مه‌رگی مریشكه‌سپی‌‌و دڵڕه‌قی ئه‌وان….باوكی لاس
مه‌رگی مریشكه‌سپی‌‌و دڵڕه‌قی ئه‌وان
باوكی لاس
حیكایه‌تی مردنی مریشكه‌سپی ، ته‌نهاپێشیلكاری مافی په‌له‌وه‌رو ئاژه‌لان نیه، به‌ڵكو پێشیلكاری مافی مرۆڤ‌و وێنه‌یه‌كی دزێوی هه‌ڵسوكه‌وتی به‌رپرسان‌و توڵه‌و تانجی‌و سه‌گه‌كانیشیانه.
رۆژێك له كۆلانه‌كه‌مان شۆفێری پیكابێك به‌بڵندگۆ هاواری ده‌كرد، مریشكی قه‌ڵه‌و ، خۆتان ده‌زانن ئه‌و قوڕمساغه چۆن مرۆڤ ده‌خاته ئاماده باشیه‌وه به‌تایبه‌تیش ئه‌گه‌ر نه‌وسن بێ‌‌وتازه موچه‌ی وه‌رگرتبێ .. به‌هه‌رحاڵ مریشكێكم كڕی به‌ڵام له‌به‌ر ئه‌وه‌ی نه‌مده‌ویست به‌پێشچاوی منداڵه‌كانمه‌وه سه‌ری ببڕم‌و خوێن ببینن لێی گه‌ڕام تا له ناخافڵدا فرسه‌تی لێبێنم.. به‌ڵام دواتر هه‌ردوو منداڵه‌كه‌م هۆگری بوون‌و بوونه هاورێ.. مریشكی تاین ئه‌وه‌نده خۆی خۆشه‌ویستكردبوو (لاس)ی كوڕم له‌ده‌می خۆی‌‌وخوشكه بچوكه‌كه‌ی ده‌گرته‌وه‌‌وبه‌ده‌می ئه‌ویداده‌كرد، به‌وحاڵه ملی له‌چه‌قۆ ڕزگاركرد..
ماوه‌ی چوار مانگی ڕه‌به‌ق ( لاس‌و له‌رێ‌‌و مریشكه سپی) هاوڕێ‌و هاوده‌م بوون، خواردنیان ده‌دایه‌و به‌دیاریه‌وه هه‌ڵده‌په‌ڕین‌و قریوه‌ی پێكه‌نینیان ده‌هات، ئه‌گه‌ر بۆیان بلوایه له‌گه‌ڵ خۆیان ده‌یانخه‌واند، كه‌چی دڵڕه‌قی پاسه‌وان‌و سه‌گی به‌پرسێك له‌قریوه‌و پێكه‌نینی خستن.. ئه‌و ئێواره‌یه‌ی له سه‌یران گه‌ڕاینه‌وه لاس‌و له‌ری ئه‌وه‌نده هه‌ڵپه‌ڕیبوون، چاوه‌كانیان پڕكردبوو له‌دیمه‌نه‌كانی سروشت‌و گویچكه‌كانیان له‌خوڕه‌ی ئاوو خۆشه‌ویستی باڵنده‌كان، هێشتا له‌نشێوی سه‌ختی دابان ته‌واو شۆڕنه‌ببوینه‌وه كه خپ خه‌ویان لێكه‌وت، به‌ڵام هه‌ر ئه‌وه‌نده‌ی گه‌یشتینه‌وه به‌رده‌رگا خۆشیه‌كانیان ئاوه‌ژووبووه‌وه. ئه‌فسوس به‌چاوی خه‌واڵووه‌وه ته‌رمی مریشكه‌سپی هه‌موو خۆشیه‌كانی هه‌ڵپڕوكاندن‌و به‌یه‌كجاری خه‌ویان لێزڕا.. ئه‌و شه‌وه تا دره‌نگانێك من‌و دایكیان پاساومان ده‌هێنایه‌و له‌هه‌وڵی دلنیاكردنیاندابووین، كه مردن له‌رێی هه‌موو زینده‌واره‌نه‌و هه‌موو مریشكێكیش ده‌مرێ..به‌ڵام ترس‌و دڵشكان‌و دڵه‌راوكێی (لاس‌وله‌رێ) زۆرنه‌فرتیان له‌گه‌ڵخۆیان هه‌ڵگرتبوو.
ئه‌وه‌ی نائاسایی بوو مردنی مریشكه سپی بوو.. ئه‌وه‌ی غه‌دربوو هه‌ڵسوكه‌وتی پاسه‌وانه‌كانی ماڵی ئه‌و به‌رپرسه‌ی گه‌ڕه‌كه‌مان و سه‌گه‌كه‌یان بوو..كه‌به‌ده‌ستی پاسه‌وانێكه‌وه‌و به‌پێشچاوی خه‌ڵكی گه‌ڕه‌كه‌وه په‌لاماری مریشكه‌سپی دابوو،په‌لامارێكی دڵره‌قانه تارۆحی ده‌رنه‌كردبوو وازی نه‌هێنابوو، ئه‌وه‌ی به‌دره‌فتارییه جگه له‌وه‌ی مریشكه‌كه‌ی له‌ده‌ست رزگارنه‌كردبوو وه‌ڵامی گه‌مژانه‌ی پاسه‌وانه‌كه بوو كه‌خه‌ڵك پێیان ووتبوو، چۆن وامامه‌ڵه له‌گه‌ڵ هاوسێ‌و ماڵی خه‌ڵكدا ده‌كه‌ن، سه‌گه‌وانه‌كه به‌خوێن ساردییه‌كه‌وه ووتبووی 🙁 ده‌بێ زۆر مه‌منون بن كه منداڵه‌كانتان ناخوات..)
ئه‌مه وێنه‌ی ژیانی ئێمه‌و په‌روه‌رده‌‌و كه‌ڵگایی‌‌و بێده‌ربه‌ستی به‌رپرسانه له‌هه‌ست‌و شعورمان، غرور‌و ڕه‌فتاری خراپی ئه‌وانه به‌رانبه‌ر به‌هاو زمان‌وهاونیشتمانی .. ره‌نگه هه‌بن بپرسن جا به‌رپرسه‌كه خه‌تای چیه، بۆ وه‌ڵامێكی ئاوا ده‌پرسین باشه شارنشین له‌گه‌ره‌كێكی راقیدا ڕاگرتنی سه‌گی هاری بۆچیه..؟ به‌رپرسێكی حزبی‌‌وحكومی سه‌گ‌و سه‌گبازی بۆچیه ..؟ بێگومان توند ره‌فتاری پاسه‌وانه‌كان ئاوێنه‌ی هه‌ڵسوكه‌وتی به‌رپرسه‌كانیانن، وه‌ك چۆن (موقاتل) ه دڵره‌ق‌و به‌دڕه‌فتاره‌كانی سه‌رۆكی عێراق ره‌نگدانه‌وه‌ی په‌روه‌رده‌ی به‌عس بوون، من دڵنیام ئه‌گه‌ر هه‌ژارێك یان بێده‌سه‌ڵاتێك مریشكێكی خه‌ڵك بكوژێ به‌دوای خاوه‌نه‌كه‌یدا ده‌گه‌ڕێ هه‌ر هیچ نه‌بێت بۆ گه‌ردن ئازاییه‌ك، نه‌ك ئاوا پشت به‌ستوو به هه‌یمه‌نه‌ی حزبه‌كه‌ی بێمنه‌ت بێت له‌مافی خه‌ڵك .. ئێستاش ئه‌گه‌ر دادگای لێبگرم دڵنیام هه‌زاران مرۆڤی ماستاوچی‌‌و گرگن ده‌ڵێن جا مریشكێكی مه‌صله‌حه ئه‌وه ده‌هێنێ..؟! بێگومان ئه‌وه‌ی ده‌ربه‌ستی دڵشكانی منداڵێك نه‌بێ كۆمه‌ڵگایه‌ك جینۆساید بكرێ لێی بێده‌ربه‌سته، ئه‌وه‌ی ده‌ربه‌ستی ئازاری مریشكێك نه‌بێ، ده‌ربه‌ستی كوشتنی مرۆڤێكیش نایه، ئه‌وكه‌سانه‌ی وا بیرده‌كه‌نه‌وه وه‌كو زۆر له‌خوێنی ئه‌نفالكراوه‌كان‌و شه‌هیده‌كانیان پرسیبێته‌وه..؟! ئه‌گه‌رچی هێشتا یاسایه‌ك نیه له‌هه‌مبه‌ر دزینی سه‌ره‌وه‌ت‌و سامانی ووڵات له بچوكترین به‌رپرس بپرسێته‌وه، چ جای ئه‌وه‌ی له‌سه‌ر مریشكێك رای كێشێته به‌رده‌می یاسا .. ئه‌گه‌ر حاڵیش بگاته ئه‌وه من دڵنیام به‌رپرسه فه‌ندی ئه‌و كاته هه‌ر بۆ پۆزلێدانیش بێت پێم ده‌ڵێت : جا مریشكێك ئه‌و ناهێنێ، فه‌رموو باده‌واجنێك كه‌ڵه‌شێرت بۆبكڕمه‌وه.. بێگومان له‌داهاتی خه‌ڵك‌و له‌و دزی‌‌وفزی‌‌و گه‌نده‌ڵیی كه ده‌مێك ساڵه له قوتی ده‌می خۆمانیان فڕاندووه. خوابكه‌م به‌وه‌نده ببڕێته‌وه، وه‌ك چۆن له‌سه‌ر قازێك شه‌ڕی ناوخۆ به‌رپابوو له‌سه‌ر هه‌واڵی مردنی مریشكه سپیش له‌م رۆژنامه‌یه‌دا مه‌رگی خۆمانی لێنه‌كه‌وێته‌وه.
