لەكوێڕای لانەكەت دەنوی

ئاگر سنگتی داگیرسان
دڵت…

سارد…
سارد…
سارد…
وەك گیرفانی..
ئەو كراسەی،
پەنجەكانت..
بۆ ژماردنی گڕ،
تێدا گڕدەدا.
چێژت ..
لەنەسیمی،
خەندەكان وەردەگرت.
راست…
دارێكی ئەزموون بووی.
گەڵات بەزەیی،
بەرت قەقنەس،
بەژنت پێكەنین و
بەیانیت بەسەرا دەباری.
گەرداوت دەخواردەوە..
مەییت یارمەتی،
مەزەت دەسگرتنی
هاوڕێیان بوو.
رۆیشتی…
دووكەڵێك،
شەپۆلی ئاو،
تراویلكەیەك خۆر،
بەردێك حەسرەت،
بۆهەستیاری هزرت،
دەریایەكی بزەن.
لەئاستی بێدەنگی،
سرەوتن لەماڵ،
بردن بۆشار،
سەفەربێئاو،
مەلە دەنگی غوربەت،
چاوەڕوانی نەغمەی هاوژین،
بزربوون،
سەفەری ژێر ورژمی،
ئاخێكی هاوسەرتن.
بردتیان بەرەو گەزۆی بەهەشت..
خواردتیان لەبری سوێسكەی لوتكە،
نەهاتییەوە..
واتدەخواست..
بۆ خۆزگەی ،
دەسلەملانی ئاشتەوایی.
تۆڕێك لەهاژە،
ئاسمانێك بۆئەستێرە،
خێزانێك بۆ بێدەربەستیت،
كردە سەربەرستی قەڵەم.
زمانی ئاڵوو
چەندایەتی ئەمدیوو
ئەو دیوت پاڵاوت،
زانیت ئەم عەشقەت ،
بۆگوڵە ئەستێرە،
لەخوار بەدەنی گڵەوە ،
چۆن دەژی.
بەفامبووی…
لەژانی خورپە،
شكانی بادەم،
سووتانی داو،
پژانی خەنەی بەهارو
داماڵینی كەژی دار ، لەخەزان،
كەوتنی ناوكۆكە..
لەتەمەنی رەگ،
كوژرانی دڵ..
لەتوانەوەی زمان،
بنبڕكردنی هزر،
لەپشكنینی ئاكام،
بڕینەوەی گەردن،
لەگیرفان،
سڕینەوەی پەنجە..
لەنەخشەی دەست.
هەڵسانی ترپەی دڵ..
لەخرۆشانی خوێن،
پاكبوونەوەی جەستە..
لەژەهری حوسێن،
كڕینەوەی ئازادی..
لەشەهیدی هەڵەبجە،
ئەنفال و
برینی بتوێن.
رۆیشتی..
خاڵێك لەناونیشانمان..
كەوتە خوارەوە،
ژمارەیەك لەپیرۆزی..
بووە گەردیلە،
تابووتی نارنجۆك،
لانكی ئاوو
فەوتانێك..
لەرەحمی دایك،
بووە مناڵ،
ئاشووبێك لەدووت..
زادەی ئاوی كردە هەویر.
سەفەرت خێر..
چوویت بۆدورگەیەك دوور.
بنوە چاوەكانت داكەنە،
ئەڵقەیەك لەئاو..
بەنووكی پێنووسەكەت دیاریبكە،
نیگا مەكە..
برۆكانت هەڵدەوەرن،
گلێنەكانت دەتەقنەوە.
ئێسكەكانت دەپووكێنەوە.
چۆن چوویت؟
بەباڵ،
یاخود بەسواری شنەی با؟
ئاسمان بەئەستێرە بسپێرە..
خاك بەژان،
ژیان بۆ فرمێسك جێبهێڵە،
ناتبینمەوە..
بینین لەهەوارەكان وەرناگری.
دەستەكانم نابنە سایەت،
سێبەرێك راناچەنێ‌ بێكۆشت.
بنوە…
خەون بەعەشق بسپێرە،
گڵ بەخاك و
دارەكان بەلقەكانیان.
رەنگە ئەندێشە بەرۆكت نەدڕێ‌،
ئیتر شەپۆلەكان..
بەسەرتا نەدەنەوە.
بەتینوێتی..
رووت لەئاودا بتشارنەوە.
نەكەیت دەست لەشەپۆل هەڵگری.
لەكوێڕای لانەكەت دەنوی..؟
رووبارەكان دەزانن..
یاقووتەكان گەمەت لەگەڵدا دەكەن،
هەناسەكان دەتخۆن،
گەردیلەكانت..
ئاو لەلێوت دەسوون..
ئارامبە…
ئا.ئا.را .را.م