Skip to Content

Thursday, March 28th, 2024
نه‌ لێره‌م و نه‌ له‌وێ …  به‌ناز فاتح

نه‌ لێره‌م و نه‌ له‌وێ … به‌ناز فاتح

Closed
by May 15, 2011 ئەدەب

 

    
دوور ده‌ست ده‌هاوێژم، بۆ یه‌كه‌م پیتی وشه‌یه‌ك ده‌گه‌ڕێم ,
دێر به‌ دێری فه‌رهه‌نگه‌كان به‌ چاوه‌ ڵێله‌كانم ته‌ی ده‌كه‌م ,
لاپه‌ڕه‌ به‌ لاپه‌ره‌ی كتێبه‌كان  ده‌خوێنمه‌وه‌..
بۆ وشه‌یه‌ك ده‌گه‌ڕێم كه‌ مانای جیهانیك بدات، هه‌موو شتێكی تێدا بێت
جگه‌ له‌ عیشق،جگه‌ له‌ شوێن، جگه‌ له‌ تۆش!
                 ****

چێژه‌ ڕاگوزه‌ره‌كانی  ئه‌م تەمەنەم  له‌ خۆڵه‌مێشی قه‌قنه‌سێكدا ده‌كێشم.
تا له‌گه‌ڵ زیندووبوونه‌وه‌ی خۆیدا زیندووی بكاته‌وه‌.
                ****

كه‌نارێك چۆڵستانی ڕۆحم له‌ باوه‌ش ده‌گرێ
هزرێكی ڕه‌ش  بێئۆقره‌یی دڵم ده‌لاوێنێته‌وه‌
بۆیه‌ بوونم بێمه‌به‌ست گوزه‌ر ده‌كات
            ****

زه‌رده‌ ئێواره‌ی نازێكی غه‌مگین
دوو ڕۆحی نامۆ له‌یه‌ك جودا ده‌كاته‌وه‌
سیحری ماڵئاوایی!
سات پڕ ده‌كات له‌ نه‌رمه‌ هه‌ست،
ورده‌ نیگا و حه‌سره‌تی دڵ
         ****

دڵم قه‌ستی شێتبوون هاوار ده‌كات
خۆی به‌ كه‌ناری هه‌ر بوونێكدا ده‌كێشێ
غه‌مگینتر ده‌گه‌ڕێته‌وه‌ ناو ژووری دڵته‌نگیم
        ****

نه‌ لێره‌م و نه‌ له‌وێم
وێڵ به‌ دوای شه‌پۆلی هه‌ستێكی به‌ جێماودا ده‌گه‌ڕێم
له‌ نێو ده‌نگ و سەدای ئه‌م كه‌رتبوونه‌مدا
گه‌ڕانه‌وه‌یه‌ك ڕێگا ده‌گرێته‌ به‌ر
خه‌مه‌كان … هه‌سته‌كان … به‌ جێدەمێنن.

 

 

Previous
Next
This site is registered on wpml.org as a development site.