Skip to Content

Tuesday, December 1st, 2020

په‌یژه‌یه‌کی ڕووت ….دلێر محه‌مه‌د

Be First!
by November 8, 2011 ئەدەب


له‌م دوڕیانه‌ی ڕۆحم ناگه‌م
ئازارێکم له‌ مه‌غریبی که‌لاوه‌یه‌کی خه‌ست مه‌ستا
هانا ده‌به‌م
شوێن پێی ترپه‌کانی دوێنێم بداته‌وه‌
یان گۆرانیه‌کی فڕینم فێر بکا
زوو بگه‌م به‌ به‌تاڵبوون
زوو بگه‌م به‌ کڵاش دڕاوه‌که‌ی ئه‌م حیکایه‌ته‌
ده‌مه‌و کوژانه‌وه‌ی باخچه‌کانم پێ راسپێرێ و
تاراوگه‌یه‌ك له‌من بداته‌وه‌ وه‌رزه‌کان
ده‌بێ که‌ی بتوانم هه‌ناسه‌کانم بنوسمه‌وه‌
که‌ی قاقایه‌کم له‌ دره‌ختێکی بێ سێبه‌ر قه‌تیس که‌م
که‌ی تنۆکی هه‌ر گریانێكم له‌ ئامێزی شه‌ودا ته‌ریو که‌م
که‌ی بتوانم نه‌هێڵم چیتر تریفه‌ به‌سه‌رشانما ڕه‌ت بێ
ڕۆژژمێر له‌ میله‌کانی ته‌مه‌ن بقرتێنم
له‌ شێنه‌یی هه‌ڵوه‌رین تووڕه‌ده‌بم
له‌ تورت بوونی پرته‌قاڵێك ده‌ترسێم
له‌ سڵاوه‌ دووباره‌کانی به‌یانییان ماندووم
له‌ شه‌قامی بێ مردن ….
له‌ وون نه‌بوونی به‌فرو ڕه‌ش بوونی ده‌م و چاوی کتێبه‌کان
تا ده‌گه‌مه‌ هه‌ره‌س نه‌هێنانی هه‌موو ئه‌مانه‌
درۆیه‌کان ماچم ده‌که‌ن و قاته‌که‌م بۆ ئوتو ده‌که‌ن
پێلاوه‌کانم بۆیه‌ ده‌که‌ن و ده‌رگای حه‌وشه‌که‌م بۆ ده‌که‌نه‌وه‌
ئه‌مه‌ ئه‌و وه‌سیه‌ته‌ قێزه‌وه‌نه‌ی ئه‌وڕۆمه‌و
سبه‌ی له‌ یاداشتێکی دوێنێمدا هه‌ڵی ده‌گرم
سبه‌ی به‌ پیاسه‌یه‌کی سه‌رخۆش ده‌ڵێم بم کوژێنه‌وه‌ له‌ناو خۆتا
بمسڕه‌وه‌ له‌ ناو ئێستام و مه‌مده‌وه‌ ده‌ست سه‌ده‌یه‌ك سبه‌ینه‌ی تر ..!!

دلێر محه‌مه‌د

Previous
Next

Leave a Reply