Skip to Content

Monday, August 15th, 2022

عه‌تری ئه‌و عاشقانه‌ی مردن

Closed

*
بخوێنه‌وه‌ .. مه‌خوێنه‌وه‌ :
ته‌نیا ئه‌وه‌ نه‌بێ‌ كه‌ شه‌هوه‌تی نوسینت لا به‌رپا ده‌كا .

*
له‌ش و لاری هات .. له‌ش و لاری رۆیشت :
هه‌ندێ‌ ئه‌ندامی ، شایه‌تن بۆ من .
هه‌ندێ‌ ئه‌ندامی ، شایه‌تن له‌سه‌رم .

*
له‌ دابونه‌ریتی میلله‌ته‌ كۆنه‌كان ، روخساری هه‌ندێ‌ خواوه‌ند ماسكی ئاژه‌ڵیان هه‌بوو !
ئایا ئه‌مه‌ ده‌ربڕینێك بوو بۆ یه‌كانگیری له‌گه‌ڵ غه‌یبدا ،
یان یه‌كانگیری له‌گه‌ڵ واقیع ؟
له‌وه‌ ده‌چێت ، هونه‌رمه‌ندانی ئه‌و میلله‌تانه‌ ته‌نیا ئه‌و شتانه‌یان داده‌هێنا
كه‌ لێی ده‌ترسان !

*
باوك ..
ئه‌و ره‌گه‌یه‌ ، كه‌ هیچ ره‌گێكی نییه‌ .

*
له‌به‌رچی ره‌ش ده‌پۆشێت ؟
بۆ زمانی عه‌ره‌بی ؟ بۆ عروبه‌ت ؟ بۆ عه‌ره‌بان ؟
به‌هه‌ر حاڵ ..
ئه‌م سه‌رده‌مه‌ ، ته‌نیا ره‌شی لێ‌ ده‌وه‌شێته‌وه‌ .

*
ئه‌وه‌ی من گوتوه‌مه‌ ئابڵۆقه‌ی نه‌داوی ،
ئه‌وه‌ی تۆ نه‌تگوتووه‌ ، ئابڵۆقه‌ت ده‌دا !
بیڵێ‌ .. با بزانین چی ده‌بێ‌ ،
بۆ له‌مڕۆدا خۆت له‌ شتێكدا ده‌شاریته‌وه‌ ،
كه‌ سبه‌ینێ‌ ، دێت و ئاشكرای ده‌كا ؟

*
كه‌ی جورئه‌ت ده‌كه‌ی پووچی له‌و قه‌بره‌ ده‌ربێنیت ،
كه‌ خۆشه‌ویستی هه‌ڵیكه‌ندووه‌ ؟

*
له‌ ژیانیدا ، زۆر شتی له‌ ناخی خۆیدا به‌ند كردبوو ، كه‌ ببوونه‌ له‌مپه‌ری نێوانی خۆی و ئازادی . ماوه‌یه‌كه‌ یه‌ك له‌ دوای یه‌ك ئازادیان ده‌كا . ئه‌مڕۆ له‌ ئازادكردنی به‌شێكیان په‌شیمان بوویه‌وه‌ ، بۆ نمونه‌ : په‌شیمانه‌ له‌ ئازاد كردنی ناسینی كه‌سانێك ، به‌ براده‌ری له‌ قه‌ڵه‌مدابوون .

*
ئه‌وه‌تا ، ئه‌و كه‌سه‌ی كار بۆ ئازاد كردنی خه‌ڵك ده‌كا ،
تاوه‌كو به‌ هۆیه‌وه‌ خۆی له‌ ئازاد كردنی خۆی بدزێته‌وه‌ !

*
چه‌ندی زانینی له‌باره‌ی ژیانه‌وه‌ زۆرتر ده‌بێ‌ ، ژیان سه‌ختتر و ئاڵۆزتر دێته‌ به‌رچاو ،
ئه‌و نهێنیه‌ چییه‌ وا ده‌كات مرۆڤ خه‌یاڵ بكات ، كه‌ زانین جۆرێكه‌ له‌ نه‌زانین ؟

*
كات لێره‌ ، له‌ ژیانی عه‌ره‌بدا
مه‌یلێكی زۆری هه‌یه‌ بۆ ئه‌وه‌ی ببێته‌ شوێن !

*
ئه‌رێ‌ هیچ به‌ختێك هه‌یه‌
بۆ خودی ئه‌و زاره‌ ئاڵۆزه‌ی ، به‌خت ده‌خوێنێته‌وه‌ و دابه‌شی ده‌كا ؟

*
هه‌میشه‌ بیر له‌ مردن ده‌كاته‌وه‌ /
بۆ ئامانجێك :
تا قسه‌ له‌باره‌ی ژیانه‌وه‌ تازه‌كاته‌وه‌ .

*
به‌رده‌وام بڵێ‌ : نه‌خێر .
ره‌نگه‌ وشه‌ی ( به‌ڵێ‌ ) ته‌نیا له‌ دوایین میوان بوه‌شێته‌وه‌ :
مردن .

*
ده‌سته‌ و كۆمه‌ڵ هیچ مانایه‌كیان نییه‌ ،
ته‌نیا به‌ وه‌سفی تاك نه‌بێت .

*
له‌وه‌ته‌ی له‌ خه‌ڵك دوور كه‌وتۆته‌وه‌ ،
هه‌ست ده‌كا نزیكتره‌ لێیانه‌وه‌ و باشتریان ده‌ناسێت .

*
له‌ناو خوێنیدا ، سه‌فه‌ر هێرشی بۆ دێنێ‌ ،
له‌ هه‌نگاوه‌كانیدا ، هێرشی بۆ دێنێ‌ ، گه‌ڕانه‌وه‌ !

*
هه‌ر له‌ باره‌ی ( گۆڕان ) ه‌وه‌ قسه‌ ده‌كا ،
ته‌نیا مامه‌ڵه‌ له‌گه‌ڵ ( وه‌ستان ) یش ده‌كا ،
هه‌ر هیچ نه‌بێ‌ با دڵسۆز بێت ، بۆ ئه‌و وشه‌یه‌ی به‌رده‌وام له‌سه‌ر زاریه‌تی !

*
زۆر جار لێكتێنه‌گه‌یشتن ،
قووڵبونه‌وه‌ی تێگه‌یشتنه‌ ، له‌ باره‌ی شته‌ خراپه‌كانه‌وه‌ .

*
خۆی پێ‌ سه‌رۆكه‌ ،
ناشتوانێت بڕوات ، ته‌نیا به‌ پێی خه‌ڵك نه‌بێت !

*
شاعیرێكه‌ به‌س به‌ غوباری رق ده‌ژیت ،
به‌م شێوه‌یه‌ هه‌ر كاتێك ده‌ڕوا ، زمانی له‌به‌ر پێیه‌كانیه‌تی .

*
ده‌بوایه‌ له‌ كۆتاییه‌كانی سه‌ده‌ی بیسته‌مدا  بمرێت ، یان هیوای وابوو .
ئایا ئه‌مه‌یه‌ وا ده‌كا  له‌مڕۆدا  هه‌ستبكات له‌ سه‌ده‌ی بیست و یه‌كدا نیشته‌جێ‌ نییه‌ ؟
هه‌ستبكات تیایدا بوونی نییه‌ ، ته‌نیا وه‌ك په‌ڕاگه‌نده‌یه‌ك نه‌بێت ؟

*
كاتێك ماوه‌یه‌كی درێژ شیعر نانوسێت ،
هه‌ست ده‌كا موسافیرێكی شه‌كه‌ته‌ و خه‌ریكه‌ له‌ تینوێتیدا بخنكێت .

*
هه‌ر كاتێك .. چووه‌ سه‌ر چرپا بۆ خه‌وتن ،
پێی خۆشه‌ بۆ خۆی ، به‌ خۆی بڵێت :
خۆشه‌ویستی له‌ش و لاری روناكییه‌ و
سێكس ده‌مارێكه‌ له‌ جه‌سته‌ی شه‌و .

*
مرۆڤ قامیشێكی ده‌گمه‌ن و به‌رزه‌ ، بۆ نوسینه‌وه‌ی زه‌وی .
به‌ چ عه‌قڵێك ده‌یانه‌وه‌ێت بگۆڕێت بۆ مه‌ركه‌بێك
 له‌ مه‌ره‌كه‌به‌كانی غه‌یب ؟

*
پرسیاره‌كانت بكه‌ ،
له‌ هه‌موو شوێنێكیش به‌ شوێن وه‌ڵامدا بگه‌ڕێ‌ :
ته‌نیا له‌ناو كتێبان نه‌بێ‌ .

*
ئه‌و منداڵه‌ی له‌ ناخمدایه‌ ،
هه‌میشه‌ ئاره‌زووی یاخیبونی هه‌یه‌ له‌سه‌ر ئه‌و پیره‌مێرده‌ی كه‌ خۆمم ،
ئه‌مه‌ و گرفتێكیش هه‌یه‌ :
ئه‌و منداڵه‌ پێی وایه‌ جیهانیش وه‌ك خۆیه‌تی و
له‌ قۆناخه‌كانی یه‌كه‌می منداڵییه‌ !

*
جیهان / له‌م ساته‌دا لای ئه‌و .. له‌وه‌ ده‌چێت :
كه‌ گالیسكه‌یه‌كه‌ و ئه‌سپه‌كانی په‌ستی رایده‌كێشن ،
گالیسكه‌یه‌ك : پڕه‌ له‌ عه‌تری ئه‌و عاشقانه‌ی مردن .

*
دوێنێ‌ چرایه‌كی داهێنا .
ئه‌مڕۆ به‌ روناكیه‌كه‌ی په‌ست ده‌بێ‌ !

*
پۆلێك نه‌وره‌س ، له‌سه‌ر شه‌پۆلدا پاڵكه‌وتوون :
ده‌بێ‌ چ نامه‌یه‌ك بۆ كه‌نار بنوسن ؟

Previous
Next