Skip to Content

Saturday, July 13th, 2024
له‌چله‌ی ماته‌مینیتا,چل هه‌زارگوڵ بۆڕوحی پاكت(حه‌مه‌جه‌زا)ی مه‌زن …..

له‌چله‌ی ماته‌مینیتا,چل هه‌زارگوڵ بۆڕوحی پاكت(حه‌مه‌جه‌زا)ی مه‌زن …..

Closed
by November 8, 2010 گشتی

له‌چله‌ی ماته‌مینیتا,چل هه‌زارگوڵ بۆڕوحی پاكت(حه‌مه‌جه‌زا)ی مه‌زن,ئه‌وهونه‌رمه‌نده‌ی فێری خۆشه‌ویستی نیشتیمانت كردم!

ئه‌و به‌رله‌هه‌رشت پێشمه‌رگه‌بوو, ئه‌و به‌رله‌وه‌ی هونه‌رمه‌ند بێت ئینتیمای بۆخاك وسه‌روه‌ری دایكی شه‌هیدو ڕوسوری خوشكی شه‌هید بوو, ئه‌وخه‌می گه‌وره‌ی ئازادبونی نیشتیمان بوو, ئه‌و به‌ڕاستی هونه‌رمه‌ندبوو!, پێشمه‌رگه‌بوو!, مرۆڤێكی كوردپه‌روه‌رخودان هه‌ڵوێست وخاك په‌رست وسونبولێكی مه‌زنی كوردبوون وكوردایه‌تی بوو!.
ئه‌وله‌ڕۆژگارێكی پڕوه‌هم وشه‌وگارێكی كابوسستان, ووشه‌ی شیرینی پێشمه‌رگه‌و ناوی پیرۆزی شه‌هیدو ژووانی شه‌وانی كه‌ژاڵ وچێژی باده‌و بوكی ئازادی ووڵاتی فێری كوڕوكچانی خوێنگه‌رمی نیشتیمان ده‌كرد.
ئه‌گه‌رچی زوبو به‌جێمان بێڵیت وماڵئاوای یه‌كجاریمان لێبكه‌یت, هێشتا زۆرمابوو بۆئه‌م كۆچه‌ ناواده‌ت ,چونكه‌ سه‌روه‌رم ئێستا له‌هه‌رده‌م زیاتر پێویستمان پێت بوو بۆخزمه‌تكردنی زیاتری ئه‌وهونه‌ره‌ بێخاوه‌نه‌ی كه‌هه‌ر ڕۆژه‌و نه‌زانێك دێت به‌ناوی پێشكه‌وتن خوازیه‌وه‌ كلكێكی تێوه‌رده‌دات!, به‌ڵێ‌ ئه‌و هونه‌ره‌ی كه‌ ده‌ناڵێنیت به‌ده‌ست ووشه‌ سێكسیه‌كانی (وه‌یش! وه‌ی! ئۆو! واو! ئۆف!)وه‌.
ئه‌ی هونه‌رمه‌نده‌ مه‌زنه‌كه‌, ئه‌ی ئه‌و مامۆستایه‌ی تامردن شانازیت پێوه‌ده‌كه‌م كه‌له‌ته‌مه‌نی منداڵیمدا وشه‌ی شیرینی پێشمه‌رگه‌و خۆشه‌ویستی نیشتیمانت فێركردم.
زۆرمنداڵ بووم وه‌ك ئه‌و مه‌نتقه‌ی ئه‌مڕۆ پیاوه‌كانی ده‌سه‌ڵات پێمان ده‌ڵێن منداڵ وساویلكه‌!, وه‌ك ئه‌و منداڵه‌ چه‌تونانه‌ی كه‌ئه‌مڕۆ درك به‌خیانه‌ته‌ یه‌ك له‌دوای یه‌كه‌كانی ڕابردوی سه‌رۆك و سه‌دان فه‌زیحه‌ی ئه‌م ده‌سه‌ڵاته‌ گه‌نده‌ڵو, تۆتالیتاره‌ ده‌كه‌ن!.
به‌ڵێ ئازیزم زۆرباش له‌یادمه‌ وه‌ك به‌شێك له‌و خیانه‌تانه‌ی كه‌سیاسیه‌كانی ووڵات به‌به‌رچاوی من وگشت منداڵانی سه‌رده‌می منداڵیم كردیان و تائه‌م ساته‌ش شانازی پێوه‌ده‌كه‌ن, زۆرباش له‌یادمه‌ وه‌ك هاواره‌ نامۆكانی جه‌سته‌ی نیشتیمان له‌واده‌ی شه‌ڕی براكوژیدا, وه‌ك سه‌ره‌تای ئه‌وسه‌رده‌مه‌ی كه‌ لافاوی كۆچی گه‌نجانی وڵاته‌كه‌م ده‌ستیپێكردوو تائه‌م ساته‌ش هێورنه‌بۆته‌وه‌و حاشاده‌كه‌ن له‌نیشتیمان!.
ئازیزم سوێند به‌مه‌زنی تۆ زۆرباش له‌یادمه‌ سه‌ره‌تای له‌دایكبونی به‌رهه‌می (هۆكاكی پێشمه‌رگه‌)بوو, ئه‌وبه‌رهه‌مه‌ی هه‌رله‌سه‌ره‌تاوه‌ به‌كۆرپه‌ی  له‌ناو ئه‌شكه‌وتێكی ساردوسڕداو له‌باوه‌شی خێزانه‌ مه‌زنه‌كه‌ی (تیپی مۆسیقای شه‌هید كارزان)له‌ دایك بوو, ئه‌وبه‌رهه‌مه‌ی میوانێكی خنجیلانه‌ی گشت ماڵ و سه‌رته‌نوربان وئێوارانی مزگه‌وت وهه‌وارو ژوانگه‌ی كوڕوكچانی خوێنگه‌رمی نیشتیمان بوو, به‌ڵێ سه‌روه‌رم منیش وه‌ك منداڵێكی ئه‌وسه‌رده‌مه‌ به‌دیار ته‌جیله‌ شڕۆڵه‌كه‌ی باوكمه‌وه‌ هه‌ڵده‌كوڕمام وگوێم له‌(هۆكاكی پێشمه‌رگه‌كه‌ی)تۆ ده‌گرت, ده‌یانجار به‌ده‌م گریانه‌وه‌ داوام له‌باوكم ده‌كرد تائه‌و سروده‌م بۆ بنوسێته‌وه‌, به‌ڵام دواجارباوكم هه‌رداواكه‌ی قبوڵ نه‌كردم منیش ناچاربووم  ته‌نهابه‌گوێگرتن سروده‌كه‌ی تۆم وه‌ك ناوی خۆم له‌به‌ركردو تاڕۆژێك به‌ئایدیا جوان وبێگه‌رده‌كه‌ی منداڵی و بێخه‌به‌ر له‌دڕنده‌ی وفاشیزمی ده‌سه‌ڵاته‌ شۆڤێنیه‌كه‌ی ئه‌و سه‌رده‌مه‌, ڕۆژێك كاره‌ساتێكم دروست كرد كه‌به‌به‌رچاوی سه‌رپه‌رشتیاری په‌روه‌رده‌ی و به‌ڕێوبه‌رو ته‌واوی مامۆستاو خوێندكاره‌نی خوێندنگاكه‌مه‌وه‌ هه‌ستام وبه‌بێ سڵه‌مینه‌وه‌ له‌وترسه‌ی كه‌به‌رۆكی هه‌موو تاكێكی ئه‌وسه‌رده‌مه‌ی گرتبوو یه‌كبه‌خۆم وپڕبه‌گه‌روم هاوارم كردو كه‌وتمه‌ وتنی سروودی هۆكاكی پێشمه‌رگه‌كه‌ی تۆ!, كه‌ئه‌وكات له‌ پۆلی یه‌كی سه‌ره‌تای بووم,دواجار كاره‌ساتێك دروستبوو مه‌گه‌رخوابزانێت چۆن پینه‌وپه‌ڕۆكرا!.
ئه‌مه‌جگه‌له‌وه‌ی یه‌كێك له‌كاره‌ساته‌ ناخۆش وترسناكه‌كانی سه‌رده‌می منداڵیمبو, وه‌لێ‌ یه‌كه‌مین زه‌نگی خۆشه‌ویستی نیشتیمان بوو, بۆیه‌ سه‌روه‌رم هه‌رلێره‌وه‌ شانازیت پێوه‌ ده‌كه‌م كه‌وه‌ك مامۆستایه‌كی مه‌زن له‌سه‌رده‌می منداڵیمدا وسه‌ره‌تای درك كردن به‌جوانیه‌كانی ژیان, ئه‌وته‌مه‌نه‌ی كه‌مرۆڤه‌كان درك به‌ده‌ره‌نجامه‌كانی هیچ شتێك ناكه‌ن, ئه‌وسه‌رده‌مه‌ی كه‌ته‌واوی نه‌فه‌سه‌كانی ژیان له‌ده‌ستی ده‌سه‌ڵاتێكی تۆتالیتاریزم دابوو به‌راورد له‌گه‌ڵ ئه‌م ده‌سه‌ڵاته‌ خۆماڵیه‌ی ئه‌مڕۆی خۆماندا كه‌هیچ جیاوازی نیه‌و حوكمی مرۆڤه‌كان له‌ده‌ستی عه‌قڵیه‌تی خێڵه‌كی دوو بنه‌ماڵه‌دایه‌, ئه‌ی سه‌روه‌رم تۆئه‌وكات فێری خۆشه‌ویستی نیشتیمانت كردم, ئه‌ونیشتیمانه‌ی كه‌تائه‌مڕۆش هاوارده‌كات بۆئازادی!, لێوان لێوه‌ له‌خیانه‌ت!, له‌یه‌كه‌مین هه‌ناسه‌كانی قوتاربونیه‌وه‌ هاواری قوتاربونێكیترده‌كات!, نیشتیمانێك به‌هه‌ناسه‌یه‌كی سواره‌وه‌ وجه‌سته‌یه‌كی ساردوسڕه‌وه‌ كه‌چی هێشتاگه‌نجه‌كانی تف له‌ناوچه‌وانی ده‌كه‌ن وبه‌بێنازی به‌جێی دێڵن!, ئه‌ونیشتیمانه‌ی كه‌ هه‌ر ڕۆژه‌و سه‌رۆك ومۆته‌كه‌كانی ده‌سه‌ڵات هه‌زارانجار به‌دایك ودایكیشیان به‌نیشتیمان ده‌نرخێنن, وه‌لێ‌ رۆژ له‌دوای ڕۆژ نیشتیمانی دایك هه‌ڕاج فرۆش ده‌كه‌ن!!.     
دواجار ئه‌وه‌ی ماوه‌ته‌وه‌ بۆ ووتن, چه‌نده‌ كۆچی ناواده‌ی تۆی مه‌زن, تۆی هونه‌رمه‌ند,تۆی مامۆستام, وه‌ك هه‌رمرۆڤێكی هونه‌ردۆست وئازادیخواز ئازاریدام, دووئه‌وه‌نده‌ش بینینی ئه‌ومرۆڤه‌ خۆفرۆشانه‌ی كه‌له‌مه‌راسیمی پرسه‌و به‌خاك سپاردنتا ده‌بینران وخۆیان نمایش ده‌كرد,كه‌ڕۆژگارێك تۆی مه‌زن خۆت وخانه‌واده‌كه‌ت سه‌رتان له‌به‌رامبه‌ر زوڵموسته‌می ده‌سه‌ڵاتێكی شۆڤێنی دانه‌نه‌واندو ڕێگه‌ی شاختان هه‌ڵبژارد, ئه‌وانیش به‌فه‌خرو شانازیه‌وه‌ له‌سایه‌ی ده‌سه‌ڵاتی به‌عسیزمدا ده‌یان بابه‌ت وپه‌خشانیان له‌ڕۆژنامه‌و گۆڤاره‌كانی ئه‌وسه‌رده‌مه‌و ده‌یان نه‌شیدو ته‌هریله‌یان له‌ڕێگای رادیۆو ته‌له‌فزیۆنی به‌غداوه‌ به‌سه‌ربه‌ژنوباڵای مامه‌سه‌دام وده‌سه‌ڵاته‌ شۆڤێنیه‌كه‌ی به‌عسدا ده‌نوسی وده‌هۆنیه‌وه‌, ته‌نانه‌ت به‌شێكیان ئه‌مڕۆش هه‌ڵگری هه‌مان ڕێبازه‌كه‌ی دوێنێن و له‌بری مامه‌سه‌دامه‌كه‌ی دوێنێ‌ مامه‌و كاكه‌ خۆماڵیه‌كه‌ی ئه‌مڕۆ بێبه‌ش نه‌بوون له‌مه‌رحه‌مه‌تی ئه‌و سیسارگانه‌ی كه‌له‌ڕاگه‌یاندنه‌كاندا به‌(شاعیرو ئه‌دیب و نووسه‌رو هونه‌رمه‌ندی مه‌زنی گه‌له‌كه‌مان)ده‌نرخێندرێن!.

Goran_Dukani@yahoo.com

گۆران دوكانی

Previous
Next
This site is registered on wpml.org as a development site.