چیرۆکێک لە خۆشەویستی و تاریکی

ئەوە لایەنێکی گرینگە لە بیوگرافیای رۆماننووسی ئیسرائیلی ئامووس ئۆز، كە لە رۆمانی (چیرۆكێك لە ئەڤین ‌و تاریكی) دا بڵاوكراوەتەوە. ئامووس ئۆز چەندین رۆمانی نووسیوە و ماوەیەكە بۆ وەرگرتنی خەڵاتی نۆبلی ئەدەب ناوی هاتووە، یەكێكە لەو ئەدیبانەی‌ كە بەرهەمەكانی بە چەندین زمانی جیهان هەیە و كتێبەكانی پڕفرۆشن. لەبەرئەوەی ئەو كتێبە بیوگرافیای خۆیەتی، سەربردەی ئیسرائیل‌ و جوولەكە و ژیانی خۆیەتی، بە خوێندنەوەی ئەو رۆمانە دروستبوونی دەوڵەت‌ و كەسایەتی ئیسرائیلی دەناسێت.
رۆمانەکە وەرگێڕدراوەتە سەر چەندین زمان و لە ساڵی ٢٠١٠ کراوە بە عەرەبی، ئەو رۆمانە لە بڵاوکراوەکانی کتێبخانەی ئاوێرە لە هەولێر، کە لەلایەن شێرزاد هەینی کراوە بە کوردی، بە قەبارە گەورە و بە ٨٠٠ لاپەڕە چاپکراوە. دیزاینی بەرگەکەی لەلایەن موعین رەحمان کراوە، بەو هیوایەی ئەو کتێبە لاپەڕەیەکی شاراوە کۆمەڵگەی ئیسرائیلی بە خوێنەری کورد ئاشنا بکات.