هەزار خۆری پرشنگدار ئێستا لە کتێبخانەکانی کوردستاندا دەستدەکەوێت

 ( هەزار خۆری پرشنگدار)  کتێبێکی وەرگێڕدراوە، لە زمانی ئینگلیزییەوە( چرا نەوزاد) کردوویەتی بە کوردی. ئەم کتێبە لە نوسینی نوسەری ئەمریکی  بەڕەچەڵەک ئەفغانی ( خالید حوسێنی) یە، یەکێکە لە کتێبە پڕخوێندراوەکانی جیهان، لە ساڵی ٢٠٠٧ دا لە ڕیزبەندی باشترین دە کتێبی دنیادا پلەی سێهەمی بەدەست هێنا. ناوەڕۆکی ئەم ڕۆمانە چیرۆکی ئەو ژیانە پڕ لە ناسۆرەیە کە ئافرەتانی ئەفغانستانی تێدا دەگوزەرێت، باسی ئەو ژنانە دەگێڕێتەوە کە باڵادەستی ئاین و کولتورە بەسەرچوەکان کردونی بە کۆیلەیەکی هەمیشەیی بۆ ژیان.
لە وتەیەکدا دەربارەی ڕۆمانەکە کە لە کۆتایی کتێبەکەدا هەیە، چرا هۆکاری هەڵبژاردنی ئەم کتێبە بۆ وەرگێڕان دەگێڕێتەوە بۆ ئەو لەیەکچونە ڕەهایەی لە نێوان ژیانی ژنانی ئەفغانستان و ژنانی کورددا هەیە، وە بەپێزی گێرانەوەی چیرۆکەکە و توانا هونەری و ئەدەبییەکانی نوسەر.
ئەم پەرتوکە( دەزگای ئاراس) لە هەولێر ئەرکی چاپکردن و بڵاوکردنەوەی گرتە ئەستۆ، ئێستا لە کتێبخانەکانی کوردستاندا دەستدەکەوێت.