Skip to Content

Monday, August 8th, 2022

داوی هاتنا شعره‌كێ‌

Closed

 

پێكێ‌ دوێ‌ یه‌ دڤێ‌ ئێڤارێ‌ دا ژ ده‌ستێ‌ من دكه‌ڤیت و درژیت…
 ببوره‌ كو ئه‌ز نه‌شیایم رێ‌ ل هاتنه‌ خوارا روندكێن ته‌ بگرم…
ژیان كچه‌كا خاپینوكه‌ و یارییان ل سه‌ر مێزه‌ییا مه‌ دكه‌ت…
 ده‌ما بێهنا ره‌شه‌ ریحانێن سینگێ‌ ته‌ نقومی پێكێ‌ خوه‌ دكه‌م و دادعویرم! هه‌ست ب شێتبونه‌كێ‌ دكه‌م، هیچ شه‌رابه‌ك نه‌ شێت من ژڤێ‌ بێده‌نگیێ‌ ده‌ربینیت…

خو ئه‌گه‌ر عشق په‌نجه‌ره‌یه‌كا شوشه‌ی ژی با، ب تكێنا به‌ره‌كی ده‌رز نه‌ دكه‌ڤتنێ‌ و… هتد

دگه‌ل تێلێن گیتاره‌كا ل به‌ر تیروژكا حه‌تاڤێ‌ پێتیبوی
تو چ ئاواز ژ من دخوازی؟
تو یا فێری ستران گوتنێ‌ و ریتمێن خه‌مگین بوی
هه‌ر چ نوته‌یه‌ك من هه‌ی
من یا به‌لاڤه‌ی گونه‌هێن خوه‌ یێن بێ‌ دوماهی كری و…. 

برین سه‌مایێ‌ دله‌شێ‌ من دا دكه‌ن
ژمارا وان
ژ هژمارا په‌نجه‌ره‌یێن باژێری زێده‌ترن
ل سه‌ر هه‌ستیێن من بیابانه‌ك برێڤه‌ یه‌
ئه‌ڤه‌ تو  دبه‌رپه‌رێن من دا نه‌مای
ئه‌ز دتاریێ‌ دا شاپه‌رێن روناهیێ‌ ڤێكدده‌م
ئه‌ز وه‌ستیام
هه‌بونه‌ك بوم و روژ من ئاڤا دبه‌ت
چه‌ند تو یا دخه‌یالا من دا و
چه‌ند دناخێ‌ خوه‌ دا لته‌ دگه‌ریێم
نه‌شێم زێده‌تر بشكورینان داهێنم
كه‌نی دفه‌رهه‌نگا من دا نه‌ما یه‌
چه‌ند ئه‌م ل قه‌ده‌رێ‌ دگه‌رین
هه‌ر (قه‌ده‌ر)ه‌  مه‌ دنڤیسیت
هه‌كو خه‌ونان ژێ‌ دبینم
تو هشیار دبی و
هه‌كو تو خه‌ونان دبینی، ئه‌ز هشیار دبم!
هه‌می تشته‌ك برێڤه‌یه‌
تو  دمن دا ژ دایك دبوی و
تو یا ژ هزرێن من تافیل دبی
هه‌می شعرێن من ژی
 ژ ته‌نه‌ یان ل سه‌ر ته‌نه‌..
هه‌ر وه‌كو لبیرا منه‌
ئه‌و تشتێن من حه‌ژێدكرن
دناڤ باخچه‌كێ‌
 گه‌له‌ك مه‌زن دا بون
هه‌می گول تێدا درویس بون
مه‌ شه‌ڤ ل ئێك و دوو خوش دكرن
بتنێ‌ ئه‌ز نوبه‌ردارێ‌ وی باخچه‌ی بوم
باش لبیرا منه‌
من بو ته‌ بویكێن پاته‌یی چێدكرن
دشه‌ڤێن درێژ دا
مه‌ ستێر ب به‌ندكان ڤه‌دكرن
ده‌ما ئه‌ز ژ خه‌و رادبوم
ئه‌م پێكڤه‌ رادبوین
ئه‌ز بخوه‌ دچووم، تو بخو دچووی
ئه‌ز لته‌ دگه‌ریام و تو هه‌بوی
من لخوه‌ دگه‌ریا
ئه‌ز نه‌بوم!
ئه‌ز رویس دكه‌تم سه‌ر كه‌له‌خێ‌ خوه‌
نیڤه‌ك عه‌رد و نیڤه‌ك عه‌سمان…

ئه‌ڤه‌ نه‌ شه‌ڤا وی یا داویێ‌ بو، به‌لكو دوماهی پێك بو شعر تێدا نڤیسی.. من دگه‌ل وی شه‌ڤێن ژڤێ‌ بێده‌نگتر برینه‌ سه‌ر، بتنێ‌ جوداهیا ڤێ‌، تابلویێ‌ مێزه‌ییا دان و ستاندنێ‌ بو و ئه‌و زه‌نگا په‌ردا بێده‌نگیێ‌ ددراند، (ڤایه‌ ئه‌زێ‌ هه‌رم ته‌ بهێلم ل ڤر، جاره‌كا دن ئه‌ز و ته‌ هه‌ڤد و نابینن)، كو د 4 خوله‌ك و 48 چركه‌ییان دا ب داوی دهات! نزانم بو جارا چه‌ندێ‌ بو ئه‌ڤ زه‌نگه‌ دگوهێ‌ وی دا ده‌نگ ڤه‌ ددا و دهاته‌ دوباره‌ كرن، تابلویه‌ك بو، ئه‌و په‌یڤێن بو بێده‌نگیا ته‌ هاتینه‌ نڤیسین، سه‌رێن هه‌میان هاتبونه‌ برین..

به‌سه‌ ئه‌ی شه‌ڤ
به‌س تارییا خوه‌ بگڤێشه‌ ناڤ پێكێ‌ من
ئه‌ز و سه‌ودایێ‌ سه‌رخوشیێ‌ و نڤیسینا شعران بوینه‌ دوو به‌ره‌یێن جودا
گه‌ر  ته‌ بڤێت بشكورینه‌كێ‌ دناخێ‌ من دا بكه‌یه‌ تابلو و
 ژیانا من تێدا بهلاویستی ببینی!
ته‌ماشه‌ی نهومێن ئاڤاهیێ‌ وه‌ستیانا من بكه‌
پێكێ‌ من پره‌ ژ ته‌نهاتیێ‌
تو مێهڤانا سه‌دان خه‌یالێن من بوی و
دهه‌میان ژی دا
من داوی ب نڤیسنا شعرێ‌ ئینا و
نه‌ شێم چ دی، ته‌ بكه‌مه‌ په‌ناگه‌هـ بو نڤیسینا شعرێن خوه‌
هه‌ره‌ بێ‌ خاتر خواستن من بهێله‌ و بێ‌ ڤه‌گه‌رییان….

عبدالرحمن بامه‌رنی ـ دهوك

Previous
Next