جەنگەڵ ….. لوقمان مستەفا

لەوڵاتی
جەنگەڵستان
دەمە تەورێک
یاخی بوو لە
کلکەکەی خۆی
بڕیاریدا
هەرچی داری
ناو جەنگەڵە
بدابەبا
هەرچی سورە چناری
گوێ ئاوە
وێران بکا
گوڵاڵەی سوور
قەد باڵ
بیگەوزێنێ
+++++++++++++
دەمێک ساڵ بوو
کلک گۆرانی بەباڵایدا ئەدا
خەریکی دەمە زەردی بوو
ئەیویست بیکا
بە دۆستی دار
هاوڕێی بۆ پەیدا بکا
لەملا و لەولا
باسی جوامێری دەکردو
هەوڵی دەدا
لە مەجلیسدا
وەک پارێزگاری جەنگەڵ
بیناسێنێ
زۆر دەمێکە
کلکە تەور
هەر وەک بەور
ببوە قەڵغانی
++++++++++++
ئائەم کلکە
کوڕی، کوڕی
دار بەڕوویەکی دارستان بوو
کە لە قەدی دار بووە
هەر زوو خۆی کردە هاوڕێی
دەمی تەور
وەک دوو هاوڕێ
دەیان ساڵی بوون بەیەکەوە
تا ڕۆژێکیان
بڕیاریدا
دارگوێزی
باپیری ببڕێتەوە
تەنها داربوو
بەپێوە بوو
بەڵام کلک
یاخی نەبوو
یاخی نەبوو
یاخی نەبوو

لوقمان مستەفا
٥/٥/٢٠١١