وه‌ریانــا به‌لـگان …..عبدالرحمن بامه‌رنی
وه‌ریانــا به‌لـگان
عبدالرحمن بامه‌رنی دهوك
Bamerni77@yahoo.comده‌م هات
ئه‌ز و شیعر و شێتاتی
روژیێن خوه بشكێنین و ل تاڤه هه‌یڤه‌كا دی
بگه‌رین
با، ڤان جوره په‌یڤان رامالیت و
ل بلنداهیه‌كا دی
خه‌ون و نڤێژێن حاجی ره‌شكان
بهێنه قه‌زاكرن!
مه نه‌دیت دوكێله‌ك ژ شعره‌كا مه بلند بوی
یان دناڤ پێكه‌نینه‌كێ دا به‌رزه‌بویم و
د خریقێن چویم
هێژ سیڤاندوك، یێ یاریا ب په‌نجه‌را مه دكه‌ن
هێژ خدرویێ
ل جاده‌یێن دهوكێ به‌رزه‌یه و
نیڤه‌ك له‌شێ وی رویس دكه‌ت
هێژ شه‌ڤ وه‌ك هه‌ر شه‌ڤه و
با، هه‌میان بێده‌نگ دكه‌ت
زارو دنڤن
گول بێهنێن خوه دنخێڤن
چنارێن بلند سیبه‌رێ ناده‌ن
ئه‌و باخچه‌یێ هه‌ر ژ كون سپێدێ و تا ئێڤاری
لێ حه‌شامه‌ت
ئه‌و جاده‌یێن پیاسه لێ دهاتنه كرن
ئه‌و تاڤه روژا، هه‌میا رادكه‌ته پیا و
مایه ڤه بێ پێژن
دكه‌ڤمه دنیڤا لاپه‌ران دا و
شه‌ری دگه‌ل بێ بێده‌نگیێ دكه‌م
ئه‌ز و شه‌ڤ
دناڤ باخچه‌یێن بێ به‌لگ و
دناڤ گولێن بێ ره‌نگ دا
من ده‌ست ژ نڤیسینێ به‌ردا و
دێ دتابلویه‌كی دا كاركه‌م!
دتابلوی دا
پایزێن بێ به‌لگ كه‌مه رویساتی
هه‌میا ژنێزیك بینم
عه‌ورا و هه‌كو بارانێ ژ خوه دا دقوتن
یان بلبلا هه‌كو پروڤا دكه‌ن و
یێ ژ هه‌میا ده‌نگ تویژ تر
ناڤێ وی بو كبارێ دنڤیسن
چه‌ند جوانه گهورینا نامان دگه‌ل ته
یان ژڤانێ ئێكێ
ل ناڤ هه‌لزا گوندێ لێ ژ دایك بویم
هه‌كو ته ترانێن خوه ب شویماتیا من دكرن
تو د بویه ئاقارێ شه‌رمێ و دناڤ خوه‌دا به‌رزه‌دكرم..
هه‌ر ژ ئاقارێ شه‌رمێ
دێ نڤیسینێن خوه د تابلوی دا ره‌نگ كه‌م
تابلوی كه‌مه موزه‌خانه و
ته تێدا كه‌مه په‌یكه‌ر
ناهێلم خدر و
جاره‌كا دی ب بیته پێترانكێ هه‌ڤركیێ
یان چه‌ند حاجی ره‌شكه‌ك نكلێ خوه د مه‌ی
ب هه‌لینیت
جوته‌كێ سنه‌تا قه‌زا بكه‌ت
ئه‌ز ره‌نگێ ره‌ش دتابلوی دا بكار نا ئینم..
چ سه‌مفونیه‌كا بێده‌نگه و
چ یا ب شه‌رم!
دچیته دخه‌ونا ئه‌وێن بیر دكه‌ن
موسیقاژه‌ن، یێ بێ چاره‌نڤیسه و
ل سه‌ر ده‌پێن شانوێ
سه‌مفونیا وی نه‌هاته نمایشكرن
هێژ چه‌پله بو نه‌هاتینه لێدان!
ده‌مه‌كه و من پیاسێن ئێڤاریان ژبیركرین
من گوت: به‌رپه‌رێن پیاسان نه ڤه‌كه‌ن؟
پیاسێن پایزان د كورتن
به‌لگێن وه‌ریای زوی خرڤه نابن
تو چ ژ خو كوشتنا به‌لاتینكان دزانی
ته، ستران بو بێده‌نگیێ نه گوتینه
هێژ تو یێ د وه‌رزێ وه‌ریانا به‌لگان دا
بێده‌نگیا د دویف ته را دخشیێت
ته نه لبیره
ده‌نگ ژ بێده‌نگیێ نا هێت!!
ژ دویر
ژ دویر دیمه‌نێ وه‌ریانا به‌لگان جوانه
هێژ تابلویێ بێ پێناسه یه
هێژ سه‌رخورانا ره‌نگا یه
هێژ ئه‌زێ دگه‌رم
ل ده‌مه‌كێ دی، زه‌مه‌نه‌كێ دی و ئێڤاریه‌كا دی
هێژ سه‌مفونیا بێده‌نگه و شانو نه هاتیه نمایشكرن
وه‌رزێ وه‌ریانا به‌لگانه و
من، ژ دویر دیمه‌نێ وه‌ریانا به‌لگان
پێ خوشه
پایز ب وه‌ریانا به‌لگان بێ نڤێژ نابن..تێبینی:
نه پایز وه‌ریانا به‌لگان دهێلیت و نه ئه‌ز ده‌ست ژ نڤیسینا شیعران به‌ر د ده‌م.. ئیمزا هوزانڤان
