Skip to Content

Thursday, March 28th, 2024
كابینا پشتی دكتور به‌رهه‌می

كابینا پشتی دكتور به‌رهه‌می

Closed

كابینا شه‌شێ‌ دڤان دوو سالێن بوری دا كو ژلایێ‌ دكتور به‌رهه‌م ئه‌حمه‌د سالحی سه‌روكاتیا وێ‌ دهاته‌ برێڤه‌برن، گه‌له‌ك تشت ئیناینه‌ ئه‌نجام كو د چ كابینه‌یێن به‌ری خوه‌ دا ئه‌و تشت په‌یدا نه‌بوین! به‌رییا ئه‌م به‌حسێ‌ كا چ دڤێ‌ كابینێ‌ دا هاتیه‌ كرن و چ نه‌هاتیه‌ كرن بكه‌ین، دڤێت بینینه‌ بیر، كو ئه‌ڤه‌ ئێكه‌م كابینه‌ بو هه‌ر ژ ده‌ست بكاربونا وێ‌ دكه‌ڤیته‌ به‌رامبه‌ر مه‌زنترین ته‌حه‌ددی یا گوهورینێ‌، به‌رامبه‌ر ئێكگرتنا ئوپوزسیونه‌كێ‌ كو داخوازیێن وێ‌ چاكسازی نه‌بون، به‌لكو داخوازیا گوهورینا حكومه‌تێ‌ هه‌میێ‌ دكرن. ته‌حه‌ددایه‌كا بڤی ره‌نگی ژی بو كه‌سایه‌تییا قایما دكتور به‌رهه‌می سه‌رفه‌رازیه‌كا دی یه‌ بو خودیێ‌ ئێكه‌تیێ‌ دهێته‌ توماركرن و ئه‌و پشته‌ڤانیا رێكه‌فتنناما ستراتیژی یا ئێكه‌تی و پارتی و سه‌روكاتیا هه‌رێمێ‌ بو خوراگرتنا ڤێ‌ كابینه‌یێ‌ دكرن.
ئه‌گه‌ر لڤێ‌ كابینه‌یێ‌ سه‌ح بكه‌ین و ئه‌و ده‌ستكه‌فتێن خه‌لك و ده‌ستهه‌لات تێدا لبن ئێك چه‌تر كومڤه‌كرین، ده‌ستكه‌فتێن نه‌ یێن بچویكن و دڤان بیست سالێن بوری دا و تا نوكه‌ ژی خه‌له‌كا هه‌ره‌ مه‌زنا نه‌ باوه‌ریێ‌ و ژ ئێك دویر بونێ‌ دناڤبه‌را ده‌ستهه‌لاتێ‌ و خه‌لكی دا، خه‌له‌كا نه‌ باوه‌ریێ‌ یه‌ و تومه‌تكرنا پێش وه‌خت ل سه‌ر ئه‌دائا كاری ژ هه‌ر ئێك به‌رامبه‌ر یێن دی، كو خه‌لكی ده‌ستهه‌لات ب گه‌نده‌ل و كه‌مته‌رخه‌م ناسكریه‌ و ژ ئه‌نجامێ‌ وێ‌ نه‌ باوه‌ریێ‌ ژی، ئه‌ڤ ئوپوزسیونا ته‌حه‌ددایا ڤێ‌ كابینه‌یێ‌ دكر، برامانه‌كا دی ته‌حه‌ددایا رێكه‌فتنناما ستراتیژی یا ئێكه‌تی و پارتی دكر و ئه‌ڤ هه‌ردوو حزبێن هه‌ ره‌تدكرن! دڤێ‌ كابینه‌یێ‌ دا گه‌له‌ك په‌رده‌ هاتینه‌ راكرن، كو بره‌نگه‌كی و دوان خه‌لك خوه‌ دناڤ ڤێ‌ ده‌ستهه‌لاتێ‌ دا ببینیت. شه‌فافیه‌تا بودجه‌ی ئێك ژ وان په‌ردان بویه‌ كو هه‌ر ده‌م بو هاولاتی جهێ‌ گومانێ‌ بون و گه‌له‌ك هویرده‌كاریێن دی كو خه‌له‌كا بوشاهیێ‌ بوینه‌ دناڤبه‌را ده‌ستهه‌لاتێ‌ و خه‌لكی دا. دیسان ئه‌ڤه‌ ئێكه‌م كابینه‌ بو كو خه‌لك بێی ئینتیمائا وی یا حزبی یان ده‌ڤه‌رداری و واسته‌ و واسته‌كاری، خوه‌ ب كوردستانی و بمافێ‌ خوه‌ بزانیت كو چ جیاوازی دناڤبه‌را وی و كه‌سانه‌كێ‌ دی دانینه‌، حكومه‌تێ‌ شیا خوه‌ نیشان بده‌ت كو خه‌لك وێ‌ ب حكومه‌تا خوه‌ بزانیت و خوه‌ خودانێ‌ وێ‌ بزانیت. ئێك ژ نمونه‌یان ژی كو ئه‌م بینینه‌ لبیر، دامه‌زراندنا 25 هزار كه‌سان بو ژ بودجه‌یا سالا 2011 ێ‌ كو رێنمایێن دامه‌زراندنێ‌ ژ سه‌روكاتیا ئه‌نجومه‌نێ‌ وه‌زیران ڤه‌ بو ده‌رچووین، ب مه‌به‌ستا ئێكسانیێ‌ دناڤبه‌را خه‌لكی دا و بێی جوداهی، كو پێشتر نه‌ هه‌ر تشتێ‌ بڤی ره‌نگی نه‌ بویه‌، به‌لكو گه‌له‌ك ژڤی خه‌لكێ‌ هه‌، ژ به‌ر ئینیتمائا وان یا حزبی دهاتنه‌ پشت گوهكرن و بێباركرن و دیسان بوارێ‌ تواناسازیێ‌، كو گه‌له‌ك خویندكار و بێی ئینتیمائا وان یا حزبی شیان بخوه‌ مفای ژێ وه‌ربگرن و ئه‌ڤه‌ هه‌می ژی ئاماژه‌ نه‌ بو هاولاتیبونێ‌. هاولاتیبون ئه‌و خالا من ڤیایی ئه‌ز بینمه‌ زمان كو شه‌نگسته‌یێن وێ‌ ژلایێ‌ كابینه‌یا شه‌شێ‌ ڤه‌ هاتینه‌ دانان، ئه‌و خه‌له‌كا ڤه‌قه‌تیایی دناڤبه‌را ده‌ستهه‌لاتێ‌ و خه‌لكی دا، ئه‌و خه‌له‌كا بویه‌ ئه‌گه‌رێ‌ په‌یدابونا وێ‌ ئوپوزسیونا حكومه‌ته‌كێ‌ هه‌میێ‌ ره‌ت بكه‌ت، نه‌ك داخوازیا چاكسازییان ژێ‌ بكه‌ت. ئوپوزسیونه‌ك ب وێ‌ عه‌قلیه‌تێ‌ كار بكه‌ت كو به‌ری ده‌ست بكاربونا وێ‌، ڤێ‌ حكومه‌تێ‌ لێكدانی سفرێ‌ بكه‌ت، به‌راوردی حكومه‌تێن عه‌ره‌بی وه‌ك تونس، مسر، لیبیا، سوریا و یه‌مه‌نێ‌ لێبكه‌ت، كو ئه‌و حكومه‌ت ل سه‌ر بنیاتێ‌ دكتاتوریه‌تێ‌ هاتینه‌ دامه‌زراندن و لڤێره‌ ژی ده‌نگێ‌ هاولاتی دشێت حكومه‌تێ‌ بگوهوریت و حكومه‌ته‌كا نوی دامه‌زرینیت. بویه‌ دا كو كوردستان بگه‌هیته‌ پێگه‌یێ‌ خوه‌ یێ‌ دروست و ئه‌و بنیاتێ‌ هاولاتیبونێ‌ بهێز بكه‌ڤیت، دڤێت رێكه‌فتنناما ستراتیژی یا دناڤبه‌را ئێكه‌تی و پارتی دا خورتر لێبهێت و ب پشته‌ڤانیه‌كا ته‌مام، كابینا حه‌فتێ‌ ژی بكه‌ڤیته‌ سه‌ر سكه‌ییا خوه‌ یا دروست و هه‌می برگه‌یێن به‌رنامه‌یێ‌ لیستا كوردستانی، لدویڤ حه‌ز و خواسته‌كێن هاولاتی و هاولاتیبونێ‌ بهێنه‌ جێبه‌جێكرن.

عبدالرحمن بامه‌رنی

Previous
Next
This site is registered on wpml.org as a development site.