Skip to Content

Friday, March 29th, 2024
رەنگ ….. فه‌رهاد كه‌ریم

رەنگ ….. فه‌رهاد كه‌ریم

Closed
by January 2, 2011 ئەدەب

 

ژیان سەوزە
بەیانیان بە کراس و پانتۆرێکی سەوز
بە چاویلکە و پێلاوێکی سەوز
بە پەنجەوانەیەکی سەوز و پایسکلێکی سەوز
پەیدان لێدەدەم بۆ کارگەیەکی سەوز
تەمەنی سەوزم دەدەم
بە کاغەزی سەوز

ژیان زەردە
ئێواران لە گەرماوێکی زەرد
بە لیفکە و سابوونێکی زەرد
خۆم دەشۆم بە ئاوی زەرد
خۆم ووشک دەکەمەوە بە خاولیەکی زەرد
بە بێجامەیەکی زەرد
بە لێفە و بالیفێکی زەرد
ماندوێتی زەردم دەدەم
بە خەوێکی زەرد

ژیان شینە
نیوەرۆیان بە دەرپێ قوتەیەکی شین
بە چاویلکەیەکی شین
دەڕوانمە دەریای شین
رادەکشێم لە سەر خاولیەکی شین
روانینی شینم دەدەم
بەو ئافرەتانەی دەفرن لەناو ئاوی شین
سەما دەکەن لە ئاسمانی شین

ژیان سپیە
بە جلێکی سۆفیانەی سپی
بە دەفێکی سپی
لە شەوێکی سپی
بە گیانێکی سپی
گۆرانی سپیم دەدەم
بە نانێکی سپی

ژیان سوورە
دەستێکم بە خوێنم سوور
دەستێکیشم بە گوڵ سوور
بە گیانێکی گوڵ گوڵیی سوور
بە بێجامەیەکی سوور
دەستی سوورم دەدەم
بە رۆژێکی وەک گوڵ سوور.

 

 

فه‌رهاد كه‌ریم
Farhad4Hamad@yahoo.com

 

 

Previous
Next
This site is registered on wpml.org as a development site.