Skip to Content

Sunday, August 14th, 2022

گه‌ڕانه‌وه‌ … بەناز فاتح

Closed
by June 9, 2011 ئەدەب

گومان و پرسیاره‌كان ,,
خه‌ریكی هۆنینه‌وه‌ی سه‌رسامییه‌كی  ترن
له‌ ناو باخچه‌كانی ئه‌م زاته‌مه‌دا !!
كێ ده‌زانی ؟؟؟!!
ئه‌م شه‌و له‌ پڕێكدا
وه‌ڵامێك خۆی به‌ كه‌ناری پرسیارێكدا ناكێشێ و
ئاوێزان نابن له‌ ژێر تریفه‌ی نازێكدا !!!
              ***
خۆم له‌ ته‌مه‌ تاریكه‌كانی شه‌وه‌ جه‌نجاڵه‌كان ده‌ته‌كێنم
به‌ هه‌نگاوێكی نه‌رم 
ده‌ستپێكی ڕێگایه‌ك ده‌گرمه‌ به‌ر,
تا ده‌گه‌مه‌ گزنگی خۆری به‌یانییه‌كی تۆ.
           ***
سینه‌م پڕه‌ له‌ هه‌ناسه‌
پێشبڕكێی یاده‌كانتم له‌گه‌ڵ ده‌كه‌ن
 هه‌نگاوێك پێشوو تر
جه‌سته‌یه‌كی شه‌كه‌ت خۆی له‌ تنۆكێك باران هه‌ڵده‌كێشێ‌ .
           ***

ئه‌مشه‌و وشه‌ نانوسمه‌وه‌ ,
به‌ نیاز نیم خه‌یاڵه‌كانم له‌ كۆپله‌ی شیعرێكدا وێنا بكه‌م
خۆم و پۆلێك باڵنده‌ی ڕه‌نگاو ڕه‌نگ له‌ سه‌ربانی په‌ڵه‌ هه‌ورێكدا 
وێنه‌ی شه‌ڕ و شۆڕشی خوود  ده‌كێشینه‌وه‌ و
 دیسانه‌وه‌
برینێكی ته‌ڕ  سه‌ر هه‌ڵده‌دات 
جۆگه‌له‌ی بوونم سور سووور ده‌كات
         ***
شه‌پۆله‌كانی ڕۆحم په‌نگیان خواردووه‌ته‌وه‌ 
بازنه‌كان به‌ ده‌وری خۆیاندا له‌ سه‌مایه‌كی خێرادا ده‌خوولێنه‌وه‌
هه‌مان پرسیار … هه‌مان مانا … هه‌مان وه‌ڵامی بێده‌نگ
له‌ كه‌ناری بوونێكدا ڕاده‌مێنێ‌ .
               ***
سه‌ده‌یه‌ك پێش ئاوه‌دانی گه‌ڕامه‌وه‌
من و به‌ردێك …
من و تۆوێك
من و ڕووبارێكی وێڵ
هه‌مان دیرۆكمان نوسییه‌وه‌ .

 

    28/5/2011
                      ***

Previous
Next