شانۆگه‌ری ڕه‌ش و سپی

شانۆگه‌ری
ڕه‌ش و سپی

نوسینی : هاڕۆڵد پینته‌ر
وه‌رگێڕانی له‌ ئینگلیزییه‌وه‌ : عه‌بدوڵا سڵێمان(مه‌شخه‌ڵ)

پیرێژنی یه‌که‌م له‌سه‌ر مێزێکی باڕی ڕێستۆرانته‌که‌‌ داده‌نیشێت. بچکۆلانه‌یه‌. پیرێژنی دووه‌م نزیک ده‌بێته‌وه‌. باڵا به‌رزه‌. دوو قاپ شۆربای به‌ده‌سته‌وه‌یه‌ که‌ سه‌ری هه‌ر یه‌که‌شیانی به‌ قاپێک داپۆشیوه‌ و هه‌ر قاپێکیش له‌ته‌ نانێکی له‌سه‌ره‌.قاپه‌کان له‌سه‌ره‌خۆ له‌سه‌ر مێزه‌که‌ داده‌نێت.

پیرێژنی دووه‌م : ئه‌و پیاوه‌ ده‌بینی هات و لای که‌وه‌نته‌ره‌که‌وه‌ که‌وته‌ قسه‌کردن له‌گه‌ڵمدا.[قاپی سه‌ر شۆرباکان لا ده‌بات و دوو که‌وچک له‌گیرفانی ده‌رده‌هێنێ و ده‌یخاته‌ نێو قاپه‌کانه‌وه‌.]

پیرێژنی یه‌که‌م : ئێ باشه‌ نانیشت هێناوه‌؟

پیرێژنی دووه‌م : نه‌مده‌زانی چۆنیان هه‌ڵبگرم،تا قاپه‌کانم سه‌ربه‌ره‌وخوار خستنه‌ سه‌ر شۆرباکان.

پیرێژنی یه‌که‌م : له‌گه‌ڵ شۆرباکه‌م حه‌زم له‌ تۆزێک نانه‌.
[ ده‌ست ده‌که‌ن به‌ شۆربا خواردن. وچانێک.]

پیرێژنی دووه‌م : ئه‌وه‌ت بینی که‌ هات بۆ لام و لای که‌وه‌نته‌ره‌که‌ که‌وته‌ قسه‌کردن له‌گه‌ڵما.

پیرێژنی یه‌که‌م : کێ؟

پیر‌ێژنی دووه‌م : هاته‌ لام گوتی سڵاو.ئینجا گوتی لای تۆ سه‌عات چه‌نده‌؟ چه‌ند چاو قایم بوو.من له‌وێ وه‌ستابووم شۆرباکه‌ت وه‌ربگرم.

پیرێژنی یه‌که‌م : ئه‌وه‌ شۆربای ته‌ماته‌یه‌.

پیرێژنی دووه‌م : پرسی لای تۆ سه‌عات چه‌نده‌؟

پیرێژنی یه‌که‌م : دڵنیام وه‌ڵامت داوه‌ته‌وه‌.

پیرێژنی دووه‌م : پێمگوت گوێبگره‌.هه‌ر بۆ خۆت بڵێ.گوتم بۆچی ناگه‌ڕێیته‌وه‌ بۆ که‌لاوه‌که‌ت و له‌سه‌ر ده‌ق و مۆری خۆت دابنیشی پێش ئه‌وه‌ی ته‌له‌فۆنی پۆلیس بکه‌م.[وچانێک.]

پیرێژنی یه‌که‌م : زۆرم پێناچێت بێم بۆ ئێره‌.

پیرێژنی دووه‌م :  به‌ پاسی ئۆڵ-نایت نه‌هاتیت بۆ ئێره‌؟

پیرێژنی یه‌که‌م : یه‌کسه‌ر به‌ پاسی ئۆل-نایت هاتم بۆ ئێره‌.

پیرێژنی دووه‌م : له‌ کوێوه‌؟

پیرێژنی یه‌که‌م : له‌ ماربڵ ئارکه‌وه‌.

پیرێژنی دووه‌م : کامه‌یان؟

پیرێژنی یه‌که‌م : به‌ پاسی دووسه‌د و نه‌وه‌د و چوار که‌ ڕاسته‌وڕاست ده‌مبات بۆ شه‌قامی فلییت.

پیرێژنی دووه‌م : پاسی دووسه‌د و نه‌وه‌د و ئه‌کیش ده‌ڕوات بۆ ئه‌وێ.[وچانێک.] که‌ هاتمه‌ ژووره‌وه‌ بینیتم له‌گه‌ڵ دوو غه‌ریبه‌دا قسه‌ت ده‌کرد. تۆ ده‌بێ واز له‌قسه‌کردن بێنی له‌گه‌ڵ خه‌ڵکیدا.کۆنه‌ په‌تووێکی وه‌کو تۆ ده‌زانێ‌ قسه‌ له‌گه‌ڵ کێدا ده‌کات.

پیرێژنی یه‌که‌م : له‌گه‌ڵ هیچ غه‌ریبه‌یه‌ک قسه‌م نه‌کردووه‌.[وچانێک. پیرێژنی یه‌که‌م له‌په‌نجه‌ره‌که‌وه‌ سه‌رنجی خه‌تی پاسه‌که‌ ده‌دات.] ئه‌وه‌ ئۆڵ-نایتێکی تره‌ به‌ره‌و خواره‌وه‌ ڕۆیشت.[وچانێک.] ده‌چێته‌ سه‌ر شه‌قامێکی تر،شه‌قامی فولهام.[وچانێک.] پاسی دووسه‌د و نه‌وه‌د و حه‌وت بوو.[وچانێک.] من قه‌ت به‌و خه‌ته‌دا نه‌ڕۆیشتووم.[وچانێک.] هه‌ر به‌ره‌و خوار بۆ شه‌قامی لیڤه‌رپوڵ چوومه‌.

پیرێژنی دووه‌م : ئه‌وه‌ خه‌تێکی تره‌.

پیرێژنی یه‌که‌م : پێم خۆش نییه‌ بڕۆمه‌ شه‌‌قامی فولهام و ئه‌و شوێنانه‌.

پیرێژنی دووه‌م : ئه..‌ها.

پیرێژنی یه‌که‌م : من قه‌د حه‌زم به‌و ئاراسته‌یه‌ نه‌بووه‌.[وچانێک.]

پیرێژنی دووه‌م : نانه‌که‌ت چۆنه‌؟[وچانێک.]

پیرێژنی یه‌که‌م : ها؟

پیرێژنی دووه‌م : نانه‌که‌ت ئه‌ڵێم؟

پیرێژنی یه‌که‌م : خراپ نییه‌.ئه‌ی ئه‌وه‌ی تۆ؟[وچانێک.]

پیرێژنی دووه‌م : پاره‌ی نانه‌که‌ت لێناسه‌نن گه‌ر شۆربا بکڕیت.

پیرێژنی یه‌که‌م : به‌ڵام گه‌ر چا بکڕیت لێتده‌ستێنن.

پیرێژنی دووه‌م : ئه‌گه‌ر چا بکڕیت پاره‌ی نانه‌که‌ت لێده‌ستێنن.[وچانێک.]تۆ قسه‌ له‌گه‌ڵ غه‌ریبه‌ ده‌که‌یت و ئه‌وانیش ده‌تبه‌ن.ئه‌م قسه‌یه‌ت له‌بیر بێت.پۆلیس ده‌تبات.

پیرێژنی یه‌که‌م : له‌گه‌ڵ غه‌ریبه‌ قسه‌ ناکه‌م.

پیرێژنی دووه‌م : جارێکیان منیان به‌ ئۆتۆمبێلێکی واگۆن برد.

پیرێژنی یه‌که‌م : خۆ گلیان نه‌دایته‌وه‌.

پیرێژنی دووه‌م : گلیان نه‌دامه‌وه‌.به‌ڵام ته‌نها له‌به‌ر ئه‌وه‌ی پێیان خۆش بوو بمخه‌نه‌ نێو واگنه‌که‌وه‌ و پیاسه‌یه‌کم پێبکه‌ن.

پیرێژنی یه‌که‌م : له‌وبڕوایه‌دای حه‌ز بکه‌ن من ببه‌ن؟

پیرێژنی دووه‌م : نازانم.

[ پیرێژنی یه‌که‌م له‌په‌نجه‌ره‌که‌وه‌ سه‌یری ده‌ڕوانێته‌ ده‌رێ.]

پیرێژنی یه‌که‌م : ده‌توانی بزانی که‌چی له‌سه‌ر ئه‌و مێزه‌ی لای سه‌ره‌وه‌‌ ڕوو ده‌دات.[وچانێک.] به‌هه‌رحاڵ باشتره‌ له‌وه‌ی بچیته‌ خوارێ بۆ ئه‌و شوێنه‌ی لای به‌ربه‌سته‌که‌‌.

پیرێژنی دووه‌م : به‌ڵێ، زۆر ده‌نگه‌ ده‌نگی لێ نییه‌.

پیرێژنی یه‌که‌م : هه‌میشه‌ تۆزێک ده‌نگه‌ ده‌نگی لێیه‌.

پیرێژنی دووه‌م : بای دێ له‌ده‌ره‌وه‌.[وچانێک.]

پیرێژنی یه‌که‌م : لام ئاساییه‌ بمێنمه‌وه‌.

پیرێژنی دووه‌م : به‌ڵام لێت ناگه‌ڕێن.

پیرێژنی یه‌که‌م : ئه‌زانم.[وچانێک.] سه‌عات و نیوێکی تر دایده‌خه‌ن،وا نییه‌؟[وچانێک.]زۆر نییه‌.[وچانێک.] ئه‌توانی بڕۆیت و دوایی بگه‌ڕێیته‌وه‌.

پیرێژنی دووه‌م : من ئه‌ڕۆم.به‌س ناگه‌ڕێمه‌وه‌.

پیرێژنی یه‌که‌م : که‌ دونیا ڕوناک بۆوه‌ دێمه‌وه‌.چاکه‌م بخۆره‌وه‌.

پیرێژنی دووه‌م : من ئه‌ڕۆم.ئه‌ڕۆم به‌ره‌و لای سه‌ره‌وه‌ بۆ گاردن.

پیرێژنی یه‌که‌م : من ناچمه‌ ئه‌و خواره‌وه‌‌.[وچانێک.]ئه‌ڕۆم بۆ سه‌ره‌وه‌ بۆ پردی واته‌رلوو.

پیرێژنی دووه‌م : هه‌ر ئێستا دوا پاسی دووسه‌د و نه‌وه‌د و شه‌ش ده‌بینی به‌سه‌ر ڕووباره‌که‌وه‌ دێت به‌ره‌و ئێره‌.

پیرێژنی یه‌که‌م : منیش هه‌ر ته‌ماشا ده‌که‌م ئێستا وه‌ختییه‌تی.له‌وه‌یه‌ بچمه‌ ده‌رێ.[وچانێک.] ئه‌م پاسه‌ له‌ پاسی ئۆل-نایت ناچێت که‌له‌ڕۆژدا ده‌یبینین.وا نییه‌؟

1959

ته‌واو

سه‌رچاوه‌ :

The Norton Introduction to Literature
Carl E. Bain
Jerome Beaty
L. Paul Hunter
Shorter sixth edition
United States of America        1995           Pages 868-869