له‌شه‌وێكی ته‌مموزی هه‌ولێردا … حه‌سه‌ن مسته‌فا

1-

  كۆترێك بۆ ئاسمان هه‌ڵده‌ده‌م

تا كه‌ناری رووبارێك بۆ بدۆزێته‌وه‌

به‌پێیه‌ ته‌ڕه‌كانی ده‌زانم

ژیان نه‌مردووه‌و له‌ودیو هه‌ناسه‌ده‌دا.

2-

كێ‌ ده‌لێ‌ به‌زه‌وییه‌وه‌ نه‌فرۆشراوین

خۆ زه‌وی له‌ئێمه‌ به‌نرختره‌

ئه‌و كانگایه‌كی هه‌یه‌ پڕ له‌زێڕ

كانگای ئێمه‌ش پڕه‌ له‌نیشانه‌ی پرسیار.

3- هه‌ولێر

هه‌ناسه‌یه‌ك فریای ئه‌مشاره‌ ناكه‌وێ‌

واخه‌ریكه‌ له‌نێو دووكه‌ڵ‌و گه‌رمایی

چاوه‌كه‌سكه‌كانی لێكده‌نێ‌.

4- 

ده‌مه‌وێ‌ ژیان نه‌دۆڕێنم

كه‌چی

هێند ماسیگرێكی غه‌شیمم

قه‌لاپم بۆ سه‌راب هه‌ڵداوه‌.

16/7/2012                                                                   هه‌ولێر