له‌گۆڕینی ده‌سه‌ڵاته‌وه بۆ گۆڕانی عه‌قڵ…
پێواندنی گۆڕان له‌نێوان ڕێبین هه‌ردی‌و نه‌به‌ز گۆراندا…
“ئێمه هه‌موومان له‌به‌رده‌م هێرشی به‌هاكانداین، ئه‌مڕۆ شه‌ڕ له‌نێوان به‌هاكاندایه، شه‌ڕ له‌سه‌ر سه‌رخستن‌و باڵاده‌ستی به‌هاكانه، به‌داخه‌وه گشتمان قوربانی ئه‌و شه‌ڕه‌ین”.
كریشنا مۆرتی.
سه‌ره‌تای دروستبونی گۆڕان وه‌ك بزوتنه‌وه‌یه‌كی جه‌ماوه‌ری‌و، لێدانی زه‌نگی مه‌ترسی سیاسی‌و، خستنه ڕووی هاوكێشه سیاسی‌و ئابوری‌و ئه‌خلاقییه‌كانی هه‌رێمی كوردستان، ده‌ستپێكی ئه‌و سه‌ره‌تا نوێیه‌بوو كه‌تاكی ناڕازی كورد له‌به‌رامبه‌ر سیسته‌می سیاسی ده‌سه‌ڵاتدا ده‌یوست، مامه‌ڵه‌یه‌كی قوڵی ئه‌قڵانی له‌گه‌ڵدا بكات‌و، له‌چوارچێوه‌یه‌كی سیاسیدا هه‌موو كێشه‌‌و گرفته‌كان چاره‌سه‌ر بكات، ئه‌م بزوتنه‌وه جه‌ماوه‌رییه‌ی كه‌ئه‌مڕۆ له‌نێویدا باس له‌نائومێدی كاره‌كته‌ره‌كانی‌و، هه‌بونی ململانێیی سیاسی‌و، ووردكردنه‌وه‌ی سیاسه‌تی گشتی بۆ كوتله‌‌و، په‌رشكردنی ڕه‌هه‌ند‌و لۆژیكه قوڵه سیاسییه‌كانی ده‌كرێت، مه‌ترسییه‌كی ئه‌وتۆی خستۆته نێو هه‌وادار‌و شوێنكه‌وتوانی ئه‌و بزوتنه‌وه‌یه، به‌جۆرێك كه‌توانیویه‌تی ده‌نگی نائومێدی له‌نێویدا بهێنێته دیاریكردن، كه‌ڕه‌نگه دروستبونی ئه‌و جۆره گوتارانه‌ش بۆخۆی كاریگه‌رییه‌كی ڕیشه‌یی هه‌بێت له‌سه‌ر ده‌نگده‌رانی ئه‌و بزوتنه‌وه‌یه، تائه‌و ڕاده‌یه‌ی كه‌ڕه‌نگه ئه‌و كاریگه‌رییه ببێته هۆكاری دروستبونی نائومێدی زیاتر‌و كشانه‌وه‌‌و پشتتێكردنی هه‌وادار‌و جه‌ماوه‌ری ئه‌و بزوتنه‌وه‌یه، به‌بارێكی دیكه‌دا ڕه‌نگه ئه‌و ده‌نگۆیانه‌ش ببێته هۆكارێك بۆ هه‌نگاونان‌و به‌دواداچونی كاره‌كته‌ری سیاسی‌و به‌رپرسانی ئه‌و بزوتنه‌وه‌یه، تاله‌وڕوانگه‌وه هه‌وڵی چاكسازی‌و تێپه‌ڕاندنی كێشه‌‌و گرفته سیاسییه‌كانی بده‌ن، چونكه ناكرێت ئه‌وه له‌یاد بكه‌ین، تاكی ناڕازی كورد ده‌یوست هێزێكی دیكه‌ی سیاسی بكاته مه‌رجه‌عی خۆی بۆ خستنه گه‌ڕی گه‌مه سیاسییه‌كان، له‌مه‌شه‌وه خه‌ڵكی ده‌یویست ئه‌و بزوتنه‌وه‌یه وه‌ك هیچ یه‌ك له‌هێزه سیاسییه‌كانی دیكه‌ی هه‌رێمی لێ ده‌رنه‌چێت‌و به‌ئاقاری سیاسی ئه‌واندا نه‌ڕوات، به‌ڵام ئه‌وه‌ی كه‌بۆته هۆكاری مشتومڕو جێگه‌ی تێڕامان بۆ چاودێرانی سیاسی‌و ڕۆشنبیر‌و جه‌ماوه‌ری هه‌رێمی كوردستان، له‌ئێستادا ناڕازیبونێك هه‌یه به‌رامبه‌ر به‌و بزوتنه‌وه‌یه له‌چۆنێتی به‌ڕێوه‌چونی كار‌و گوتاری سیاسی، بۆ ئه‌مه‌ش باسكردن له‌هه‌ڵه‌‌و كه‌م‌و كوڕییه‌كانی ئه‌و بزوتنه‌وه‌یه‌‌و، په‌نجه خستنه سه‌ر برینه‌كانی، ئه‌گه‌ر مامه‌ڵه‌یه‌كی ئه‌قڵانی له‌گه‌ڵدا بكرێت، ڕه‌نگه ببێته هۆكارێك بۆ ساڕێژكردنی ئه‌وهه‌ڵانه‌ی كه‌له‌سه‌ر جه‌سته‌ی ئه‌وبزوتنه‌وه‌یه به‌جۆرێك له‌جۆره‌كان دروستبووه‌‌و خه‌ریكه له‌ئێستادا ته‌شه‌نه‌ده‌كات.. له‌مه‌شه‌وه به‌قوڵی ئاستی ئه‌و ته‌شه‌نوجه سیاسییه ده‌بینین، به‌تایبه‌ت له‌هه‌ڵسه‌نگاندنی هه‌ردوو گوتاره‌كه‌ی ڕێبین هه‌ردی‌و نه‌به‌ز گۆران، كه‌له‌ڕوانگه‌ی ئه‌واندا دوو ئاراسته‌ی قوڵ ده‌هێننه نێو گۆڕه‌پانی سیاسی ئه‌و بزوتنه‌وه‌یه، ئاراسته‌ی یه‌كه‌میان كه‌له‌گوتاره‌كه‌ی كاك ڕێبین ده‌رده‌كه‌وێت، ئه‌و ئاماژه سه‌یره‌یه كه‌كاك ڕێبین له‌ڕێگه‌ی ده‌نگه نائومێده‌كانی نێو ئه‌و بزوتنه‌وه‌یه‌وه نیشانمانی ئه‌دات، به‌وه‌ی كه‌تاهه‌نوكه ئه‌و بزوتنه‌وه‌یه نه‌یتوانیوه له‌و دۆخه جه‌مامبونه ده‌ربچێت كه‌چه‌ندین مانگه تێیی كه‌وتووه‌‌و، نه‌یتوانیوه ههنگاو بهرهو پێشه‌وه بنێت، ئه‌مه‌ش ئه‌وه ده‌گه‌یه‌نێت كه‌له‌هه‌ندێك دۆخدا گۆڕان هه‌نگاوی بهرهو دواوه ناوه، ڕونتر ووته‌كانی كاك ڕێبین له‌وه‌دا كورت ده‌بێته‌وه كه‌خه‌ڵكی دڵنیا ده‌كاته‌وه له‌وه‌ی، كه‌له‌نێو ئه‌و بزوتنه‌وه‌یه‌شدا ده‌نگی ناڕازی هه‌یه، ده‌نگێك كه‌نائومێدن به‌رامبه‌ر به‌دۆخی سیاسی‌و به‌ڕێوه‌بردنی ئێستای بزوتنه‌وه‌ی گۆڕان، به‌ڵام ده‌نگێكن ئه‌وه‌نده‌ی هۆكاری شه‌خسییان هه‌یه كه‌گه‌یشتنه به‌ده‌سه‌ڵات، ئه‌وه‌نده هۆكاری گشتییان نییه، هه‌ڵبه‌ته ووته‌كانی كاك ڕێبین له‌پاش شیكردنه‌وه‌ی ململانێ‌‌و جیاكردنه‌وه‌ی ئه‌خلاق له‌سیاسه‌ت له‌تێڕوانینێكی فه‌لسه‌فی‌و سه‌لماندنی ئاسایبونی ململانێ له‌نێو كایه‌ی سیاسه‌تدا دێته سه‌رباسكردنی ئه‌و ده‌نگه نائومێدانه، لێره‌وه كاك ڕێبین چه‌ند جۆره تێڕوانینێكی جیاوازی كاره‌كته‌ری سیاسی نێو ئه‌و بزوتنه‌وه‌یه بۆ خوێنه‌رانی ده‌خاته‌ڕوو، كه‌پتر هه‌موو گه‌مه‌كانی ئه‌و كاره‌كته‌رانه وه‌ك ململانێیی سیاسی كۆ ده‌كاته‌وه‌‌و، ده‌یه‌وێت ئه‌وه‌مان بۆ بسه‌لمێنێت كه‌ده‌نگه نائومێده‌كانی نێو ئه‌و بزوتنه‌وه‌یه ده‌نگێكن هۆكاری شه‌خسییان هه‌یه، نه‌ك هۆكاری سیاسی‌و گوتاری چاكسازییان له‌پشته بۆ ساڕێژكردنی برینه‌كانی ئه‌و بزوتنه‌وه‌یه، به‌بارێكی دیكه‌دا ئه‌م خوێندنه‌وه‌ی كاك ڕێبین پتر ئه‌و ده‌نگانه داده‌بڕێت وه‌ك له‌وه‌ی كه‌بتوانێت ئه‌و ده‌نگانه له‌سه‌ر ته‌وه‌رێكی ڕاسته‌قینه كۆ بكاته‌وه، كه‌ئه‌وه‌ش هه‌ڵه‌یه‌كی كوشنده‌یه كاك ڕێبین ده‌یكات به‌رامبه‌ر به‌و ده‌نگه نائومێدانه‌ی نێو بزوتنه‌وه‌ی گۆڕان، ڕه‌نگه كاك ڕێبین ئه‌وه‌ی له‌یاد كردبێت كه‌سه‌رجه‌م ئه‌و ده‌نگه نائومێدانه‌ی نێو بزوتنه‌وه‌ی گۆڕان، پێكهاته‌ی ئه‌و كه‌سانه‌ن كه‌له‌كایه ڕۆشنبیری‌و یه‌كانه مه‌عریفییه‌كانی ئه‌م نیشتیمانه كارده‌كان، له‌هه‌مانكاتدا كاك ڕێبین ئه‌وه‌ی له‌یادكردوه كه‌ئه‌و كاره‌كته‌رانه‌ی كه‌ئه‌مڕۆ وه‌ك كاره‌كته‌رێكی نائومێد به‌رامبه‌ر به‌وبزوتنه‌وه‌یه هاتونه‌ته ڕه‌خنه‌گرتن هه‌مان ئه‌وكاره‌كته‌رانه‌ن كه‌له‌مه‌وبه‌ر به‌ڕه‌خنه‌‌و تێبینیه‌كانیان به‌رامبه‌ر به‌زلحیزبه‌كانی هه‌رێم ده‌یانویست، هێزێكی جیاواز له‌هه‌موو هێزه سیاسییه‌كانی كوردستان دروستبكه‌ن، له‌مه‌شه‌وه ده‌بێت ده‌رك به‌وه بكه‌ین كه‌ڕه‌نگه نائومێدی ئه‌و ده‌نگانه‌ی نێو بزوتنه‌وه‌ی گۆڕان به‌ته‌نها، هه‌وڵدانبێت بۆ چاكسازیكردن‌و ڕێگریكردن له‌دروستبونی هێزێكی دیكه‌ی سیاسی هاوشێوه‌ی حیزبه‌كانی دیكه، به‌ڵام ناكرێت ئه‌و ده‌نگه نائومێدانه به‌هۆكاری شه‌خسی وه‌سف بكرێت، كه‌ئه‌وه‌ش مافێكی سه‌ره‌تایی ئه‌و كه‌سانه‌یه كه‌ده‌یانه‌وێت لهوڕێچكهیهوه بونیاتی ڕاسته‌قینه‌ی ئه‌وبزوتنه‌وه‌یه بنێن، له‌مه‌شه‌وه هه‌بونی ده‌نگه نائومێده‌كان له‌نێو بزوتنه‌وه‌ی گۆڕاندا، چ ئه‌گه‌ر هۆكاری شه‌خسییان هه‌بێت، یاخود ئه‌گه‌ر هۆكاری گشتی‌و سیاسی، ناكرێت بكرێنه ده‌نگێك بۆ ئه‌وه‌ی وه‌ك كاریگه‌رییه‌كی ڕیشه‌یی له‌سه‌ر بزوتنه‌وه‌ی گۆڕان هه‌ژمار بكرێن‌و ئیدی، ئه‌و ده‌نگانه له‌ده‌ره‌وه‌ی گه‌مه‌كانی بزوتنه‌وه‌ی گۆڕان ڕابگیرێن، به‌ڵام كاتێك كاك ڕیبین ئه‌و ده‌نگانه وه‌ك نه‌شاز ئاماژه پێبدات‌و، ئاراسته‌ی نائومێدییه‌كان له‌گوتاری چاكسازی بزوتنه‌وه‌كه‌وه بگۆڕێت بۆ هه‌بوونی كێشه‌ی شه‌خسی‌و خستنه‌وه‌ی ململانێیی سیاسی بۆ به‌ده‌ستهێنانی كورسی، ئه‌وه كرده‌یه‌كه كه‌بۆ هیچ كات ناتوانرێت ووێنا ڕاسته‌قینه‌كه‌ی ئه‌و بزوتنه‌وه‌یه‌‌و ململانێیی ده‌نگه نائومێده‌كان نیشان بدات.. خۆ ئاراسته‌ی دوهه‌م كه‌له‌گوتاره‌كه‌ی نه‌به‌ز گۆراندا ده‌رده‌كه‌وێت، هه‌مان جه‌مامبوونی گوتاری سیاسی بزوتنه‌وه‌ی گۆڕان نیشانئه‌دات، به‌ڵام به‌شێوه‌یه‌كی دیكه‌‌و له‌سه‌ر چه‌ند ته‌وه‌رێكی دیكه چه‌قبه‌ستنی ئه‌و بزوتنه‌وه‌یه‌مان بۆ ده‌سه‌لمێنێت، نه‌به‌ز پێیی وایه ووێنای نائومێدییه‌كان له‌نێو گۆڕاندا، ئه‌وه‌نده‌ی چاوه‌ڕوانییه ئه‌وه‌نده بێ هیوابوونی ڕیشه‌یی نییه، كێشه‌ی پێواندنی بزوتنه‌وه‌ی گۆڕان لای نه‌به‌ز گۆران له‌سه‌ره‌تای وه‌ڵامه‌كه‌ی بۆ ڕێبین هه‌ردی ده‌ست پێده‌كات، له‌هه‌مانكاتدا ئه‌و پێیی وایه كه‌ئیدی خۆری بزوتنه‌وه‌ی گۆڕان ئاوابووه‌‌و نابێت وه‌ك بزوتنه‌وه ناوی لێبنێین، به‌ڵكو ده‌بێت وه‌ك حیزب ناوی لێبنرێت، چونكه تێڕوانینی ئه‌و بۆ بزوتنه‌وه، هه‌مانئه‌و تێڕامانه‌نییه كه‌بۆ حیزب هه‌یه‌تی، من لێره‌دا ئه‌وه ده‌بینم، ئه‌و كێشه‌یه‌ی نه‌به‌ز گۆران ئه‌وه‌نده‌ی كێشه‌یه‌كی ووشه‌گه‌رییه تێیی كه‌وتووه، ئه‌وه‌نده ڕه‌هه‌ندێكی سیاسی‌و فكری نییه، گۆڕان چ وه‌ك بزوتنه‌وه بانگ بكرێت یاخود وه‌ك حیزب، ئه‌وه هیچ له‌مه‌غزای سیاسی ئه‌و هێزه ناگۆڕێت ئه‌گه‌ر بتوانێت ده‌ستكاری شه‌قامی سیاسی‌و په‌روه‌ده‌ی ئه‌قڵی‌و ڕێكخستنی جه‌ماوه‌ربكات، گۆڕان ئه‌و فراكسیۆنه ئۆپۆزسیۆنه‌ی كه‌له‌هه‌رێم‌و به‌غداد هه‌یه‌تی، ئه‌ركی سه‌ره‌كی چاودێریكردن‌و بزواندن‌و جوڵاندنی شه‌قامه، له‌هه‌موو دونیادا هیچ فراكسیۆنێكی ئۆپۆزسیۆن بونی نییه كه‌هێزێكی بزوتنی جه‌ماوه‌ری ڕێكخراوی له‌پشت نه‌بێت، كه‌واته ئه‌ركی سه‌ره‌كی ئۆپۆزسیۆن له‌ده‌ره‌وه‌ی په‌ڕله‌مان یان له‌نێو شه‌قام، ڕێكخستنی جه‌ماوه‌ره نه‌ك نه‌یاربونی ده‌سه‌ڵات بكرێته ئه‌ركی سه‌ره‌كی ئۆپۆزسیۆن، له‌مه‌شه‌وه گۆڕان ئه‌گه‌ر وه‌ك حیزب بانگ بكرێت یان بزوتنه‌وه، به‌پێیی هیچ لۆژیكێكی سیاسی‌و یاسایی كارێكی نه‌كرده‌‌و (حه‌رام) نییه، ئه‌و كێشه گه‌وره‌یه‌ی كه‌نه‌به‌ز ده‌یبینێت ئه‌وه‌یه، كه‌هه‌موو قورسایی بزوتنه‌وه‌ی گۆڕان له‌وه‌دایه كه‌له‌سه‌ر شانی كاره‌كته‌ره ڕاسته‌قینه‌كه‌یه‌تی كه‌مه‌به‌ستی له(كاك نه‌وشیروان)ه، به‌ڵام ئه‌وه‌ش ناشارێته‌وه كه‌هۆكاری ئه‌و قورساییه‌ی سه‌ر ئه‌و كاره‌كته‌ره ئه‌وه‌یه، (كه‌سه‌ره‌وه‌ی گۆڕان نه‌كراوه به‌سیسته‌م تا خواره‌وه‌ی ئه‌و بزوتنه‌وه‌یه بكرێت به‌حیزب)، هه‌ڵبه‌ته ئه‌م بیركردنه‌وه‌یه بۆخۆی هه‌ڵه‌یه‌كی گه‌وره هه‌ڵده‌گرێت، ئێمه بۆچی هه‌میشه له‌گه‌ڵ دروستبونی هێزێكی سیاسی نوێدا ده‌بێت بیر له‌وه بكه‌ینه‌وه كه‌به‌سیسته‌می هه‌ڕه‌می حیزب‌و گوتاری حیزبی‌و دامه‌زراوه‌یه‌كی حیزبی كار بكه‌ین‌و پێمان وابێت، ئه‌گه‌ر سه‌روه كرا به‌سیسته‌م ئیدی گۆڕان ده‌بێته حیزبێكی مۆدێرنیته، ده‌كرا گۆڕان قورسایی سه‌ر كاره‌كته‌ره سه‌ره‌كییه‌كانی به‌وه سوك بكات، كه‌ئه‌قڵی سیاسی دروست بكات، نه‌ك بیه‌وێت ئه‌قڵییه‌تی حیزبی، كاتێك گۆڕان كه‌نه‌توانێت سه‌ره‌وه بكات به‌سیسته‌م تا ده‌ستكاری خواره‌وه نه‌كات به‌بیانوی ڕێكخستنه‌وه‌ی، ئیدی ده‌بێت لێره‌وه ده‌رك به‌وهه‌ڵه كوشنده‌یه بكه‌ین كه‌گۆڕان نه‌یتوانیوه ئه‌قڵییه‌تی به‌ڕێوه‌بردنی سیاسی دروستبكات، ئه‌قڵییه‌تی سیاسی له‌وه‌دا دروست نابێت كه‌هێزێكی جه‌ماوه‌ری فراوان بكرێت به‌حیزبی‌و لیوایه‌كی قه‌ڵه‌م به‌ده‌ست‌و فه‌یله‌قێكی چه‌كدار‌و كه‌تیبه‌یه‌كی سیخوڕ‌و جه‌یشێكی گه‌وره‌ی موچه‌خۆری حیزبی‌و لایه‌نگر‌و ماستاوچی له‌نێویدا بوونی هه‌بێت، كه‌ئیشی ئه‌وانه هیچ نه‌بێت، به‌ته‌نها گه‌وره‌كردنی ووێنای ئه‌و حیزبه‌‌و به‌رپرسه‌كانی، كارییان هیچ نه‌بێت جگه له‌پوكاندنه‌وه‌ی ئه‌قڵی حیزب‌و گه‌وره‌كردنی ڕۆحی خۆیان له‌سه‌ر گیرفانی خه‌ڵك‌و حیزب، هه‌ڵبه‌ته له‌نێو گۆڕانیشدا خه‌ریكه ئه‌مه ڕوو ئه‌دات وه‌ك چۆن له‌نێو یه‌كێتی‌و پارتی‌و هه‌موو حیزبه‌كانی دیكه‌ی هه‌رێم ڕویداوه، دروستكردنی ئه‌قڵییه‌تی حیزب پێكهاتووه له‌په‌یڕه‌وكردنی مامه‌ڵه‌ی سیاسی، چ له‌ڕێگه‌ی فراكسیۆنی نێو په‌ڕله‌مانه‌‌وه كه‌وه‌ك ئۆپۆزسیۆنێك ده‌بێت به‌پڕۆژه‌ی چاكسازی‌و خزمه‌تگوزاری‌و چاودێریكردنه‌وه ئه‌ركی ئۆپۆزسیۆنبونی خۆی بسه‌لمێنێت، یاخود ده‌بێت له‌ڕێگه‌ی مامه‌ڵه‌كردنییه‌وه وه‌ك هێز‌و بزوتنه‌وه‌‌و حیزبه‌وه بتوانێت هێزی ئۆپۆزسیۆنبونی خۆی بسه‌لمێنێت، كه‌ئه‌وه‌ش پتر له‌دروستكردنی پڕۆژه‌ی سیاسی‌و ئابوری‌و خزمه‌تگوزاری‌و فه‌رهه‌نگییه‌وه ده‌بێت ئه‌و هێزه‌ی بخاته كار كه‌له‌پشتی ئه‌و دوو ئاسته‌وه ده‌توانێت به‌كاریان بهێنێت، ئه‌وه‌ش پێویستی به‌و هێزه‌یه كه‌ده‌توانێت، سود له‌هۆشیاری كه‌مترین مرۆڤی سیاسی‌و ئابوری‌و ئه‌كادیمیست‌و به‌توانست‌و دانسته‌وه وه‌ربگرێت، هه‌ڵبه‌ته ئه‌مه‌ش ده‌بێت پتر ئه‌و مرۆڤانه له‌خۆ بگرێت كه‌كه‌مینه‌یه‌كی پوختن‌و ده‌توانن وه‌ك بزوێنه‌رێكی سیاسی‌و كۆمه‌ڵایه‌تی، له‌نێو ئه‌و ده‌ریاچه سیاسییه‌دا كه‌شتی گۆڕان ببزوێن، كه‌ڕه‌نگه ئه‌وه‌ش كه‌متربن له‌و ڕێژه به‌فه‌یله‌قكراوه جه‌ماوه‌رییه‌ی كه‌خه‌رێكه به‌حیزبی ده‌كرێت، له‌وسۆنگه‌یه‌وه خه‌ڵكی بۆیه گۆڕانی وه‌ك بزوتنه‌وه‌یه‌كی جه‌ماوه‌ری هه‌ڵبژارد، بۆ ئه‌وه‌ی ئه‌قڵییه‌تی سیاسی دروستبكات كه‌بتوانێت، وه‌ك نوێنه‌ری ئه‌و خه‌ڵكه له‌گۆڕه‌پانی سیاسی هه‌رێم، گه‌مه‌ی سیاسیی بكات له‌گه‌ڵ ڕكه‌به‌ره‌كانی كه‌یه‌كێتی‌و پارتیه، نه‌ك گۆڕان بێت‌و به‌خه‌ڵكی بڵێت، ئێوه‌ش وه‌رن ببن به‌گۆڕان‌و منیش مه‌كۆی حیزبی‌و بازاڕی حیزبی‌و ڕۆشنبیری حیزبی‌و ڕێكخراوو ڕۆژنامه‌و میدیای حیزبیتان بۆ دروستده‌كه‌م، هه‌ڵبه‌ته ده‌بێت گۆڕان كار بۆ ئه‌وه بكات‌و بزانێت، كه‌چیتر به‌هێزێكی زۆری سیاسییه‌وه گه‌مه سیاسییه‌كان نابرێته‌وه، به‌ڵكو به‌هێزێكی كه‌میشه‌وه ده‌توانرێت ئه‌و گه‌مانه بگۆڕێته سه‌ر به‌رژه‌وه‌ندی سیاسی خۆی، گۆڕان ده‌یه‌وێت خۆی له‌مه ده‌ربازبكات، به‌ڵام نازانێت به‌چ ڕێگه‌یه‌ك دیته‌وه سه‌رخه‌ت، من له‌گه‌ڵ ئه‌و ووته‌یه‌ی نه‌به‌ز گۆراندا كۆكم كه‌ده‌ڵێت “گوناهێكی گه‌وره‌یه كه‌هێزێكی واهه‌موو ده‌رگاكانی خستبێته سه‌ردوو فراكسیۆن‌و بیه‌وێت بیانكات به‌فریادڕه‌س”. ئه‌و كورتبینی‌و كه‌م بینییه‌ی كه‌له‌نێو گۆڕاندا بوونی هه‌یه‌‌و توشیبووه، ئه‌وه‌یه كه‌گۆڕان ئه‌وه‌نده‌ی سه‌رقاڵی خۆیه‌تی به‌نیوه‌ی ئه‌وه سه‌رقاڵی هاوكاریكردنی دوو فراكسیۆنه‌كه‌ی نییه، ده‌كرێت گۆڕان هێزێكی به‌حیزبیكراوی جه‌ماوه‌ری دروستنه‌كات، به‌ڵام ده‌توانێت له‌ڕێگه‌ی په‌یوه‌ستبونی جه‌ماوه‌ره‌وه به‌فراكسیۆنه‌كانی، ڕوبه‌ری جه‌ماوه‌ری خۆی بهرهو فراوانتر به‌رێت، ئه‌و په‌یوه‌ستبونه‌ش كاتێك دێته ئاراوه كه‌گۆڕان بتوانێت، ئه‌و ئه‌قڵییه‌ته دروستبكات كه‌ده‌توانێت پڕۆژه‌ی یاسایی بخاته نێو په‌ڕله‌مان‌و له‌وێوه بیكاته ده‌روازه‌یه‌ك بۆ خزمه‌تكردنی هاونیشتیمانیان، هه‌ڵبه‌ته فراكسیۆنی گۆڕان له‌نێو په‌ڕله‌مانی هه‌رێم، توانیویه‌تی پڕۆژه یاسا بخاته‌وه، به‌ڵام ئه‌و پڕۆژه یاسایانه كه‌مترین پڕۆژه‌ی كادره سیاسییه‌كانی گۆڕانن‌و زۆرترینیان پڕۆژه‌ی په‌ڕله‌مانتاره‌كانن، ده‌كرێت گۆڕان له‌بری به‌حیزبیكردنی خه‌ڵكی، نوسینگه‌ی ئاماژه (مكتب استشاره) دابمه‌زرێنێت‌و له‌وڕێچكه‌وه، په‌یوه‌ندی جه‌ماوه‌ری به‌و نوسینگه‌وه دروستبكات‌و، پڕۆژه‌ی یاسای‌و خزمه‌تگوزاری له‌جه‌ماوه‌ره‌وه بهرهو په‌ڕله‌مان ههنگاو پێبنێت، له‌هه‌مانكاتدا هه‌ڵه‌یه ئه‌گه‌ر گۆڕان خۆی له‌مامه‌ڵه‌ی سیاسی داببڕێت، ده‌بێت ئه‌وه‌ی ئۆپۆزسیۆنی نێو په‌ڕله‌مان پێیی ناكرێت، بزوتنه‌وه‌ی گۆڕان وه‌ك حیزب له‌ڕێگه‌ی هاوكاریكردنی حكومه‌ته‌وه به‌پڕۆژه یاسای خزمه‌تگوزاری‌و سیاسی ئه‌ركی خۆی به‌جێبهێنێت، لهوڕێچكهیهوه ده‌بێت شه‌قامی جه‌ماوه‌ری لێ ئاگادار بكرێته‌وه، بۆ ئه‌وه‌ش ده‌كرێت گۆڕان سود له‌كه‌می كادری حیزبی وه‌ربگرێت‌و زۆرترین ئه‌قڵی سیاسی ببزوێنێت، له‌مه‌شه‌وه گۆڕان ده‌بێت شه‌قامی جه‌ماوه‌ری ڕێكبخات، كه‌ئه‌وه‌ش به‌شێكه له‌ئه‌ركی ئۆپۆزسیۆنبونی خۆی، كه‌واته ئه‌وه‌ی كه‌ڕێبین‌و نه‌به‌ز ناوی ئۆپۆزسیۆنی مامه‌ڵه‌چی لێده‌نێن، هه‌ڵه‌یه ئه‌گه‌ر پێیان وابێت ئه‌وه كرده‌یه‌كی نائاساییه، ئه‌ركی ئه‌و هێزه‌ی كه‌له‌پشتی ئۆپۆزسیۆنه‌وه بوونی هه‌یه، به‌هێزكردنی گوتاری ئۆپۆزسیۆنه، چ له‌ڕێگای مامه‌ڵه‌كردنیه‌وه وه‌ك هێزێكی سیاسی، یان له‌ڕێگای سه‌پاندنی پڕۆژه‌كانی له‌نێو په‌ڕله‌مان‌و، ده‌توانێت وه‌ك هاوكاری حكومه‌ت پڕۆژه‌ی چاكسازی‌و جه‌ماوه‌ری بخاته‌وه‌‌و له‌هه‌مانكاتدا چاودێربێت بۆ ڕێگریكردنی گه‌نده‌ڵی، ئه‌وه‌ش ئه‌ركی گۆڕینی ده‌سه‌ڵاته كه‌ده‌بێت به‌هه‌موو پێوه‌رێك له‌گۆڕینی ئه‌قڵه‌وه ده‌ستی بۆ ببرێت نه‌ك له‌گۆڕینی كاره‌كته‌ری سیاسی…
زمناكۆ ئیسماعیل
zmnakoplayer@yahoo.com
ٍ
