Skip to Content

Thursday, March 28th, 2024
سەرۆک ماڵئاوایی بکە….. ئیسماعیل حەمەئەمین

سەرۆک ماڵئاوایی بکە….. ئیسماعیل حەمەئەمین

Closed
by April 6, 2011 گشتی

بەداخەوە ئەمە ئەو هەواڵەناخۆشەیە کەپێویستە قبوڵی بکەیت، جانتاکەت کۆبکەرەوە و بۆئەبەد واز لەم میللەتە بهێنێە کە کڵێشەی سەرۆکایەتی تۆی قبوڵ نییە،  هەموو وەرەقەیەکی چاکسازی تۆ تەنها ماکیاژی هەڵەی کەڵەکەبووە لەنێو قوربانیەکانتدا، بەداخەوە تازە لەنێوان پارتەکەی تۆ و خەڵکی ڕاپەڕیودا خوێن ڕژاوە، تازە مێژووی ئێمە و  ئێوە خوێنی ڕژوای گەنجەکانمانە، خوێنی سەردەشت و سۆرانی مامە حەمە و بیلال و گەرمیان و سورکێوو چەندەها هاوڵاتی بێتاوانە، ڕاپەڕینی ناوچەکە بەگشتی، ڕاپەڕینی گەنجەکانە دژی کۆنزەڤاتیڤ و پیری سیاسی،   تازە دەبێت بڕۆیت، چونکە تۆ و پارتەکەت دژە جولانەوەی گەنجی ئەم کۆمەڵگەیەن . تۆ و دەزگاکانت، جگە لەڕۆڵی دیسپۆت و بەندیەوان نەبێت ڕۆڵی ترتان پێنابەخشرێت. ڕۆڵی ئێوە لەهەولێر بوونتانە بەجەلادی بەندیخانەیەکی گەورە، بوونتانە بەوەی ناتوانن چوار مەتر زەوی بۆ ئازادی  فەراهەمبکەن، مێژووی تۆ مێژووی کوشتنی خەڵکی سیڤیلە لەژێر چەتری میهرەبانی سەرۆکایەتیتان، مێژووی کوشتنی گەنجە لەڕووی جەستەیی و مەعنەویەوە. بڕۆ سەرۆک،  چونکە زەمەنی تۆ لەهەموو دنیادا کۆتایی پێهات، کڵێشەی تۆ چیتر لەم جیهانە نوێیەدا جێگەی نابێتەوە.  جیگەی داخە سەرۆک   کەگوێیت لەدیالۆگ نەگرت، ئیدی  درنگە بۆ پینەکردن، تازەدرەنگە بۆ مانەوەت، تازەدرنگە بۆ ئەوەی مانگێکی تریش حوکم بکەیت، تۆ چیتر سەرۆک نەماویت، چونکە سەرۆک خوێنی مناڵان لەسەر جادەکاندا ناڕێژێت، سەرۆکی وەها ناتوانێت چاکسازی دەستپێبکات، بائاشکرا گووتومە لەگەڵ ڕژانی خوێنی ڕێژوان گیاندا لەبەردەم بارەگاکای ئێوەدا،  تۆ چیدی سەرۆک نەماویت، لەگەڵ ڕژانی خوێنی سۆران و سەردەشتدا تۆ دەمێکە شەرعیەتت لەدەستداوە.
بەڕێزم لەسەر درۆی بچوک لەوڵاتانی دیموکراتخواز سەرۆکەکان واز لەکورسیەکانیان دەهێنین، کەچی ئێوە بەردەوامن لەیاریکردن بەئارگومێنتەکان و هەر دەمەو سیناریۆیەک بۆ کوشتنی گەنجەکانمان دروست دەکەن، سەردەشتان کرد بەئیرهابی و قاعیدە،  لێکۆڵینەوە لەکوشتنی سۆرانی مامە حەمە بەچەندەها سیناریۆی عەجایبدا تێپەڕی و تائێستا ئەنجامی نییە، و خوێنی ڕێژوان کە بەبەرچاوی  ئێمەوە  بێ ڕەحمانە بەگوللەدرا، چەندەها سیناریۆی بۆ دروستدەکەن و  باوکی دڵبرینداری دەهێننە بەردەمی کامێراکانتان و شەهامەتی کوردانەی ڕیگە نادات دەست بەڕووتانە بنێت، ئەوە شەهامەتەی ئیستغلال دەکەن بەوەی کورد گەر دوژمنی بێتە ماڵەکەی دەست نانێت بەڕوویەوە، کەچی کامێراکانتان ئەو پیاوە دڵ بریندارە بەو سیناریۆیە نمایشدەکەن کەلەپارتەکەتان خۆش بووە. ئیدی ئاوەها شانۆی گاڵتەجاڕی دیکاتۆریەت هەردەمەو وەرقەیەک و هەردەمەو سیناریۆیەک ئامادەدەکات،  هەردەمەو ماسکێکی  دیموکراتخواز لەدەم و چاوی دەبەستێت، هەردەمەو خۆی بەهیومانی نمایشدەکات. سەیرکە زانکۆیەکی گەورە بەفەرمانی حزبەکەت داخراوە و چۆن ئازادی لەهەولێر تیرۆر دەکەن، کەچی باس لەدیموکراتیەت وەرەقەی چاکسازی دەکەیت. سەرۆک زەمەنی تۆ و حکومەتەکەت لەوە دەرچووە دیالۆگی لەسەر بکرێت. تاکە دیالۆگ کەئەمڕۆ پێویستە بکرێت، دیالۆگی ماڵئاواییە  لەخۆت و حکومەتەکەت.
لەم خاڵە سادەو ساکار وڕوون وئاشکرایانەوە، وەک نوسەرێک ئەوەندە دەبینیم، کەشانسەکانی دیالۆگی ئازاد لەنێوان خەڵک و حکومەت و سەرۆکەکەیدا، لەچوارچێوەی ئەوە دەرچووە چاکسازی بکەین، لەچوارچێوەی ئەوە دەرچووە باس لەوەبکەین چۆن لەگەڵ سەرۆک و حکومەتدا پێکەوە چاکسازی بکەینە وەرەقەیەکی کارکردن، گەر ئۆپۆزیسیۆن بکەویتە هەڵەی وەهاوە ، ئەویس بەر نەعلەتی خەڵک دەکەوێت.  ئەوەی ئێستا وەک خۆر ڕوون و ئاشکرایە تەنها یەک دیالۆگە پێویستە بکرێت، دیالۆگێک پێویستە ناوی لێبنرێت، ئەویش دیالۆگی (ماڵئاواییە لەسەرجەم سوستێمی سەرۆکایەتی)، بێگومان   بەسەرۆک خۆیەوە، بەمانای کۆتایی هێنان بەزەمەنی سەرۆک  و سەرۆکایەتی و حزبی قائید، لەئەمڕۆ زووترە  نەک سبەی. 
لەوانەیە هەندێک لەخوێنەرانی ئەم گوتارەم، ئەم دەستەواژانەی سەرەوەم بەشتێک لەحەماس و سۆزداری تێبگەن، بەڵام ئازیزانم ئەوەندە باسمان لەئەقڵانیەتی سیاسی کرد، لەداروینزمی کۆمەڵایەتی کرد، لەدیالۆگی نیشتمانی وەستاو لەسەر بنەماکانی تیۆرەی کۆمنیکاتیڤی هابرماز کرد، کەئیدی لەکەسی رۆشنبیر و نوسەری کاری فیکری و ئەدەبی  بووین بەو کەسانەی بۆ دیوارەکان قسەدەکەین، خۆمان وەهامان لێهات کەخۆمان بە لێبۆک و قۆشمەچی نێو کتێبەکان تێدەگەیشت، خەڵکی سادە لەسەرجادەکان بەمنیان گووت براکەمان ئەمانە لەو زمانە ئەقڵانیە تێناگەن، بەداخەوە کەئەمە واقیعێکی تاڵە و دەبێت قبوڵی بکەین. وەک نوسەرانی ئازاد داوای شەفافیەتمان کرد وەک پڕنسیبیک بۆ دیالۆگ، کەچی لەمیدیاکانەوە کامە جاهیل و زوڕناژەنی هەرزانە بەناوی نوسەرەوە هاتن و شیکردنەوەی نادروستیان بۆ ئەو گەنجە توڕە و خێر لەخۆنەدیووانەی ئەم کۆمەڵگەیان بڵاوکردەوە.  داوای ئەوەمان کرد گفتۆگۆ بکەین، کەچی مەکینەی حیزب لەجاران دڕندەترو تۆمەتباراکارانەتر دژی دەنگی ئازاد کاری کرد، داوامان کرد وەها لەخەڵکی بێبەشنەکەن توڕە بێت و بائەقڵانیەت بکەینە پێوەر، کەچی ڕۆژ بەڕۆژ دەزگای داپڵۆسێنەری عەجایبتان بۆ ئێمە دروستکرد، لەپاراستنەکەتانەوەوە بیگرە تاوەکو زانیاری و چەندەها دەزگای تری دژە تیرۆر و دەزگای تر کەئەوەندە زۆر و بەیەکداچوون ناوەکانیان مرۆڤ گێژدەکات.. داوامان لێکردن با گەندەڵی بەس بێت، کەچی هاتنە سەر تەلفیزۆنەکان و گووتان لەوڵاتانی دیموکراتیشدا گەندەڵی هەیە. گوتمان با لەهەولێردا چوار مەتری خەیاڵی هەبێت بۆ ئازادی، بەتەباشیر دیاریدەکەین و دوایی کەخۆپیشاندان  تەواو بوو ئاشتیانە دەیکوژێنینەوە و تاخۆپیشاندانیکی تر، کەچی هاتن نەک خۆپیشاندانتان قەدەغەکرد لەهەولێر، بەڵکو پەیکەری گەنجێکی شەهیدی وەک (سەردەشت عوسمان) تان قەدەغەکرد. زانکۆتان داخست و لەبازگەکاندا هەولێرتان کرد  بەندیخانەیەکی گەورە، زانکۆتان بەفەرمانی کۆمەڵێک جاهیلی حیزبی پارتەکەتان داخست. گوتمان با ئاشتیخوازبین هاتن لەسلیمانی گەنجەکانتان کوشتین و هێزی زێڕەڤانیتان ناردە سەرمان. ئیدی بەڕێزم پێم بڵی بەچجۆرە شەرعیەتێکەوە دەتەوێت چاکسازی بکەین، دەتەوێت بەچجۆرە میهرەبانیەکەوە بمێنیتەوە. بەڕێزتان ئێستا دەبێت لەقەفەزی بەرگریکردن بن  لەم هەموو تۆمەتباریەی ڕووبەڕووی خۆتان و پارتەکەتان دەکرێتەوە و دەبێت لەژێر لێکۆڵینەوادا بن، نەک لەسەر کورسی سەرۆکایەتی دانیشن و حوکم بکەن و بەڵێنی بەتاڵ بدەیت بەوەی خۆت هەڵنابژێریتەوە. زەمەنی سەرۆکە ئەبەدییەکان، ئەوانەی لەتۆ بەهێزترن و خاوەن دەوڵەت و سوپان کۆتایی هات، ئیدی باشتر وایە هیمەتی پێشمەرگانەت بجوڵێت و وازبینیت و خۆت بخەیتە خزمەتی حکومەتیکی تازەدروستبوو لەخەڵک، نەک بۆئەوەی بەشدار بیت تێدا، بەڵکو بۆئەوەی چاوەڕێی ئەوە بکەیت دەرئەنجامی لێکۆڵینەوە لەسامان و گەندەڵی و کارەکانتان بەکوێتان دەگەیەنێت، ئەمە واقیعی تۆیە ئەی سەرۆک، گەر ئێستاش بەهەر کلۆجیک بمێنیتەوە، ئەوا داهاتووت دوای کۆتاییهێنان بەهەموو سەرۆکە ئەبەدییەکانی وەک قەزافی و بەشار و عەلی عەبدوڵا ساڵح، لەو باشتر نابێت، تۆیەک لەزمانی هەڕەشە و تۆقاندنی دەنگی ئازاد نەبێت ، زمانی تر نازانیت، وەرەقەکە بخەرە گیرفانتەوە و بڕۆ لەماڵەوە دانیشە… 
بەداخەوە ئەوە منم وەهادەڵێم، منێک کەدوای دیالۆگی ئەقڵانی دەکەم، بەڵام چەمکی دیالۆگ دوای ئەو هەموو داخستنی بازگە و زانکۆ داخستنە و دیپۆرتکردنەوە و ڕێگریە لەخۆپیشاندان لەهەولێر، هیچ مانایەکی نامێنێت، هیچ بەهایەکی نییە کەئیمە داوای ئەقڵانیەتان لێبکەین  کەچی ئێوە ڕۆژانە لەسەر جادەکان ئازادی تیرۆر بکەن. ئەقڵانیەت پێمان دەڵێت دەبێت شتەکان وەک خۆی، بەڕووت و قوووتی ببینن، بەجۆریک پێویستی بەبەرگی ڕەنگاوڕەنگ و ماکیاژ نەبێت، پێویستی بەماسکی درۆزنانە نەبێت، وەک ئادۆرنۆ دەڵێت: (هەقیقەت بەڕووتی، وەک خۆی) بێ هیچ شتێک، هەقیقەت وەک خۆی ، وەک چۆن لەسەر زەوی ڕاستەقینە بوونی هەیە، پێویستە ئاوەها بیبینین، هەقیقەتی ڕووت ئەوەیە، کەزەمەنی سەرۆکەکان کۆتایی پێهاتووە ، بێگومان گەر نەمردبێت.
لەم گوتارەدا وەک ئاماژەم پێدا هیچ تەفسیریک ناکەم، هیچ خاڵیکی قورس دیاری ناکەم، باس لەهیچ بیرمەند و تیۆرەیەک ناکەم ، چونکە ئەم خۆپیشاندانانەی ڕۆژهەڵاتی ناوەڕواست پێناسەی خۆیان بەخۆیانەوەیە، سەرەتا پێویستە ئەوە بڵێین جوانترین خاڵ و ئیستایکای ئەم ڕاپەڕینەی ڕۆژهەڵاتی ناوەڕاست ئەوەیە، کەپێناسەیەکی حزبی نییە، لەمیسر و تونس و یەمەن و لیبیا و کوردستانیش خاڵی هاوبەشیان ئەوەیە کەهەڵگری ناسنامەیەکی حزبیکی دیاریکراو نین، ئۆپۆزیسیۆنەکان و پارت و ڕێکخراوە ئازادیخوازەکان و نوسەران و هونەرمەندانی ئازاد پەیوەندییان پێوە دەکەن. بەمانای ئەم خۆپیشاندانە ئاشتیخوازانەیە دەربڕینی خەمەکانی مرۆڤی سادەن وەک خۆی ، مرۆڤی سادە وەک هەقیقەتیکی ڕووت، داواکارییەکانی ئەو مرۆڤە سادەییەی لەلایەن هەموو پارت و حکومات و دەزگایەکی ئەم کۆمەڵگەیانەی تێدادەژین پەراوێزخراون، دەنگی گەنجانی پەراوێزکراو و پیرە خێرلەخۆنەدیوە پەراوێزکراو و خانمە پەراوێزکراوەکانی ئەم کۆمەڵگە ڕۆژهەڵاتیانەن، کەبەدەستی سەرۆک و کوڕی سەرۆک و خزمی سەرۆک و دراوسیی کۆنی سەرۆک و تەنانەت قەیتولی سەرۆک و مەسینەهەڵگری سەرۆکەکان و کوڕ و کچەکانیان گیرۆدە بوون. ئاوەها ئەم خۆپیشاندانەی مەیدانی ئازادی لەسلیمانی و مەیدانی ئازادی لەسەنعای یەمەن و مەیدانی ئازادی میسر و مەیدانی ئازادی لەبەغدای پایتەخت و مەیدانی ئازادی لەتعز و میسراتەی لیبیا و مەیدانە ئازادەکانی تر، ئەو ڕاستیە دەسەلمێنن کەمرۆڤی سادە و ساکاری ئەم کۆمەڵگە دیسپۆتانە، دەیانەوێت لەمرۆڤی سادەی پەراوێزکراوەوە ببن بە هاوڵاتی خاوەن ماف و بەشدار لەژیاندا، لەسەربازی بەوەفا بۆ سەرۆک و حکومەت و بنەماڵەکەنیان کەخاوەن قوتابخانەی خەباتی شەڕی مێشولەکانن لەگەڵ هەوای پیسی گەندەڵیدا، خاوەن سەروەری داستانەکانی ژەنراڵە وەرقیەکانن لەگەڵ ڕەشەبای موخابەراتەکانی دنیادا، کەخاوەن ئیلهامی گەورەن بۆ نەتەوەیەک تەنها بۆ مناڵ و کەس و کاری خۆیانە ، نەک خەڵکی بەشخوراو. ئەو مرۆڤە سادانە لەسەروو هەموو فیکرێکەوە، لەسەروو هەموو ئایدۆلۆژیایەکەوە، خۆیان ئازادی بۆ خۆیان دروستدەکەن و نایەنەوێت چیدی هیچ هێزیکی سیاسی، هیچ کەسێک، هیچ سەرۆکیک و سەرکردە و کادێر و هەڵسوڕاوێک  گاڵتە بەچارەنوسیان بکات. ئەم خۆپیشاندانە یەک ئامانجی هەیە ئاشکراو ڕوونە، ئەویش دادپەروەری کۆمەڵایەتی و ئازادی و یەکسانی کار و نان و بەشداربوون لەکۆمەڵگەدا وەک یەک، بەڵام ئەمە بەبێ ڕۆیشتنی سەرۆکە ئەبەدییەکان مەحاڵە بەدی بێت. لەم چوارچێوەیەدا هەموو چاکسازیەک، هەموو ڕیفۆرمێک، هەموو دیالۆگێک جێگەی دەبێتەوە، بەڵام دیالۆگ دوای خوێن ڕشتن و بەندیکردن و سەروەت و سامان دزین  لەم کڵێشەیەدا جیگەی نابێتەوە، گەندەڵی لەم ڕۆژهەڵاتەدا بۆتە شێرپەنجە و دەبێت بنبڕ بکرێت، گەندەڵی لەم ڕۆژهەڵاتی ناوەڕواستە پابەند نییە بەچەند کۆمپانیا و  بازرگان و چەند کەسیکی لادەر لەنێو دەزگاکانی حکومەت کەکارئاسانی دەکەن، بەڵکو پابەندە بەکۆی حکومەت خۆیەوە، بەکۆی دەسەڵاتی سیاسی خۆیەوە، بەکۆی دنیابینی سەرۆکایەتی و سەرۆک خۆیەوە بۆ کۆمەڵگە و سامانی سەر زەوی و ژێر زوقی و تەنانەت ئاسمانی وڵاتیش. گەندەڵی لەم دۆزەدا سەرجەم کڵێشەیەکە لەدەسەڵاتی سیاسی کەلەشێوەی سەرۆکێکی ئەبەدی  دروستبووە لەسەرووی هەڕەمەکەوە  خۆی بە خاوەنی نەتەوە و  شەرەفی نەتەوە تێدەگات و لەخوارئەوەوە حکومەت و دەزگاکانی کەبەسەر بنەماڵە وحزبی دەسەڵاتداردا دابەشبووە. گەندەڵی پێکهاتووە لەسەرۆکێک هەموو دەزگاکانی سوپا و دەزگا ئەمنی و پارەی لەبندەستدایە، گەندەڵی لەڕۆژهەڵاتی ناوەڕاستدا لەوێنەی سەرۆکدا خۆی بەرجەستەکردووە. لەبەر ئەوە لەخێمەکانەوە، لەسەر جادەکانی هەژارییەوە، لەنێو کۆڵانەکانی نەداریی و کێشەی کۆمەڵایەتی و ناعەدالەتیەوە، لەئۆردووگاکانی دایکانی چاوئاودامان بەفرمێسکی ڕۆڵە ئەنفالکراو و مێردە ونبووەکانی نێو ساراکانەوە، لەهەموو شوێنێکی ئەم وڵاتەوە و ئەم ڕۆژهەڵاتەوە یەک دەنگ دەبیسترێت، یەک هەقیقەتی ڕووت دەبیسرترێت، ئەویش دەنگێکە دەڵێت : سەرۆک ماڵئاوایی بکە …

Previous
Next
This site is registered on wpml.org as a development site.