دوا شه‌وی ساڵ …. به‌ندی عه‌لی

.. 2010

به‌دوی سێبه‌ری ده‌هرا ڕائه‌که‌م
هه‌ناسه‌سوارو شه‌که‌ت و ماندوو
نه‌من چمکێکی یه‌خه‌ی ئه‌و ئه‌گرم
نه‌ئه‌و ساتمه‌یه‌ک ئه‌کا بۆ پشوو

له‌ڕیتمی ڕه‌وتا له‌ئاسک ئه‌چێ
ئه‌و چوستوچالاک ، سرکو گورجوگۆڵ
من خلیچک و خاو ، به‌ڕه‌وتی کیسه‌ڵ
به‌ردی سیزیفم هه‌ڵگرتووه‌ به‌کۆڵ

تۆ ئه‌ی ته‌می خه‌م ، لا له‌به‌ر چاوم
من خۆم له‌گۆمی عومرا چه‌قیوم
له‌جه‌نگی نێوان ئاسک و کیسه‌ڵا
بێگومان هه‌ر من ، ته‌نیا به‌زیوم

ئه‌گه‌ر من و ئه‌و سه‌یری خۆمان که‌ین
له‌به‌ر ئاوێنه‌ی چاوی قه‌ده‌ردا
مه‌علومه‌ کێمان شه‌نی عومر ئه‌کاو
کێمان خه‌رمانی گشت به‌هه‌ده‌ردا

دیسان وا شه‌وی کۆتایی ساڵه‌و
ده‌هر هه‌ر جوان و نوێ ئه‌بێته‌وه‌
باوه‌جو کێوی عومری سپی من
چنگێ له‌به‌فری لێ ئه‌توێته‌وه

وه‌لێ وێڕای خه‌م ، وێڕای ژانی دڵ
ئه‌ی ده‌هری بێباک ، من هه‌ر به‌هیوام
ئه‌م دواشه‌وه‌ی ساڵ ده‌روازه‌یه‌ک بێ
بۆ ده‌هرێکی نوێی بێ دڕک و بێ زام