Skip to Content

Saturday, January 29th, 2022

چنارەكانى خودا

Closed
by August 7, 2008 هۆنراوە

 
 كە، دییم لەوبەرى چەمەوە
 بۆ ئەمبەر دێى،
 وامزانى دەبمە سنورو
 بازێك دەدەى بەسەر چاومــــــــــا..
 ویستم لە فرسەتێكا،
 كۆچێك لە بۆنى پرتەقاڵ و
 هەناسەت بهێنمە ئەمدیو!
 لەو ساتەدا،
 ئەگەر من زەمەن بومایە
 كاتژمێرم رادەگرت!
 ئاوریشمم دەدایە دەمیەك و
 دەمكردە سێبەر بۆ بەژنت،
 تا لەچكەكەت گەرماى نەبىَ..
 
 
 
 
 توێكڵى هەورم دادەماڵیى و
 بە كەمەرى سێپەڕە
 سەكۆم بۆ ماندوێتیت دەچنیى!
 لە جۆگەى چنارەكانى خودا
 نۆرە ئاوى گوڵم دەدزیى و
 دەمكردە سەر پەڵەى لێوت..
 ئەگەر زیندەگیش بومایە!
 فێڵم لە قەدەر دەكردو
 لە جیاتى دونیا،
 تۆم دەخستە ئامێزمەوە…..
 
     1/8/2008
 
 
 

Previous
Next