وەریانــا بەلـگان ….. عبدالرحمن بامەرنى
دەم هات
ئەز و شیعر و شێتاتى
روژیێن خوە بشکێنین و ل تاڤە هەیڤەکا دى
بگەرین
با، ڤان جورە پەیڤان رامالیت و
ل بلنداهیەکا دى
خەون و نڤێژێن حاجى رەشکان
بهێنە قەزاکرن!
مە نەدیت دوکێلەک ژ شعرەکا مە بلند بوى
یان دناڤ پێکەنینەکێ دا بەرزەبویم و
د خریقێن چویم
هێژ سیڤاندوک، یێ یاریا ب پەنجەرا مە دکەن
هێژ خدرویێ
ل جادەیێن دهوکێ بەرزەیە و
نیڤەک لەشێ وى رویس دکەت
هێژ شەڤ وەک هەر شەڤە و
با، هەمیان بێدەنگ دکەت
زارو دنڤن
گول بێهنێن خوە دنخێڤن
چنارێن بلند سیبەرێ نادەن
ئەو باخچەیێ هەر ژ کون سپێدێ و تا ئێڤارى
لێ حەشامەت
ئەو جادەیێن پیاسە لێ دهاتنە کرن
ئەو تاڤە روژا، هەمیا رادکەتە پیا و
مایە ڤە بێ پێژن
دکەڤمە دنیڤا لاپەران دا و
شەرى دگەل بێ بێدەنگیێ دکەم
ئەز و شەڤ
دناڤ باخچەیێن بێ بەلگ و
دناڤ گولێن بێ رەنگ دا
من دەست ژ نڤیسینێ بەردا و
دێ دتابلویەکى دا کارکەم!
دتابلوى دا
پایزێن بێ بەلگ کەمە رویساتى
هەمیا ژنێزیک بینم
عەورا و هەکو بارانێ ژ خوە دا دقوتن
یان بلبلا هەکو پروڤا دکەن و
یێ ژ هەمیا دەنگ تویژ تر
ناڤێ وى بو کبارێ دنڤیسن
چەند جوانە گهورینا نامان دگەل تە
یان ژڤانێ ئێکێ
ل ناڤ هەلزا گوندێ لێ ژ دایک بویم
هەکو تە ترانێن خوە ب شویماتیا من دکرن
تو د بویە ئاقارێ شەرمێ و دناڤ خوەدا بەرزەدکرم..
هەر ژ ئاقارێ شەرمێ
دێ نڤیسینێن خوە د تابلوى دا رەنگ کەم
تابلوى کەمە موزەخانە و
تە تێدا کەمە پەیکەر
ناهێلم خدر و
جارەکا دى ب بیتە پێترانکێ هەڤرکیێ
یان چەند حاجى رەشکەک نکلێ خوە د مەى
ب هەلینیت
جوتەکێ سنەتا قەزا بکەت
ئەز رەنگێ رەش دتابلوى دا بکار نا ئینم..
چ سەمفونیەکا بێدەنگە و
چ یا ب شەرم!
دچیتە دخەونا ئەوێن بیر دکەن
موسیقاژەن، یێ بێ چارەنڤیسە و
ل سەر دەپێن شانوێ
سەمفونیا وى نەهاتە نمایشکرن
هێژ چەپلە بو نەهاتینە لێدان!
دەمەکە و من پیاسێن ئێڤاریان ژبیرکرین
من گوت: بەرپەرێن پیاسان نە ڤەکەن؟
پیاسێن پایزان د کورتن
بەلگێن وەریاى زوى خرڤە نابن
تو چ ژ خو کوشتنا بەلاتینکان دزانى
تە، ستران بو بێدەنگیێ نە گوتینە
هێژ تو یێ د وەرزێ وەریانا بەلگان دا
بێدەنگیا د دویف تە را دخشیێت
تە نە لبیرە
دەنگ ژ بێدەنگیێ نا هێت!!
ژ دویر
ژ دویر دیمەنێ وەریانا بەلگان جوانە
هێژ تابلویێ بێ پێناسە یە
هێژ سەرخورانا رەنگا یە
هێژ ئەزێ دگەرم
ل دەمەکێ دى، زەمەنەکێ دى و ئێڤاریەکا دى
هێژ سەمفونیا بێدەنگە و شانو نە هاتیە نمایشکرن
وەرزێ وەریانا بەلگانە و
من، ژ دویر دیمەنێ وەریانا بەلگان
پێ خوشە
پایز ب وەریانا بەلگان بێ نڤێژ نابن..تێبینى:
نە پایز وەریانا بەلگان دهێلیت و نە ئەز دەست ژ نڤیسینا شیعران بەر د دەم.. ئیمزا هوزانڤان
