Skip to Content

Friday, March 29th, 2024
چه‌ند شیعرێكی  غوڵام ره‌زا بروسان

چه‌ند شیعرێكی غوڵام ره‌زا بروسان

Closed
by February 19, 2012 ئەدەب

له‌ خێزانی دار به‌ڕووه‌كانم
یا له‌ ره‌چه‌ڵه‌كی ئه‌سپ؟
نازانم
ته‌نها ئه‌مه‌ ده‌زانم
سه‌ره‌تا شێت نه‌بووم

چۆنه‌ كه‌ ته‌نیایی
شێوه‌ی مانگ
گه‌وره‌تر ده‌كات
ته‌نیایی
ته‌نیایی
به‌رزرترین لق باشتر له‌مه‌ تێده‌گات.

باوه‌ڕم به‌ دۆنادۆن نییه‌
به‌ڵام گه‌ر مردم و
وه‌ك به‌ردێك له‌ دایكبوومه‌وه‌
نیشانه‌یه‌كم له‌سه‌ر دابنێ
تا خۆم له‌ به‌رده‌ركانیتر باشتر بزانم.
ده‌ستێكم له‌ تۆوه‌ده‌ده‌م و
به‌ ده‌سته‌كه‌ی ترم
بیر له‌ تۆ ده‌كه‌مه‌وه‌
ئازیزم
به‌ دوای تۆدا
ده‌ستم هێند درێژ ده‌بێت
له‌ سنووریش تێپه‌ڕ ده‌بێت.

گه‌ر پێویست بێت ژنانه‌ بیرده‌كه‌مه‌وه‌
وه‌ك ده‌رزییه‌ك له‌ خه‌یاڵت رۆده‌چم
ده‌ست به‌ قۆپچه‌ی كراسه‌كه‌تدا ده‌هێنم
ژیان بێدار ده‌كه‌مه‌وه‌.
ماچت ده‌كه‌م
ئه‌وه‌نده‌ت ماچ ده‌كه‌م، ده‌ممیان لێبێته‌ ده‌می تۆ.

ده‌مه‌وێ
گوێچكه‌ی با بگرم 
تا هێنده‌ له‌ قژت نه‌ئاڵێ و
یاری به‌ ژیانم نه‌كات
تۆیش كارێك بكه‌
بۆ نموونه‌
قۆپچه‌ی كراسه‌كه‌ت داخه‌
بۆ نموونه‌
ته‌نووره‌كه‌ت تۆزێك هه‌ڵكه‌
وابزانه‌ شۆسته‌كه‌ ته‌ڕه‌.

سه‌رچاوه‌:

مرپیه‌ برای درختی كه به پهلو افتاده‌ است
انتشارات فرهنگ تارا
چاپ دوم، 1390
 

له‌ فارسییه‌وه‌: جه‌بار سابیر

Previous
Next
This site is registered on wpml.org as a development site.