Skip to Content

Saturday, October 31st, 2020

ئایا ده‌مێ‌ ده‌وله‌تبونێ‌ هاتیه‌!

Be First!

 

 

زێده‌تره‌ ژ ساله‌كێ‌ ده‌نگ و باسێ‌ راگه‌هاندنا ده‌وله‌تێ‌ دناڤ خه‌لكی دا دهێته‌ به‌حسكرن و خه‌لكی بگشتی رویه‌كێ‌ مه‌زن دایه‌ ڤێ‌ چه‌ندێ‌ و هه‌می لهیڤیا وێ‌ چه‌ندێ‌ بون، ئه‌ڤ ده‌نگ و باسه‌ سه‌راڤ ببیت و د جهه‌كێ‌ را ده‌رببیت. ئه‌و بو ل دوماهی جار دگه‌ل گوتارا سه‌روكێ‌ هه‌رێمێ‌ ل نه‌وروزا ئه‌ڤ سال، به‌ر بڤێ‌ گومێ‌ كه‌فت و نه‌ بتنێ‌ شله‌ژان ل هه‌رێما كوردستانێ‌ په‌یدا بو، به‌لكی بارودوخێ‌ هه‌رێمێ‌ هه‌می هاته‌ شلقاندن و نه‌ یا دیاره‌ ژی ژ به‌ره‌ژه‌نكێن ڤێ‌ شلقاندنێ‌، تا كیڤه‌ دێ‌ پرچك گه‌هنێ‌. تا ڤێره‌، ئه‌ڤه‌ نه‌ ئه‌و بابه‌ته‌ یێ‌ من مه‌ره‌م پێ‌ دڤێ‌ گوتارا خوه‌ دا بینمه‌ زمان، به‌لكو ئه‌و لێكچونێن دناڤا هه‌رێما كوردستانێ‌ دا لڤێره‌ و وێرا هه‌ دروست دبن و هه‌ر كه‌سێ‌ سڤك ل بابه‌تی سه‌ح بكه‌ت، دێ‌ هزر كه‌ت راگه‌هاندنا ده‌وله‌تێ‌ ب هژاندنا له‌وه‌ندیێن ژنانه‌ و ده‌ست قوتانێ‌!.
 ئه‌وا سه‌روكێ‌ هه‌رێمێ‌ دگوتارا خوه‌ دا به‌حس كری و راسته‌وخو لایه‌نێ‌ به‌رامبه‌ر گونه‌هبار كری، گه‌له‌ك یا جودایه‌، دگه‌ل هزركرن و حه‌زا خه‌لكی. گوتارا سه‌روكێ‌ هه‌رێمێ‌ زێده‌تر یا ئاراسته‌كری بو ژ بو كه‌سایه‌تیا سه‌روك وه‌زیرێن عیراقێ‌، كو وی حوكم یێ‌ سنورداركری و مه‌ترسیا وی ل سه‌ر وان كێشه‌یێن دناڤبه‌را هه‌ولێرێ‌ و به‌غدا دا و تا نوكه‌ هه‌لاویستی ماینه‌ و پشت گوهكرنا ڤێ‌ رێكه‌فتننامێ‌ یه‌، كو لدویڤ رێكه‌فتنناما دناڤبه‌را كوردان و مالكی دا هاتیه‌ ئیمزاكرن، كو هه‌می كێشه‌یێن هلاویستی بهێنه‌ چاره‌سه‌ركرن. هه‌ر كه‌سێ‌ بهویری ل گوتارێن سه‌روكێ‌ هه‌رێمێ‌ گوهداری كربیت ژی، دێ‌ زانیت مه‌ترسیا وی ژ وێ‌ چه‌ندێ‌ یه‌ كو عیراق یا به‌ره‌ڤ حوكمه‌كێ‌ دكتاتورانه‌ ڤه‌ دچیت. هه‌ر كه‌سێ‌ ئه‌ڤرو ل سیاسه‌تا عیراقێ‌ بگشتی سه‌ح بكه‌ت، ئه‌و شله‌ژانا كه‌تیێ‌ و ناكوكیێن دناڤبه‌را لیستا عیراقیه‌ و ده‌وله‌تا قانونێ‌ دا، دێ‌ زانیت چ راسته‌وخو یان نه‌، كورد ژی به‌شه‌كێ‌ گرنگن ژڤێ‌ هه‌ڤكێشه‌یێ‌ و ئه‌گه‌ر كورد ب حه‌كیمانه‌، ڤێ‌ هه‌ڤكێشه‌یێ‌ نه‌ هه‌لسه‌نگینن، كورد دێ‌ به‌ره‌ڤ عاقاره‌كێ‌ نه‌ دیار ڤه‌ چن. نه‌خاسم ئه‌ڤرو پتریا كێشه‌یێن مه‌ دگه‌ل به‌غدا نه‌ هاتینه‌ چاره‌سه‌ركرن و ئه‌ڤرو عیراقێ‌ قوناغه‌كا تێپه‌راندی و ئه‌مریكا، هێزێن خوه‌ یێن ژێ‌ ڤه‌كێشاین و عیراق یا دكه‌ڤیته‌ به‌ر هه‌ڤكێشه‌یه‌كا جوداتر. هه‌ڤكێشه‌یه‌كی كو دوو به‌ره‌یێن دی یێن ئه‌قلیمی، كونترولێ‌ ل سه‌ر عیراقێ‌ دكه‌ن. ئه‌گه‌ر ژ نێزكتر سه‌ح بكه‌ین، عه‌ره‌بێن شیعه‌ خودانێن خوه‌ و وه‌لاته‌كێ‌ ب هێزێ‌ وه‌ك ئیرانێ‌ نه‌ و دیسان عه‌ره‌بێن سنه‌ خودانێن خوه‌ و وه‌لاته‌كێ‌ وه‌كی توركیا و عه‌ره‌بستانا سعودی نه‌ و توركمانێن ل عیراقێ‌ ژی وه‌لاته‌كێ‌ بهێزێ‌ وه‌ك توركیا پشته‌ڤانیێ‌ لێدكه‌ت. ئه‌رێ‌ لڤێره‌ پسیار ئه‌وه‌، كی پشته‌ڤانیێ‌ ل كوردان دكه‌ت؟ ئه‌گه‌ر ئه‌ڤرو كوردا خوه‌ ژ عه‌ره‌بێن شیعه‌ ڤه‌كێشا و عه‌ره‌بێن سنه‌ بو خوه‌ گرتن، ئایا ئه‌م بێژین ئه‌ڤه‌ پێنگاڤه‌كا حه‌كیمانه‌ بیت، یان به‌روڤاژی و مه‌ لایه‌نێ‌ دی یێ‌ هه‌ڤكێشه‌یێ‌ بو خو گرت! هه‌ر چاوا بیت، دڤێت ئه‌م ژ خاله‌كێ‌ نه‌بورین، ئه‌و ژی عه‌ره‌ب هه‌ر عه‌ره‌بن، چ شیعه‌ و چ ژی سنه‌ و چ هاشمی و چ مالكی. دڤان سالێن بوری ژی دا، مه‌ سیاسه‌تا هه‌ردوكان به‌رامبه‌ر كوردان دیتی یه‌. بویه‌، بابه‌تێن بڤی ره‌نگی یێن هه‌ستیار و چاره‌نڤیسساز، پێدڤی شله‌ژانێ‌ نینن و پتر ئێك ده‌نگیا كوردان بو دڤێت. بتایبه‌ت ئه‌ڤرو ئه‌گه‌ر كورد زێده‌تر ب حه‌كیمانه‌ خوه‌ دگه‌ل بارودوخێ‌ هه‌رێمی بگونجینن و ئه‌و گوهورانكاریێن په‌یدا دبن، سوبه‌هی كوردێن ل پارچا سوریا شیان ده‌ستكه‌فته‌كی په‌یدا بكه‌ن، ئه‌ڤه‌ دێ‌ بیته‌ رێخوشكه‌ره‌ك ب پێنگاڤێن كوردێن ل پارچا توركیا ژی و هوسا ل پارچا ئیرانێ‌ ژی، بویه‌ دڤێت بو پرسێن چاره‌نڤیسساز ئه‌م به‌رژه‌وه‌ندێن حزبایه‌تی و ب عاتیفێ‌ ته‌ماشه‌ نه‌كه‌ین و ئه‌م بو ئێك ده‌نگییا ملله‌تێ‌ كورد بزڤرین و ڤێ‌ ئێك ده‌نگیێ‌ بهێز بێخین.

 

عبدالرحمن بامه‌رنی

 

سه‌رگوتارا كوڤارا چاڤدێر ژماره‌ 115

Previous
Next

Leave a Reply