Skip to Content

Saturday, August 13th, 2022

شووبات و ئه‌تڵه‌سێکی نوێ!!

Closed
by June 24, 2011 گشتی

* رۆحی لە باران پاکتری شەهیدان لە رۆحی هه‌ردی و سورکێوو هاوڕێکانیاندا زیندوودەبنەوە، نەک لە رۆحی تەختەئاسای بکووژاندا
* جوانییەکانی گیڤارا، گەرەنتیی نەبوون کە “ڤیدل” کاسترۆیەکی باشتر لەوەی هەبوو لێدەرچووبا
* ئێستا کۆمەڵانی خەڵک و دەسەڵات وەک بەر لە 17 ی شووبات ناڕواننە یەکتر
* ئه‌وانه‌ی بە جووڵاندنی هێزی سەربازیی پشت ئەستوورن، کاریان بە جووڵاندنی عەقڵەوە نییە
* ئه‌وان پێیان وایه‌ هەیبەتی حزب شکاوە، بۆ کڕینەوەی ئەم هەیبەتە، دەبێ هەیبەتی خەڵک بشکێنرێ
* چیتر ئەم نەوەیە لە خۆیدا پیشناخواتەوەو تەسلیم بەو حیکایەتانەش نابێ کە‌هیچی پێنه‌کرێ
* بۆ ئامرازی کووشتن (تفەنگ)، ئەوە گرنگ نییە به‌کارهێنەرەکەی بە چ زمانێک قسان دەکات. بەلای قوربانییەکانیشەوە جەللاد هەر جەللادە و ئاگریش هەر ئاگرە
* ئەوە مینتاڵیتێتێکی نەخۆش و دواکەوتووە، کە پێی وایە بکووژەکەی کورد بێ خۆشترە، نەک بێگانە
* گه‌ر ئێستا شاعیری 27 ساڵە…. زیندووبا، شیعرێکی بێکەسانەو فائیقانەی تووڕەو نوێی 20 (=7-27) ساڵه‌ی بە رووی پاشاکانی گەندەڵیی و ژەنەڕاڵەکانی شەڕی ناوخۆییدا ده‌خوێنده‌وه‌

ئەوەی لە شووبات – نیساندا قەوما، پرۆڤەیەک بوو بۆ هەردوولا.دەسەڵات بە خۆی و دەزگا سەرکوتکارەکانییەوە کە تابن ددانەکانیان چەکدارن، دەستیان بە خوێنی گەلەکەیان سوورکرد. لای کۆمەڵانی خەڵکی بێزاریش بە تایبەتی لاوان و خوێندکاران، کۆمەڵێک دەستەواژەو دروشم و متمانەو دەزگای سیاسیی و کەسایەتیی حزبیی و حکومیی، کەوتنە ژێر پرسیارەوە. ئێستا کۆمەڵانی خەڵک و دەسەڵات وەک بەر لە 17 ی شووبات ناڕواننە یەکتر.
لە ئاستی عێراق و ناوچەکەو جیهانیشدا، که‌م تا زۆر دەستەواژەی”عێراق”ەکەی ترو ئەو نیمچە ئازادییەی پەنجەی بۆ رادەکێشرا، شوێن بۆ دەستەواژەی دیکه‌ی وەک “کوردو جەللادی خۆماڵیی” و “ئەمانیش وەک ئەوانن” چۆڵ دەکات.
چالاکییەکانی رەوەندی کورد لەدەرەوەو، هاتنە دەنگی چەندان رێکخراوی جیهانیی پەیوەست بە مافی مرۆڤ و ئازادی رۆژنامەگەریی و رێکخراوی نه‌ته‌وه‌ یه‌کگرتووه‌کان و یه‌کێتیی ئه‌ورووپاو هاتنەسەرخەتی وەزارەتی دەرەوەی گەلێک لەو وڵاتانەی کە رەوەندی بەرچاوی کوردیان لێیەو، هەڵوێست وەرگرتنی ژمارەیەک حزب و ئەندام پەرلەمانی وڵاتانی ئەوروپا و ڕیسواکردنی تووندوتیژییە بەکارهێنراوەکانی دەسەڵاتی هەرێم و، بۆ یەکەمین جار هاتنە مەیدانی ناوی حکومەتی هەرێم بە دزێوییەکانی شووبات – نیسان و رەنگدانەوەیان لە میدیاو چاپەمەنییەکانی دنیادا، بە ئەندازەیەک پێگەی ئەم حکومەتەیان هێنایه‌ خوارێ ، کە چیتر دەسەڵاتداران ناتوانن وەک بەر لە 17 ی شووبات بە دەستبڵاویی و سەخاوەتەوە باسی بەجیاهەڵکەوتوویی هەرێم و بەرقەراربوونی ئازادیی و پاراستنی مافی مرۆڤ بکه‌ن .
ئێستا ره‌مزه‌ دەستڕۆیشتووەکانی گەندەڵیی وەک دوژمن دەڕواننە بەشێکی زۆری خەڵک و بەلای ئەوانەوە هەموو هاووڵاتییەک وەک پرۆژەی خۆپیشاندان تەماشا دەکرێ، بە بەشێکی زۆری دەزگا سەربازیی و پێگە کۆمەڵایەتییەکانی دوو حزبەکەشەوە.چونکە ئەوان دەزانن چییان کردووه‌و دڵنییاشن له‌وه‌ی هەر گۆڕان و وەرچەرخانێکی یه‌کلاکه‌ره‌وه‌ لە حوکمڕانییدا رووبدات و جڵەوی حوکم بەدەست ئەم دوو حزبەوە نەمێنێ، جا ئەوە بە فشارو خەباتی مەدەنییانە بەدیبێت، یان لە ئاکامی هەڵبژاردنێکی بێغەل و غەشدا، هەموو تۆمەتبارانی گەندەڵیی و بەرپرسانی تێکەڵ بە کووشتاری کۆن و نوێ رادەستی دادگا دەکرێن.
دەسەڵات و حزب و میدیاکانیان، کە بە جووڵاندنی هێزی سەربازیی پشت ئەستوورن، کاریان بە جووڵاندنی عەقڵەوە نییە. هەر بۆیە بە وتنی جیاجیا 19 ی نیسان بە سەرکەوتن دەزانن و پییانوایە دەبێ ئۆپۆزیسیۆن بە ئاڵای سپییەوە بچێتە هۆڵی گفتوگۆو میدیای ئازاد و چالاکوانانی مەدەنییش دەمکوت و تەمبێ و تۆبەپێبکرێن.
ئەو ره‌فتارو زه‌بروزه‌نگه‌ی هێزه‌ چه‌کداره‌کان که‌ له‌ شووبات و رۆژانی دواتردا په‌یره‌وکران، بەتایبەتی لە 19 ی نیسانەوە، درووست رەفتارو تینوێتیی کەسانێکە جگه‌ له‌ تۆڵەسەندنەوە به‌ هیچ شتێکی دی تینوێتییان ناشکێ. دەسەڵات پێی وایە لەم نێوەندەدا هەیبەتی حزب شکاوەو، لە بەرامبەردا بۆ کڕینەوەی ئەم هەیبەتە، دەبێ هەیبەتی خەڵک بشکێنرێ .
لەم پرۆڤانەدا کۆمەڵانی خەڵک بەتایبەتی نەوەی نوێ، سرووشتی زۆردارانەی ئەم دەسەڵاتەیان باشتر ناسیی و ئەو نیمچە متمانە و دوودڵیی و گومانەی کە پێشتر هەیانبوو، سێرکبازییە خوێناوییەکانی دەسەڵات بە خێراییەکی زەمەنیی هەمووی بۆ یەکلاکردنەوە .
ئێستا کۆمەڵانی خەڵکی ناڕازیی بۆ هەر دیاردەو بندیاردەو دەستەواژەیەک کە دەسەڵات بەکاریان دەهێنێ، ئەنجامگیریی خۆیان هەیە، کە بە پراکتیک فێری بوون، کەمتر بە خیتابی ئاگرین و سۆزهەڵدان لە خشتە دەبرێن.
بۆ نموونە کاتێک کە دەسەڵات باسی شەهید دەکات، ئەوان لە کۆدەکان تێدەگەن و دەشزانن شەهیدێک و حوکمڕانێک لێک ناچن، هه‌ر وه‌ک چۆن قەزافی له‌عومەر موختار ناچێ و، ڤیدل کاسترۆش له چی گیڤارا نه‌چوو . ‌.
کەس داوا ناکات کاسترۆ وەک گیڤارا بووایە، بەڵام جوانییەکانی گیڤارا، گەرەنتیی نەبوون کە “ڤیدل”کاسترۆیەکی باشتر لەوەی هەبوو لێدەرچووبا.

پرۆڤەکانی شووبات – نیسان، راستەوخۆ کاریگەرییان خستە ئەتڵەسیی بیرکردنەوەی نەوەی نوێوە. یەکێک لە پەیامە لەئاسایی بەدەر فکرهەژێن و ویژدان هێنانە قسەی ئەم نەوەیە ئەوەیە کە چیتر لە خۆیدا پیشناخواتەوەو تەسلیم بەو حیکایەتانەش نابێ کە ئه‌م نه‌وه‌یه‌ هیچی پێنه‌کرێ. ئێستا کۆمەڵانی خەڵکی ناڕازیی ئەوەیان بۆ رۆشنتر بۆتەوە، کە بۆنەمانی گەندەڵیی و لە پێناوی ئازادیی و دادپەروەرییدا، گەلێک لەوە زیاتریان پێدەکرێت، کە لە رۆژانی شووبات – نیساندا پیشانیاندا.
لەم پرۆڤانەدا کە هێشتا درێژەی هەیە، دەسەڵاتی هەرێم لەو هەموو کراس و پاڵتۆیانەی بە ناوی ئازادیی و پێشمەرگایەتیی و شەهیدو كوردایەتیی و ماددەی 140 ەوە…هتد، پێشتر خۆی پێ پۆشیبوون ‌‌‌‌‌‌‌، رووتکرایه‌وه‌و ئێستا هەر ئەو کراسە نیوقۆڵە تریکۆیەی لەبەردا ماوەتەوە کە دەسەڵاتی پێ دەناسرێتەوە. هەر ئەو کراسەی کە حکومەتی بەغدادی داپۆشیوە، بە یەک جیاوازییەوە ئەویش زمانە. لێرەشدا زمان هیچ رەهەندێکی فەلسەفیی و کولتووریی نییە، چونکە بۆ ئامرازی کووشتن (تفەنگ)، ئەوە گرنگ نییە به‌کارهێنەرەکەی بە چ زمانێک قسان دەکات.بەلای قوربانییەکانیشەوە جەللاد هەر جەللادە و ئاگریش هەر ئاگرە. ئەوە مینتاڵیتێتێکی نەخۆش و دواکەوتووە، کە پێی وایە بکووژەکەی کورد بێ خۆشترە، نەک بێگانە.
شەپۆلەکانی ئازادیی، وەڵامدانەوەیەکی سرووشتیی ئەو قەیرانە قووڵە خنکێنەرە بوو، کە سەرتاپای پڕۆسەی سیاسیی و کۆمەڵگەی گرتۆتەوە. خودی قەیرانەکەش بەرهەمی 20 ساڵی رێبازی چەوت و سیاسەتی زیانبەخش و شیتایەتیی هەڵگیرساندنی شەڕی ناوخۆیی و کارەساتی گەندەڵییە، کە بە پلەی یەکەم هەردوو حزبی حوکمڕانی ئێستا و سەرکردایەتییەکانیان خوڵقێنەرو داهێنەریان بوون .
بە فەرمیی لەساڵی1998 ەوە شەڕی ناوخۆیی کۆتایی پێهاتووە، بەڵام ئەو هێزانە کێن کە 13 ساڵە بە سیاسەتی “رۆژە رۆژە” و بۆ پاراستنی بەرژەوەندییە تازەپەیدابووەکان بوونەتە لەمپەر لەبەردەم بە دامەزراوەیی بوونی دەوڵەت و پێکهێنانی حکومەتێکی ئەوتۆدا کە لەیاقەتی ئەوەی هەبێ نه‌ک هه‌ر سێ پاریزگاکه‌ به‌ڵکو تەواوی ناوچە دابڕاوەکانیش بخاته‌ ژێر ده‌سه‌ڵاتی خۆیه‌وه؟!.‌
داخوا ئەو عەقڵێتە سیاسیی و بەرژەوەندییانەی که‌یەک ئیدارەیی لەم سێ پارێزگایەدا ناخوازن، نه‌بوونه‌ته‌ ‌مەترسیی بۆ له‌دەستدانی ناوچە دابڕاوەکان؟
چ بەرژەوەندییەکی گەلی باشوور یان گەلی کورد لە سەرانسەری کوردستان و جیهاندا، لە درێژەدان بەم مۆدێلە حوکمڕانییەی هەولێردا هەیە؟
* * *
ئەوەی ئەم دوو حزبەو دەسەڵاتەکەیان بە کۆمەڵانی خەڵکی ناڕازیی شاری سلێمانی و دەڤەری گەرمیانی کەرکووک و کۆیەی هەولێر، لە روژانی شووبات نیساندا کردیان و لە هەندێ ڕووەوە هێشتا درێژەیان هەیە، بە پێچەوانەی لێکدانەوەکانی دەسەڵات، تێکشکانێکی یەکجار گەورە بوو بۆ ئەم دوو حزبەو سکێچە حوکمڕانییەکەیان .
ئەگەر ئێستا مەلیک مەحموود کە یەکێکە لە ره‌مزه‌ جوانەکانی خەباتی رزگاریخوازیی ئێمە زیندووبێتەوەو ئەم رەفتارانەی دەسەڵات پێڕەو بکات، بە دڵنییاییەوە گەله‌کەمان به‌تایبەتی دانیشتوانی سلێمانی کە لەو دوو مانگەدا شارەکەیان کرابووە سەنتەری سێرکبازییە خوێناوییەکانی دەسەڵات، لێی خۆشنابن .
گەرچی جیاوازیی مەلیک مەحموود تامرد و ئەمان کە ئێستا لەناوماندا دەژین و حوکممان دەکەن زۆرە. شیخی شێخان تا مرد چاوی لە رزگاریی و بە دەوڵەتبوونی کوردستان بوو. هەرچی ئەمانن لەوەتەی هەن مەراقی حوکمکردن و بەشداریی حوکمکردنی کوردستان بوون و هەن .
گه‌ر ئێستا شاعیری 27 ساڵە…. زیندووبا، شیعرێکی بێکەسانەو فائیقانەی تووڕەو نوێی 20 (=7-27) ساڵه‌ی بە رووی پاشاکانی گەندەڵیی و ژەنەڕاڵەکانی شەڕی ناوخۆییدا ده‌خوێنده‌وه.‌

ئەگەر بۆ چرکەیەک کۆنسێپت و دەستەواژەی (دۆناودۆن) به‌کار بهێنین و دیمەنی سەراکانی ئازادیی و شەهیدانی خۆپیشاندەر و هەردوو تەرەفی ململانێکان، بە دیمەنەکانئ ئەیلوول 1975-1961 و ساڵانی دواتر تا راپەڕین بەراورد بکەین. رۆشنتر ئەوەمان بۆ دەردەکەوێ کە رۆحی لە باران پاکتری شەهیدان لە رۆحی هه‌ردی وسوورکێوو هاوڕێکانیاندا زیندوودەبنەوە، نەک لە رۆحی تەختەئاسای بکووژاندا. داخوا کێ دەبێتە درێژەدەری پەیامی پێشمەرگایەتیی و مقاوەمەت، لە پێناوی ئازادیی و مافی مرۆڤ و دادپەروەرییدا، تەقەکەران، یان تەقەلێکراوان.

Previous
Next