Skip to Content

Thursday, March 28th, 2024
سه‌دان کێشه‌و یه‌ک چاره‌سه‌ر…هیدایه‌ت مه‌لا عه‌لی

سه‌دان کێشه‌و یه‌ک چاره‌سه‌ر…هیدایه‌ت مه‌لا عه‌لی

Closed
by September 16, 2008 گشتی

 سه‌دان کێشه‌و یه‌ک چاره‌سه‌ر
هیدایه‌ت مه‌لا عه‌لی

 زه‌قبوونه‌وه‌ی کێشه‌کانی نێوان ( ده‌سه‌ڵاتدارانی کوردوستان ) و ( ده‌سه‌ڵاتدارانی به‌غدا ) ڕۆژ به‌ ڕۆژ له‌ په‌ره‌سه‌ندندایه‌ ، ( ماده‌ی 140 ، یاسای هه‌ڵبژاردنی پارێزگاکان ، جه‌له‌ولا ، خانه‌قین ، قه‌ره‌ته‌په‌ ، ده‌ستوور ، بودجه‌ ، ئاڵا ، پێشمه‌رگه‌ ، نه‌وت و گرێبه‌سته‌کان ، سنوور ، هتد  ( یه‌کێتی و پارتی ) ده‌یانه‌وێت به‌ناوی شه‌ڕی ده‌سکه‌وته‌کانی خه‌ڵکی کوردوستانه‌وه‌ ئه‌م قه‌یران و بنبه‌سته‌ سیاسی و کۆمه‌ڵایه‌تیه‌ی خۆیان و هاوپه‌یمانه‌کانیان تێیکه‌وتوون له‌ ( به‌غدا )‌ بیشارنه‌وه‌ ، هه‌لومه‌رجی سیاسی عێراق و هاوپه‌یمانی و ده‌ستوور و فیدراڵیه‌ته‌که‌یان که ‌له‌سه‌ر ئه‌رزی واقیع بوونی نیه‌  وه‌ک جه‌بله‌ی چیمه‌نتۆی شڵه‌قاوی لێهاتووه‌و هه‌ر ناو به‌ناوێک له‌لایه‌که‌وه‌ کونی تێده‌بێت ، ده‌سه‌ڵاتدارانی کوردوستان ( 17 ) ساڵه‌ خه‌ریکی به‌رگرتنن له‌ئیراده‌ی خه‌ڵکی کوردوستان بۆ کۆتایی هێنان به‌م واقیعه‌ته‌ ،( یه‌کێتی و پارتی ) خه‌ریکی جێخستنی پرۆژه‌یه‌کن له‌ ( عێراق )دا که‌ بۆ خه‌ڵکی کوردوستان بێجگه‌ گه‌ڕانه‌وه‌ی سه‌رکووت و پله‌ دووی  شتێکیتر نیه‌‌ ، لکاندنه‌وه‌ی ( کوردوستان ) به‌ ( عێراق ) ه‌وه‌ سه‌لب کردنی ئیراده‌ی خه‌ڵکه‌ بۆ کۆتایی هێنان به‌ سته‌می میللی و پێکهێنانی ده‌وڵه‌تی سه‌ربه‌خۆ ، ( ده‌سه‌ڵاتدارانی کوردوستان ) ژیان و چاره‌نووسی خه‌ڵکی کوردوستانیان کردۆته‌ بارمته‌ی سات و سه‌ودای خۆیان له‌گه‌ڵ ( مالیکی و هاشمی ) و هاوشێوه‌کانیان ، هه‌لومه‌رجێک ئه‌مڕۆ له‌ ( عێراق ) دا به‌ڕیوه‌ ده‌چێت و ( یه‌کێتی و پارتی ) به‌شێکن له‌و هه‌لومه‌رجه‌ بۆ خه‌ڵکی کوردوستان به‌قیمه‌تی دیار نه‌بوونی چاره‌نووسی سیاسی و ئاینده‌ی ئینسانه‌کان و ئه‌گه‌ری هه‌ڵگیرسانی هه‌ر ڕۆژه‌ی شه‌ڕێکی ماڵوێرانکه‌ره‌ ، ئه‌بێت تاکه‌ی خه‌ڵکی کوردوستان چاوه‌ڕوانی ئه‌وه‌بێت که‌ له‌ ( خانه‌قین ) شه‌ڕ ده‌بێت یان نا ، له‌شکره‌که‌ی ( مالکی ) وه‌ک له‌شکری ( به‌عس ) ئه‌نفال ده‌کاته‌وه‌ یان نا ، سوپا هه‌قی ئه‌وه‌ی هه‌یه‌ هه‌موو کوردوستان بگه‌ڕێت یان نا ، تاکه‌ی مه‌سافه‌ی نێوان ڕوودانی شه‌ڕ یان ڕوونه‌دانی ( 50 ) مه‌تر بێت ،  ئه‌مه‌ چ حکوومه‌ت و ده‌سه‌ڵات و ئینسانه‌تێکه‌ له‌ ( عێراق ) پێکدێته‌وه‌ و ( ده‌سه‌ڵاتدارانی کوردوستان ) گۆرانی به‌ شان و باڵایاندا هه‌ڵده‌ده‌ن ، ئه‌وانه‌ی ( یه‌کێتی و پارتی ) وه‌ک په‌پووله‌و دۆستی خه‌ڵکی کوردوستان  پیشانیان ده‌دان و شاره‌و شار ده‌یانگێڕان و خه‌ڵکیان بۆ کۆده‌کردنه‌وه‌ ( عه‌بدولعه‌زیز حه‌کیم ) وه‌ک نموونه‌  ئێستا چۆن بوونه‌ته‌ سه‌رچاوه‌ی گه‌وره‌ترین مه‌ترسی بۆ خه‌ڵکی کوردوستان ، ( عه‌دنان موفتی ) سه‌رۆکی ( په‌رله‌مانی کوردوستان ) داوا ده‌کات له‌ ( ئه‌مه‌ریکا ) که‌ به‌ مه‌رج‌ چه‌ک بفرۆشێت به‌ ( حکوومه‌تی عێراق ) تا نه‌توانن به‌رانبه‌ر خه‌ڵکی کوردوستان به‌کاری بهێنن ، ( دکتۆر سه‌عدی به‌رزنجی ) جێگیری سه‌رۆکی لیستی هاوپه‌یمانی ده‌ڵێت( بڕگه‌ی 2ی ماده‌ی 23 )ی ڕێکه‌وتنه‌ ئه‌منییه‌که خه‌ته‌رێکی زۆر گه‌وره‌یه‌ بۆ سه‌ر ئاسایشی نه‌ته‌وه‌ی کورد ‌) مه‌به‌ست ڕێکه‌وتنی ئه‌منی ( عێرا ق و ئه‌مه‌ریکا ) یه‌ ، ( دکتۆر سه‌عدی ) ترسی له‌ دووباره‌بوونه‌وه‌ی ڕێکه‌وتنامه‌ی ( جه‌زائیری ساڵی 1975 )ه‌ ، باشه‌ ئه‌مه‌ چ واقیعه‌تێکه‌ ئه‌م ده‌سه‌ڵاتدارانه‌ی کوردوستان کاری پێده‌که‌ن و خه‌ڵکی پێفریوو ده‌ده‌ن ، ئه‌گه‌ر ده‌سه‌ڵاتی ( ناوه‌ند ) ئه‌وه‌نده‌ ترسناکه‌ بۆ له‌سه‌ر سینیه‌کی زێڕین به‌ ده‌ست و قاچی به‌سراوه‌وه‌ خه‌ڵکی کوردوستانتان برده‌وه‌ به‌ر ده‌ستیان ، بۆچی ڕاگه‌یاندنه‌کانتان کردبوویه‌ مه‌یدانی خۆشباوه‌ڕی و په‌رده‌پۆش کردنی دۆزه‌خێک که‌ بۆ خه‌ڵکی کوردوستان به‌ڕێوه‌یه‌ ؟ ، بۆچی ته‌نها بۆ بردنی به‌شی خۆتان له‌ سه‌روه‌ت و سامانی ( عێراق ) چاره‌نووسی خه‌ڵکی کوردوستان له‌ نێو ئه‌گه‌ره‌کاندا ڕاده‌گرن ؟ ، بۆچی ئه‌تانه‌وێت به‌ نووشتانه‌وه‌ له‌به‌رده‌م ( سیستانی ) دا به‌خه‌ڵکی کوردوستان بڵێن کێشه‌کانتان چاره‌سه‌ر ده‌بێت ؟ ، ( یه‌کێتی و پارتی ) زۆر ڕێگایان به‌خه‌ڵکی کوردوستان تاقیکرده‌وه‌ به‌ڵام هیچ یه‌کێک له‌ ڕێگاکان نه‌یانتوانی کۆتایی به‌ سته‌می میللی له‌سه‌ر خه‌ڵکی کوردوستان بهێنێت ، به‌پێچه‌وانه‌وه‌ ڕۆژ به‌ ڕۆژ چه‌وساندنه‌وه ‌و پله‌ دووی خه‌ڵکی کوردوستان سه‌ختر و ده‌سه‌ڵات و سه‌روه‌ت و سامانی ( یه‌کێتی و پارتی ) زیاتر بووه‌ ، خه‌ڵکی کوردوستان بۆ کۆتایی هێنان به‌م هه‌ڕه‌شه‌و ئه‌گه‌ره‌ نادیارانه‌ ، بۆ ڕوونه‌دانه‌وه‌ی ئه‌نفال ، کیمیاباران ، ئاواره‌بوون ، چه‌وساندنه‌وه‌ ، پله‌ دووی ، پێوویستی به‌ ئیراده‌ نواندن و بڕیاری سیاسی هه‌یه‌ ، پێوویستی به‌ دیاری کردنی چاره‌نووسی سیاسی کوردوستان هه‌یه‌ ، خه‌ڵکی کوردوستان پێوویستی به‌ جیاکردنه‌وه‌ی ڕیزه‌کانی خۆی هه‌یه‌ له‌ڕیزی ئه‌م ده‌سه‌ڵاتدارانه‌ ، پێوویستی به‌ ده‌رهێنانی چاره‌نووسی خۆیه‌تی له‌ نێو ئه‌و هاوکێشه‌ ئاڵۆز و نائینسانیه‌یه‌ی له‌ ( عێراق ) دا به‌ڕێوه‌یه‌ ، خه‌ڵکی کوردوستان پێوویستیان به‌ بڕیاری ( جیاکردنه‌وه‌ی کوردوستان ) و پێکهێنانی ده‌ووڵه‌تی سه‌ربه‌خۆی غه‌یره‌ قه‌ومی و غه‌یره‌ مه‌زهه‌بی خۆیانه‌ ، ئه‌مه‌ ته‌نها ڕێگاو چاره‌سه‌ره .                        
 
 

Previous
Next
This site is registered on wpml.org as a development site.