Skip to Content

Friday, March 29th, 2024
فانی ته‌واوکه‌ری قوتابخانه‌ی شیعریی نه‌ته‌وه‌یی خانی و حاجی قادری کۆیی2

فانی ته‌واوکه‌ری قوتابخانه‌ی شیعریی نه‌ته‌وه‌یی خانی و حاجی قادری کۆیی2

Closed
by November 12, 2011 ئەدەب

شیعر و ئه‌رکی ئینسانی و نه‌ته‌وه‌یی لای فانی

 وەک هەر جیهانبین و رۆشنبیرێکی گەورە، فانی  زانین وەک پرۆسەیەکی دنیاناسیی پڕپەل و گشتگیر سەیر دەکات  کە ناسینی دەرەوە لە رێگای خۆت (ناوەوە) و ناسینی خۆت لە رێگای دەرەوە و (ئەوانی دی)، میکانیزمی ئەو پرۆسەیە پێک دێنێ .(ئه‌وی دی) فانی لە سەرەتاوە  دەسەڵاتی دەرەبەگایەتی ئەوسا کۆبەندی دەرەبەگایەتی بە گشتی، ئەوسا کۆمەڵی نەزان و دواکەوتووی کورد بە گشتی و ئەوسا بێگانە و ئیستیعمار و نەتەویی بوو. (فانی وشه‌ی نه‌ته‌ویی بۆ شۆڤێنییه‌تی ره‌گه‌زپه‌رست به‌کاردێنێ)،  ئەوسا بەعس و هێزی داگیرکەر.. لە هەموو ئەمانەدا فانی وەک (خودێکی تاک) بەرامبەریان دەوەستێ: واتە فانی کەسێکی تاکە، بێ وێنەیە، نموونەیە، چونکە ئەمانە هیچیان نییە، چونکە جیایە لەو (ئەوانی دیکە) ی کە دەستنیشانیان دەکا. فانی خۆی ئەو دەور و ئه‌رکیارییه‌ مێژوویی و بیرییە جیایەی خۆی بە قووڵی هەست پێدەکا و بەوردی و روونیش لە زۆر هۆنراوەدا دەستنیشانی دەکات. ئەوەی دەبێتە گەورەترین  دایلێما (کێشەی لە چارەسەر نەهاتوو) ی ژیانی پێوەندی خۆیەتی وەک (کورد) بە گەلە کوردەکەیەوە
ئەو لەو گەلەشەو لەو گەلەش نییە، ئەو لەو گەلەیە چونکە (کورد) ه‌. بەڵام ئەو (کوردێتی) یەی ئەو، ئەو (کوردێتی) یەی گەلەکەی نییە. بەمانایەکی دی فانی کوردە، بەراست کوردە و کوردێتییەکەی مانای راستی زانگەریی و ئایدیۆلۆژی و مێژوویی خۆی وەرگرتووە، نه‌ک ته‌نیا راستییه‌کی ئه‌نترۆپۆلۆجی بێ.
ئەو کوردە وەک کوردێکی نەتەوەیی پێشکەوتنخواز کە ئازادی نەتەوەیی و پێشکەوتنی کۆمەڵیی لێک جیاناکاتەوە، وەک نەتەوەخواز (قەومیی) بەستانداردی ژیان و مێژووی پێشکەوتنی گەلان و جیهانی سەردەم. بەڵام گەلەکەی نەگەیشتوونەتە ئاستی ئەو (کورد بوون) ە لەبەر ئەوە نا کە کوردی تەواو نین، زمان و خاک و کەلتوور و رەوشتیان کوردانە نییە، بەڵکو لەبەرئەوەی (کوردن) تەنیا وەک کەرەسەی خاو، وەک هێزێک (خۆی لە خۆیدا)،نەک (خۆی بۆ خۆی)..وەک هێزێک کە بێگانە دەتوانێ بەکاری بێنێ، بەڵام ئەو خۆی بۆ بەرژەوەندی مان و نەمانی خۆی ناتوانێ خۆی بخاتە گەڕ چونکە خۆناس و دوژمنناس نییه‌..
 بە کورتی فانی کوردێکی زانا و هۆشیارە، زیاد لەوەش ئەو زانایی و هۆشیارییە وەک شاعیر و ئەدیب دەردەبڕێ و دەبێتە رێبەر و رێنیشاندەر و سەرکرده‌.
بەڵام گەلەکەی (کوردی ناهۆشیارە). کەرەسەی خاوە، لە کوردێتی و هەلومەرجی کودبوون حاڵی نییە و لە ناو بۆتە و چوارچێوەیەکی خەرافی  گیر بووە و تێگەیاندن و گۆڕینی زەحمەتە بەبێ دەسەڵات، دەسەڵاتیش بەبێ (زانین) دەست نایە. زانینیش بەبێ دەسەڵاتێک کە بەرنامە و پرۆگرامی بۆ دانێ بەدەست نایە. ئەمە جوغزی ئەو بۆشایی و بێهیوایی و ئاسنی سارد کوتانەیە، کە فانی خۆی تێدا دەبینێتەوە کەچی لەبەر باوەڕی بەرزیی و کەسێتی بەهێزیی و نەتەوەپەرستی نموونەیی خۆی هەرگیز کۆڵنادا و نابەزێ و بەتەنیا و تاقەسوارە بەرامبەر ئەو هەموو دڕەندەیی و گەندەڵییەی کۆمەڵەکەی دەجەنگێ
فانی، وه‌ک خانی،  هەر لە یەکەم پشکوتنی زمانی شیعرییەوە خۆی بە شاعیری گەلەکەی دادەنێ و پەیامی پێشخستنی کۆمەڵایەتی و هۆشیارکردنەوە و هاندان و بەرنامە دانان بۆ رزگاری نەتەوەیی بۆ ژیانی خۆی هەڵدەبژێرێ. ئەم دەورەش بەسەریا دەسەپێسنێ لە کۆمەڵەکەی جیا بێتەوە بۆ ئەوەی لە دەرەوە را بیانبینێ و بتوانێ رێبەرییان بکا.
ئه‌حمه‌دی  خانی له‌ پێشوتاره‌ نه‌ته‌وه‌ییه‌که‌یدا خۆی به‌ کوردێکێ ساده‌ی شاخیی که‌ناریی ده‌ناسێنێ که‌ سه‌رچاوه‌ی سرۆش و بابه‌ته‌که‌ی له‌ ژیانی کورده‌واری وه‌رگرتووه‌:
کورمانجم و ، کوهی و که‌ناری
ڤان چه‌ند خه‌به‌رێد کورده‌واری (به‌یتی 357، هه‌ژار، 1989)
ده‌رده‌دڵی (خانی) له‌ سه‌ره‌تاوه‌ نه‌بوونی زمان و زانین و فرامۆشکردنی ئه‌ده‌ب و که‌لتووری نه‌ته‌وه‌که‌یه‌تی له‌ لایه‌ن میران و ده‌سه‌لاتدارانی گه‌له‌که‌یه‌وه‌، ونبوونی ناوو په‌یامی جزیری و حه‌ریری و فه‌قێ ته‌یران. فرامۆشکردنی په‌یام و کاره‌ پیرۆزه‌ رێچکه‌شکێنه‌که‌ی خۆشی.، که‌ به‌راستی تا ئێستاش هه‌ر گرنگییه‌کی ئه‌وتۆی پێنه‌دراوه‌.
 فانی – ش خۆی به‌ قه‌له‌نده‌رێک و مسکێنێکی کورد ده‌زانێ، که‌ هه‌رچی هه‌یه‌تی له‌ نوتقه‌وه‌ تا هه‌موو هێزو توانستێكی هۆشیی و رۆحی، هێزی زانین و هۆشیارییی، ده‌خاته‌خزمه‌تی پرۆژه‌ی زیندووکردنه‌وه‌و هه‌ستانه‌وه‌ی نه‌ته‌وه‌یی یه‌وه‌ به‌و چه‌شنه‌ی (خانی) خه‌ونی پێوه‌ بینی و حاجی کردیه‌ به‌رنامه‌و قوتابخانه‌ی بیری نه‌ته‌وه‌یی.
فانی له‌ سه‌ره‌تاوه‌ ده‌ری ده‌بڕێ که‌ ئه‌و ئاغا نییە،کوێخا نییە،سەیدو مەلانییە،توجارو بازرگان وسەرمایەدار نییه‌،
کوردێکی سادەو قەلەندەرە ،بەڵام وەک کوردە سادەو قەلەندەرەکانیش نییە. چونکە(فانی)  بە هۆشیارییەوە کوردی قەلەندەرەو شوێنی خۆی لە کۆمەڵ و ژیان و مێژوودا دەزانێ،ئەوان نەزانن و نایزانن و نایەنەوێ بشزانن
باسەیری هەندێ شیعری خۆناسینی فانی بکەین
هۆنراوەی ( دەڵێم بیڵێم و ناوێرم) لە هۆنراوەکانی سەرەتای شیعر نووسینیەتی لەسییەکاندا لە کۆتایی ئەو هۆنراوەیەدا دەنووسێ:
ئەتۆش (فانی) هەتا ماوی                خودا نوتقێکی پێداوی
لەچاکەی گەل نەکەی خاوی                دەڵێم بیڵێم و ناوێرم
((نوتق)، قسەکردن،وشە،ئاخاوتن بە بەهرەی خودایی دەزانێ. نرخی ئەو بەهرەی ئاخاوتنە دەزانێ وهەر لەسەرەتاوە ئەو پەیامە بۆخۆی دەست نیشان دەکا کە(ئاخاوتن) بکا بەئامرازێک بۆ (چاکەی گەل) کەوایە پەیامی وشەو بیر لای فانی پەیامێکی رەخنەیی ،چاکەکاری،ریفۆرمیستە هەر وەک چۆن هۆنراوەی (دەڵێم بیڵم و ناوێرم) خۆی نموونەیەکی سەرەتایی بەهێزی بەکارهێنانی ئەدەبە بۆ چاکەی گەل لە رێگای هەڵبژاردنی فەلسەفەی رەخنەی کۆمەڵایەتی و سیاسییەوە.
(فانی) گەرچی نرخی خۆی وەک تاکە سوارەی زانین دەزانێ  و بە رەوانبێژی و شیعر دەست پێ دەکا، قەت لە هیچ کاتێک و بۆنەیەکدا خۆی لەناوجەرگەی گەلەکەی و رەش و رووتەکانی جیا ناکاتەوە و بەو پەڕی ساکاری و بێفیزییەوە خۆی تەنیا نەک بەکوردێکی ئاساییش بەڵکو بە قەلەندەرێکی کورد دادەنێ : لە هۆنراوەی (بۆ پاکی نییەت) کە وەک پاکانەکردنێک بێ بۆ کۆمەڵەکەی کە ئەو چییەو بۆچی دەستی داوەتە نووسینی (ئەم هۆنراوەش بۆ سەرەتای شیعر نووسینی دەگەڕێتەوە و لەکۆتایی سییەکاندا(نووسراوە) دەڵێ:
ناڵێم نییە سانیم لە گرۆهی ئودەبا دا
کوردێکی قەلەندەرم و لەدەستەی ئودەبا نیم
ئەم شیعرە سیلاحی منە بۆ چاکە و ئیسڵاح
غه‌یره‌ز ئەمە چارەم نییە مسکێنم و شا نیم
بەراستی ئەو دوو بەیتە شیعرە تەواوی فەلسەفەی ژیان و کەسێتی بەرز و مرۆڤایەتی (فانی) کە بەقسە و کردەوە بەدرێژایی ژیانی نواندی، دەرده‌بڕن.
فانی لێرەدا ئاوا خۆی دەناسێنێ:
کوردێکی قەلەندەر
مسکێن نەک شاە
تازە ئەدیب کە خۆی لە دەستەی ئودەبا ناژمێرێ.
بەدڵ چاکەی کۆمەڵی دەوێ و دەیەوێ  به‌ چەکی شیعر ریفۆرمی بکا. 
شیعری وەک چەکێک، ئامرازێک، بۆ ئامانجی چاکە و ریفۆرم هەڵبژاردووە.
واتە لێرەدا شاعیرێتیی (وەک دەربڕینی توانستی ئەدەبی بۆ مەبەستی ئەدەب) جیا دەکاتەوە لە پڕۆژەی بیری و ئایدیۆلۆژی و چاکەکاری کۆمەڵ کە  (شیعر) دەوری چەکی هۆشیارکردنەوە، تێگەیاندن و رەخنە و رووخاندن و دروستکردنەوەی تێدا بینێ.
لە رووی سایکۆلۆژی و بیری و کۆمەڵایەتیشەوە، هەر ئەو راستییەی کە لەو سەردەمەدا فانی بە ئاشکراو بوێرانە خۆی لەگەڵ بەشی هەرە زۆری گەلەکەی کە (مسکێنە) دەناسێنێ، کارێکی مرۆڤانە و شۆڕشگێڕانەی بێ وێنەیە..بۆ کەسێکی پەروەردەی نیزامی عەشایری و ئاغاگەریی تەنانەت ئێستاش رەنگە بەزەحمەتی بزانێ بڵێ: مسکێنم.
فانی لە رووی چینایەتییەوە ئەمە ناڵێ. فانی مسکێن و ئاغا و مەلا و شێخ و سەید و عەشایر و شوان توجار و مامۆستا و هتد..هەمووی بە کورد و بەمرۆڤی یەکسان دەزانێ. (کورد بوون) بنچینەی خۆناسین و بەمرۆڤ بوونی مرۆڤی کوردە. بۆیە خۆناساندن بە (مسکێن) خۆناساندنە بە کوردی قەلەندەر و چەوساوە کە فانی بۆ چاکەی ئەوان بیر و قەڵەم و کردەوەی ژیانی تەرخان دەکات.
ئەم بیرۆکەی بەکارهێنانی وشە بۆ چاکە و گۆڕینی کۆمەڵ و دەوری مێژوویی خۆی وەک چاکەکار و بگۆڕێکی رادیکاڵ، لە زۆر هۆنراوەیدا، لە تەواوی پرۆسەی ژیان و شیعریدا دووبارە دەبێتەوە.  پرۆژەی چاکسازیی (فانی) ش سەر و بەر، تەنیا تەنیا، پرۆژەی خوێندەوارکردن و هۆشیارکردنەوە و زانیار کردنی گەلە. ئەمە هەنگاوی یەکەمە. مەرجی یەکەمە. چارەی یەکەمە. بەرنامەی یەکەمە. بەبێ ئەو هەرهەنگاوێکی دی خۆتڕێنە و چەواشەکەری ژیان و مێژووە. بۆیە لە شیکردنەوەی دوایدا فانی دەبێتە (کوردی زانا) و  هەموو گەل و کۆمەڵەکەش (کوردی نەزان) و بەم شێوە پێناسە و پێوانەی خۆی بۆ کورد بوون دیاری دەکا: نە ئەسل و فەسل  گرنگە، نە دەسەڵاتی گەمژانە، نە دەوڵەت و سامان، تەنیا زانینە پێوانەو مەرجی بوون بە مرۆڤ و بە کوردە.
لاوێکی شوانزدەیی هۆشیار و بــــــــــــــەغیرەت
قوربانی دەکەم سەد بەگ و ئاغا لەڕی بێ هۆش
ئەمەش  تەحەددایەکی گەورەی ترە بۆ بۆچوونی باوو بیری ترادیشنەڵی  گەندەڵی کۆمەڵەکەی. ئەسڵ و پلە و پای بە میرات بۆ ماوەو  بنەماڵە و بەگ و ئاغا حیسابی گەورەیان بۆ دەکرا. فانی بێگومان ئەوەی بەلاوە کەم نەبووە و رێزی لەو ترادیسیۆنە گرتووە. بەڵام نەک وەک کردنی بە پێوانەی رەها و بیری باو، بەڵام بۆش و بێمانا. تاکە مەرجی گەورەیی و دەوری کۆمەڵایەتی مرۆڤ ئەوەیە تا چ رادەیەک هۆشیار و زانایە. جا ئەگەر کوڕە شوانێک بخوێنێ و خۆی پێبگەیەنێ و هۆشیاری نەتەوەیی وچەکی زانست بەدەست بێنێ و بۆ راژەی گەل و خاک بەکاری بێنێ ئەوا سەد ئاغا و بەگزادەی نەزان و کەللەپووت قوربانی شوانزادەیەکی وا بێ چونکە شوانەکە دەبێتە بکەرێکی مێژوویی. بەڵام سەد ئاغا و بەگزادە نەزانەکە دەبنە سفری مێژوویی.
بەکارهێنانی (زانین) و پلەی زانستی و هۆشیاری وەک پێوانەی چاکی و خراپی، راستی و چەوتی ، دروستی و هەڵەشەیی، عەقڵانیەت و بۆشخەیاڵی، لە تەواوی  بیرکردنەوە و بەرنامەی فەلسەفی و نەتەوەیی فانی دا، دەبێتە بۆچوونێکی توند و تۆڵ و پەیرەو کراو. 
شۆڕش گەر لەسەر بنچینەی هۆشیارکردنەوە و بە زاناکردنی هەموو توێژەکانی گەل  دانەرێژرێ بۆشە. هێز گەر تەنیا هی لەش و زەبەلاحی بێ و زانینی لەگەڵا نەبێ شێتییە و گەمژەیییە. هتد
فانی قەڵەم لە جیاتی شمشێر، دەفتەر لەجیاتی خەنجەر
زانین لە جیاتی خڕکردنەوەی فیزیکی لەشکر و سوپای بێ ئەساس بۆ بەرنامەی شۆڕشگێڕانەی خۆی هەدەبژێرێ
برادەر بەندی من پەندە و نەسیحەت 
درێغا نیمە چیدی ئیقتیدارێ
لە جێی خەنجەر ئەوا رۆییمە دەقتەر
بە سەریا ئەسپی خامەم خستە غارێ
ئەوە دەفتەری ژیان و خەباتە فانی لە جیاتی خەنجەر هەڵی گرتووە و ئەوە ئەسپی خامەکەیەتی گوڕ و غاری خۆی تێدا دەکا
بەرهەمی خامەکەی بەند بەند نووسینی پەندو ئامۆژگاری سازکارانەو مرۆڤ پەروەرانەیە، پەروەردەکردنی مرۆڤی کوردە تا خۆی بناسێ و شوێنی خۆی لە ژیان و سەردەمدا بناسێ و ببێتە فاکتەر و بکەرێکی مێژوویی. فانی خۆی لە گەلەکەی جیا ناکاتەوە. لە ناویا دەژی. تێی دەگا. شارەزای خوو-و رەوشتی کۆمەڵایەتی چین و توێژەکانی دەبێ. یەک بە یەک دەیان ناسێ چاکە و خراپەیان، سوود و زیانیان، بەکاریی و (ئیجابیات) و نەکارییان (سەلبیاتیان).).
خۆشی وەک زانا و رۆشنگەر، دەزانێ کە دەزانێ، دەزانێش کە دەتوانێ یارمەتییان بدا تا خۆیان یارمەتی خۆیان بدەن. دوژمنی کورد بێگانە نییە. قەت بێگانە نەبووە. دوژمنی کورد عەقڵی خۆیەتی. نەبوونی کۆبەندی و نیزام، بزر بوونی زانست و هونەر، رێزنەگرتنی مامۆستا و رێبەران، فەرامۆش کردن و پەراوێزکردنی (خانی) یان و (حاجی قادران).. بۆیە فانی ناتوانێ بێدەنگ بێ. رەخنە و لێکدانەوە و رێبەریکردنی کۆمەڵ دەکاتە خوو و کار و خولیای رۆژانەی : لە هۆنراوەی (هەرچەند بەهارە) دا کە لە هۆنراوەکانی سەردەمی گەنجێتییەتی دەفەرموێ:
باسی رەوشتی میللەتم، ئیشمە، خوومە، عادەتم
 هەر ئەمەیە حیکایەتم ، هەر ئەمەیە شیعاری من
 شینی خەتایی کۆمەڵ و نەگبەتی نیشتمانییە
 خاتری داخداری من، دیدەیی قەترە باری من
لۆمەیی نەزمی من مەکەن مایەی بێنیزامییە
تەعنەیی تیژ و تاڵی من، ناڵەیی ئاشکاریی من
کوردە دەزانی رۆژی من بۆ رەشە میسلی نیوە شەو
پەردەی جەهلە رێگری چاوی ئومێدەواری من
بەکورتی فانی دەڵێ: ئێوە دەردن من ناڵە. ئێوە نارێک و بێنیزام ، من لەسەر کاغەز رێکتان دەخەم، دەتاننووسم، دەتانکەم بەشیعر و هۆنراوە، لە گۆشەنیگای خۆمەوە دروستتان دەکەمەوه‌..
شیعر هەستە، هیوایە ناڵەیە
شیعری فانیش لە ناڵینی بۆ گەل بەدەرنییە…ناڵەکەش هەر بۆ خۆشی و چاکەخوازیی کۆمەڵە
بلبلی دڵ رۆژ و شەو هاوارییە
ناڵە ناڵ و شین و گریان کارییە
رۆژی رەوشەن وەک شەوانی تارییە
                     ئەو نەخۆشە خۆشی کۆمەڵ چاریبە
                      ئەی خودایە بۆم بکە تۆ چاری دڵ.
دیوێکی دیکەی خۆشەویستی گەلت، نیگەرانیتە بۆی، پەرۆشتە بۆی، تووڕە بوونتە لێی..پلار و جوێنە بۆ راچەناندن و وریاکردنەوەی. بەلام هەموو ئەمانە بە خوێن و دڵێکی پاک و ساغەوە بۆ بەرژوەندی گەل دەکرێن
من لاوی نیشتمانم و خاوێنە خوێنی من
 هاندانی لاوەکانە پلار و جوێنی من 
شاعیر بۆیە هێندە بە تەنگەوەیە، هێندە خەم دەخواو  دەناڵێ، هێندە پلار و جوێن بۆ گۆڕین و چاکە بەکار دێنێ، چونکە ئەو هۆشیارە. ئەوەی ئەو دەیبنێ کەسانی دی نایبینن. جیهانبینیی ئەو حەقیقەتەکانی بەسادەیی و رووتی بۆ دەردەخا، دەبینێ ئەوەی خەڵک بە سپی دەیبینن رەشە، ئەوەی بە شیرین دەیچێژن ژاڵەیەو ژەهرە. بەڵام شاعیر خۆی ژەهرە راستەقینەکەی باری پڕ ئازاری کۆمەڵ دەچێژێ بۆیە لایەنێکی دیکەی جیاکردنەوەی فانی لە (ئەوانی دی) لایەنی جیهان بینی و کۆمەڵشوناسی و دەرک کردنە بە حەقیقەت:
وەکو من سەیری وڵاتت بکە تۆش وەکو و من
 جامی شەهدت بدەنێ شەرتە دەڵێی زووخاوە.
واتە ئەگەر  ئەی رۆڵەی کورد تۆش بتوانی بەچاوی من و توانستی جیهانینی من سەیری وڵاتەکەت بکەی، تۆش وەکو من ئەگەر جامی هەنگوینت بدەنێ، دەبینی زووخاوە و تامی زووخاو دەدات. ئەمەیە گەوهەری غوربەتی رۆحی شاعیر و ئەدیبی هوشمەندو کۆمەڵناس لە وڵاتی دواکەوتوو- و کۆمەڵی نەزاندا.
شاعیر تاک و تەراو غەریب دەکەوێتە گۆڕێ.
ئەوەی ئەو دەیبینێ، ئەوان نایبین
 ئەوەی ئەو تێیدەگا، ئەوان تێیناگەن
ئەو چاکە و سەلامەتی و خۆشی بۆ ئەوان دەوێ، ئەوان بە خراپەو تراژیدیای خۆیان قەناعەتکارن و  زیاتر بەقووڕا دەچن و بە گومانەوە سەیری ئەو دەکەن، قسەکانی بە بزڕکان دەژمێرن، ئامۆژگارییەکانی بەدەنگی دەهۆڵ، یان گوێیان کەڕە و قسەی باش وەک با وەردەگرن، یان دڵیان دیوارە و هەوڵی چاکە وەک بەڵا وەردەگرن.
بۆیە دژایەتییەکی دی، کە کەسێتی و خۆناسینی فانی دیاری دەکا، هەوڵی(فانی) یە بۆ گۆڕین و فەرامۆشیی و گەمژەیی گەلەکەیەتی:
جەهدی ئەدیبی خەستە لەگەڵ جەهلی قەومی کورد
بێ سوودە دەنگی زەنگە لەلایان سەدای غەزەل
سەرنجی دژایەتی وشەکانی (جەهد) و (جەهل) و (ئەدیب) و (قەوم) و (دەنگی زەنگ) و (سەدای غەزەل) بدەن. ئەوەی فانی دەیبینێ و داد و ناڵەی بۆ دەکا، گەلەکەی نایبینێ چونکە نا بینایە.. گەل شاری کوێرانە. تاقە چاو ساغێ شێتە، یان ماسوشیتە (خۆ ئازار دەرە) تا ئاستی خۆکوژیی رۆژانە و شەوانە. لە ناو قەومی وا دا زانایی دەردە، ئەرکە، ئازاری گیانە. بۆیە فانی حەقیەتی هەندێ جار بێ ئومێد بێ و رۆحی تەنگە تاو ئەو بێ:
کە گەل بینا نەبێ هیچی، عەزابی گیانە بینایی
بە خۆڵی ئەحمەقی چاوت وەکو ئەو خەڵکە تاریی کە
لە ناو قەومی نەزان، زانا شەرابی خوێنی جەرگە و بەس
کە هۆشێکت هەیە فیکری ئەساسی خاکەساریی کە.
کە گەل کوێربێ، بینین ژانە رۆحە. دە تۆش (تا لەو ژانە بە دوور بی) چاوت بە خۆڵی گەمژەیی بکە تاریکستان تا هیچ نەبینێ و گیانت ئازار نەچێژێ. لە ناو گەلی نەزانا شەرابی زانا خوێنی جەرگیەتی، بۆیە گەر هۆشت هەیە بیر لە ئەساسی ئەو خاکەسارییە بکەوە..
 نەک هەر لە ئازارەکەت ناگەن، پتر خۆی دەکەنە زامەکانتەوە، ناو و ناتۆرەی ناشرینت لێ دەنێن ، ئەوانیش خۆیان لە تۆ، یان تۆ لە خۆیان جیادەکەنەوە، دەتخەنە دەرەوەی ئاخاوتنی نەزانین و گەمژەیی خۆیانەوە

Previous
Next
This site is registered on wpml.org as a development site.