زۆر ئه‌ترسێم …. به‌ندی عه‌لی .
گرنگ نیه که‌نگێ ئه‌گریین
وه‌لێ کاره‌ساته ئه‌گه‌ر
ئاونگی ئه‌شک
به‌چلوره‌ی بن گوێسه‌بانه‌ی پێلو بێ
له‌بێ هووده‌یی گریان و
بێ مروه‌تیی ڕه‌قیبانا
زۆر ئه‌ترسێم
له‌م وه‌رزی کڕێوه‌ی میهره‌یا
گریه‌مان لێ ببێ به‌خوو
گرنگ نیه له‌کوێ ده‌جمێین
وه‌لێ کاره‌ساته ئه‌گه‌ر
له‌ڕیتمی سه‌ما تێنه‌گه‌ین
ئایا ئێمه‌ین
ئاسکه‌که‌ی زه‌مه‌ن ڕاوئه‌نێن
یاخود ئه‌وی ماخۆلانه ڕاومان ئه‌نێ
زۆر ئه‌ترسێم ، نه‌زمی ڕه‌ومان
به‌له‌نجه‌ولاری په‌یکه‌ر بێ
گرنگ نیه کێ ئه‌بینین
وه‌لێ کاره‌ساته ئه‌گه‌ر
دیده‌مان هێزی جیاکاری ڕه‌نگه‌کانی
لێ بزر بێ و ڕه‌نگی خوێن و
ڕه‌نگی شه‌رابی لا یه‌ک بێ
زۆر ئه‌ترسێم
له‌م باده‌خانه‌ی ده‌هره‌یا
به‌دمه‌سته‌کان له‌جێی شه‌راب
خوێنی دڵی گوشراوی یه‌ک بخۆنه‌وه
گرنگ نیه چی ئه‌بیستین
وه‌لێ کاره‌ساته ئه‌گه‌ر
ئه‌وه‌ی گوێ قوڵاغی ئه‌بین
بێ ئه‌وه‌ی گوڵ بژارکه‌ین
له‌گوڵدانی دڵمانی نێن
زۆر ئه‌ترسێم
له‌م پاییزه‌ی موحیبه‌تا
ئه‌وه‌ی له‌به‌ینمانا ئه‌ڕوێ
هه‌ر دڕک و داڵی کینه بێ
گرنگ نیه چۆنی ئه‌مرین
وه‌لێ کاره‌ساته ئه‌گه‌ر
پێ نه‌زانین بۆچی ئه‌مرین
زۆر ئه‌ترسێم
له‌که‌رنه‌ڤاڵی مردنا
مه‌زاریشمان وه‌ک ئه‌درێسی زینده‌گیمان
هه‌ر به‌ده‌ردی
گۆڕی سه‌ربازێکی وون چێ
