌ماوه‌ی دومانگی تردا سازبكرێت تاچه‌ند حیزبه‌كان فێرده‌كات واز له‌ به‌خشینه‌وه‌ی موژه‌وه‌همیه‌كانیان بهێنێت و به‌چی پرۆژه‌یه‌كه‌وه‌ ده‌چنه‌ نێو ململانییه‌كانه‌وه‌ له‌كاتێكدا ئیدی گێرانه‌وه‌ی مێژوی سه‌روه‌ری شاخ و  و وتاری حه‌ماسیی و په‌خشانی شۆڕشگیرشانه‌ هیچ له‌ هاوكێشه‌كان ناگۆڕێت ؟   
ئه‌گه‌ر حیزبی كوردیی به‌م فیكره‌ نه‌خۆشه‌ی خۆیه‌وه‌ درێژه‌ به‌ فریودان و به‌خشینه‌وه‌ی موژده‌ وه‌هه‌میه‌كانی خۆی بدات و بیه‌ویێت له‌ڕێگه‌ی هه‌ڵوه‌شاندنه‌وه‌ی چه‌ند ڕێكخراو و ناوه‌ندێكی كارتۆنی و گۆڕینی چه‌ند ڕوخسارێك بێته‌وپێشه‌وه‌ , بۆكرانه‌وه‌و  قبوڵكردنی ئه‌قڵێتی تازه‌و خوێنی زیندوی نه‌وه‌یه‌كیترو ململانی كردن له‌سه‌ر وه‌ده‌ستخستنی ده‌نگی زۆرترین ده‌نگده‌رانی پرۆسه‌ چاوڕوانكراوه‌كه‌ی هه‌ڵبژاردن, ئه‌وا گۆمانێكی زۆرله‌سه‌ر ئاینده‌ی حیزب دروست ده‌كات و وێنه‌ ته‌ماوییه‌كه‌ی خۆی  به‌و ئه‌قڵێته‌وه‌ ڕۆشن ناكاته‌وه‌ و به‌رده‌وام له‌بازنه‌یه‌كی باتاڵدا خولده‌خوات و ناتوانێت خۆی له‌ سیاسه‌تی ئیزدیواجییه‌ت ڕزگار بكات ؟ چونكه‌ ئه‌وه‌ی ئه‌مڕۆبه‌ناوی چاكسازییه‌وه‌ كاری بۆده‌كات و چه‌ند هه‌نگاوێكی بچویكشیی بۆ هه‌ڵنا جگه‌له‌ دوفاقیه‌ت هێشتا هیچ نییه‌ ؟
 ئه‌وه‌ی نه‌یتوانی له‌ته‌نیشت حیزبه‌وه‌ به‌رده‌وام بێت له‌سه‌ر كورسی به‌رپرسیارێتی و به‌رژه‌وه‌ندیه‌كانی كه‌و تنه‌مه‌ترسیه‌وه‌و ئێستا له‌شوێنێكی تره‌وه‌ ده‌یه‌وه‌ێت به‌ناوی چاكسازییوه‌ سه‌ربكه‌وێت تاچه‌ند ڕاستگۆیانه‌ بۆ چاكسازیی و به‌دامه‌زراوه‌كرندی دزگاحكومییه‌كان كارده‌كات , تاچه‌ند ئاماده‌یه‌ به‌رژه‌وه‌ندی گشتی بخاته‌ پێشبه‌رژه‌وه‌ندی خۆیه‌وه‌, له‌كاتێكدا به‌رله‌ تۆران و یاخی بونی له‌حیزبه‌كه‌ی پێشتر به‌رژه‌وه‌ندی به‌حیزبی دایكیه‌وه‌ ده‌یبسته‌وه‌ ؟.
  ئه‌و به‌ها ئه‌خلاقیانه‌چین كه‌ حیزبی كوردی شانازیان پێوه‌ده‌كات ؟ له‌كاتێكدا ئه‌و  سیاسه‌تكردنه‌ی  حیزبه‌كوردیه‌كان كردویانه‌ته‌ سیسته‌می خۆبه‌ڕێوه‌بردن  له‌ماوه‌ی هه‌ژده‌ساڵدا جگه‌له‌ ده‌سته‌مۆكۆدن و قۆرغكردنی سه‌روه‌ت و سامانی میلله‌ت و دوباره‌كردنه‌وه‌ی چه‌ندین هه‌ڵه‌ی سیاسی و میژویی و دروستكردنی چه‌ندین باندی له‌یاسا هه‌ڵهاتوو  به‌خشینی پله‌ی به‌رپرسیارێتی به‌ خه‌لكانی گه‌نده‌ڵكار و قوڵكردنه‌وه‌ی جیاوازییه‌ چینایه‌تییه‌كان و … تد, هیچ مانایه‌ك بۆ ئه‌خلاق نایه‌ڵێته‌وه‌ ؟!  ئه‌گه‌ر حیزبی كوردی له‌ڕابردودا قوربانی به‌ ئه‌ندامانی خۆیی و  نه‌ته‌وه‌كه‌ی دابێت بۆپارستنی ناسنامه‌ی نه‌ته‌وه‌و ڕزگاركردنی نه‌ته‌وه‌ له‌ ئه‌تككردن  ڕزگاركردنی كوردستان له‌ژێرچه‌پۆكی دوژمونانی كورد و به‌هه‌مو شكست و ده‌سكه‌وتو سه‌روه‌ریه‌كانیه‌وه‌ وێنه‌یكی جوانی به‌خۆی به‌خشیبێت له‌دڵی میلله‌تدا ؟  ئه‌وا له‌ئێستادا  حیزبی كوردی خاوه‌نی كام وێنه‌یه‌  له‌نێوان وێنه‌یكی شه‌یتانی , وێنه‌یه‌كی شكاو , وێنه‌یكی ناڕێك و  وێنه‌گه‌لێكی تری ناشرین  كه‌ له‌دوای ئه‌و هه‌مو ماڵوێرانییه‌ی كه‌ به‌سه‌ر ئه‌قڵیه‌تی خۆیداهێنایو خه‌ڵكی كوردستانیان له‌ خۆخواردنه‌وه‌دا به‌جێهشتو و له‌پانتاییه‌كی ناته‌ندروستدا به‌شێون چاره‌نوسیی خۆیه‌وه‌ بێ قاچ ده‌یه‌وێت به‌رده‌وام بێت بۆخۆدۆزینه‌وه‌ ؟ ئاخۆ به‌هاكانی حیزب درۆزن , یان ڕاستییه‌كانی  ده‌مامكن؟  سیاسه‌ته‌كانی چه‌واشه‌كارن, یان گوتاره‌كانی سۆزئامێزو له‌رزوكن ؟ ئایا خه‌ونه‌كانی حیزبی كوردی  شه‌یتانین , یان ڕێكخستنه‌كانی حیزب پڕبوه‌ له‌شه‌یتان ؟ ئه‌گه‌ر ته‌نها به‌پرسیایرێكی ساده‌ ده‌ستپێبكه‌ین له‌سه‌ر ئه‌قڵیه‌تی په‌روه‌رده‌كردن و پێگه‌یاندنی ( كادیر ) ی حیزی و بزانین ئه‌وانه‌ی حیزب دروستیان ده‌كات بۆ خۆبه‌ڕێوه‌بردن و دیاركردنی سیاسه‌تی ئاینده‌ی حیزب , ئه‌واده‌كرێت بڵێن ,حیزبی كوردی كێ په‌روه‌رده‌ده‌كات و ئه‌وانه‌ی مه‌هامی په‌وروه‌رده‌كردن ده‌گرنه‌ ئه‌ستۆكێن و ئه‌وانه‌ی په‌روه‌رده‌ ده‌كرێن چۆن حیزب به‌ڕێوه‌ده‌به‌ن ؟ ئێستا حیزبی كوردی پڕه‌ له‌شه‌یتان و شه‌یتانانه‌ وانه‌كانیان پێده‌وترێته‌وه‌و شه‌یتانانه‌ گوتاروكان ئاراسته‌ده‌كه‌ن و شه‌یتانانه‌ سیاسه‌تی دوقاقیه‌ت به‌ڕێوه‌ده‌به‌ن و شه‌یتانانه‌ بیرله‌ئاینده‌ ده‌كه‌نه‌وه‌ و شه‌یتانانه‌ كورسیه‌كانی به‌رپرسیاریه‌تیان به‌كار ده‌هێنن و شه‌یتانانه‌ وێنه‌ی فریشته‌یه‌ك به‌ شه‌یتانه‌گه‌وره‌كانی ناو حیزب ده‌به‌خشن .
ئه‌وه‌ی سیاسه‌ت ده‌كات له‌نێو حیزبدا و ئه‌وه‌ی حیزب به‌ڕێوه‌ده‌بات و ئه‌وه‌ی حیزب فیری ده‌كات و ئه‌وه‌ی له‌حیزبه‌وه‌ فێرده‌بێت ئه‌وانه‌ن كه‌ ئه‌م وڵاته‌یان له‌ گه‌نده‌ڵیدا نغرۆكرت , ئه‌وانه‌بون كه‌شه‌ڕی ناوخۆیان دروستكرد , ئه‌وانه‌بون كه‌وه‌ك میلله‌تێكی نه‌زانن و بێئراده‌ و خۆشباوه‌ڕ به‌ دونیایان ناساندین , ئه‌وانه‌ن بون وڵاتیان به‌سه‌ر دوو هه‌رێمدا دابه‌شكرد, ئه‌وانه‌بون كه‌ به‌ناوی پارستنی ئه‌منی قه‌ومییه‌وه‌ سه‌روه‌ری نیشتمانیان خسته‌ژێر پۆستاڵه‌كانی جه‌ندرمه‌وه‌ و  پاسداره‌وه‌ , ئه‌وانه‌بون كه‌ بۆ پارستنی مافه‌كانی ژنان فره‌ ژنیان كرده‌بڕیار , ئه‌وانه‌بون كه‌به‌ناوی پارستن و فراوانكردنی مه‌وداكانی ئازادییه‌وه‌ میدیای ئه‌هلی یان كرده‌ جاسو و به‌ناوی دادپه‌روه‌رییه‌وه‌ قه‌ڵمی ئازادو سوربه‌خۆیان تیرۆركرد , ئه‌وان ئه‌وانه‌بون كه‌مۆدیلێكی حكوم كردنیان داهێنا هێشتا له‌دونیادا وێنه‌ی نییه‌ له‌ له‌نگیدا , ئه‌وان ئه‌وانه‌بون كه‌ …تد, دركاندنی ئه‌م چه‌ند هه‌قیقه‌ته‌ تۆمه‌تباركردنی ئه‌وانه‌ نییه‌ كه‌ ئێستا خۆیان به‌ فریشته‌ده‌زانێت , ئه‌وه‌نده‌ی به‌ئاگاهێنانه‌وه‌یانه‌  له‌ شه‌یتان بونیانی خۆیان .
ئه‌م خوێندنه‌وه‌یه‌ تاچه‌ند خزمه‌تی ئه‌وڕه‌گه‌زه‌ ده‌كات كه‌ناوی  واقیعیه‌تی حیزی كوردیه‌ ؟ له‌كاتێكدا خه‌یاڵ و ڕه‌مزه‌وه‌همیه‌كانی حیزب له‌ناوحیزبدا باڵاده‌ستن ؟ ئایا حیزیه‌كانی كوردستان له‌به‌رامبه‌ر خویندنه‌وه‌و پرسیارگه‌ڵێكی وه‌ها دا تاچه‌ند به‌خۆیاندا ده‌چنه‌وه‌و هه‌وڵی چاككردنه‌وه‌ی وێنه‌ شكاوه‌كه‌ی خۆیان ده‌دن , كه‌ پڕن له‌گه‌مه‌ی كۆن و فیكری نه‌خۆش و ئه‌قڵی پیر ؟.
تێبینی: ئه‌م وتاره‌ له‌ژماره‌ ( 515 ) ڕۆژنامه‌ی ( هاوڵاتی ) له‌ ڕۆژی ( 12/4/2009 ) بڵاوكراوه‌ته‌وه‌ 

   

 

Previous
Next
This site is registered on wpml.org as a development site.