Skip to Content

Thursday, March 28th, 2024
په‌نجه‌كانت گه‌ڵای موحیبه‌تن

په‌نجه‌كانت گه‌ڵای موحیبه‌تن

Closed
by July 22, 2012 هۆنراوە

 

 

په‌نجه‌كانت پێنج گه‌ڵای سنه‌وبه‌رن 

گه‌ڵای موحیبه‌تن ده‌رده‌كه‌ن 

له‌نێوان لاسك و سێبه‌ری باڵاتا

ده‌بمه‌ چڵێك 

له‌گه‌ڵ په‌نجه‌تا لێكده‌ترازێم 

ده‌ڕۆیت… 

دیلانی ئاهه‌نگه‌ نه‌كراوه‌كان ده‌به‌ستیت 

تۆ تینوو 

ده‌سته‌كانت ماندوو نه‌ترس 

به‌دوای ماچی 

گۆنایه‌كی گزنگیا هاوته‌ریبن 

شه‌فه‌ق دێت 

به‌ژنت وه‌كو شۆڕه‌بیه‌ك 

له‌باسكت ده‌تۆرێت 

په‌نجه‌كانت… 

به‌دوای خۆیا په‌لكێشده‌كات 

دڵم تروسكه‌ی نیگایه‌كته‌ 

له‌گه‌ڵ رۆیشتنی تۆدا 

گوزه‌ر ده‌كات 

بۆ سێبه‌ری كوختێكی كۆن 

ده‌سته‌كانت سنوورێكن 

په‌نجه‌ره‌ی عومرم دائه‌خه‌ن 

پێنووسێك…

ده‌بێته‌ په‌نجه‌ی شایه‌تمان و 

له‌میحرابی مزگه‌وته‌ داخراوه‌كاندا 

گله‌یی له‌بێمه‌یلی و 

گاڵته‌جاڕی هه‌ستتده‌كا 

به‌رماڵ رووه‌و قیبله‌ 

ده‌بێته‌ ئاسمانێكی پڕ له‌هه‌ور 

روومه‌تت لاله‌ی په‌رستگایه‌ك 

خاچ له‌خوێن هه‌ڵده‌كێشن 

په‌نجه‌كانتیش ده‌بن به‌ته‌ور 

سێداره‌یه‌ك گه‌ردنتی هه‌ڵواسیوه‌ 

خۆم له‌ئه‌سكڵا ده‌بینمه‌وه‌ 

حاڵدامده‌گرێ‌ 

ده‌فی دڵم ده‌كوتم 

گڕ نیگای په‌روانه‌ییت ئه‌دره‌وشێنێ‌ 

بروسكه‌ی بێڕه‌حمێكه‌ت 

چوارمێخه‌م ده‌كێشن 

له‌نێوه‌ندی په‌نجه‌كانی خۆم و تۆدا 

پێنووسه‌كه‌م … 

جێگۆڕكێ‌ به‌عومرمده‌كا 

لاپه‌ڕه‌ی بوونت 

كه‌ژاوه‌ی بووكێنێ‌ قه‌یره‌ كچێكه‌ 

به‌نه‌زۆكی… 

له‌عه‌شق و سیمای شار ده‌ڕوانێ‌ 

به‌نه‌داری 

له‌پشت په‌رده‌كانه‌وه‌ 

نیوه‌ی خۆی ده‌بینێ‌ 

به‌تاریكی ئاشنایه‌و 

له‌نسێی هه‌ور ده‌ترسێ‌ 

نیگای شه‌وه‌زه‌نگه‌و 

خۆر به‌یاساغ له‌باوه‌ش ده‌گرێ‌ 

له‌كووچه‌ی ئاواره‌كانا 

شانی به‌رنوغرۆیی 

دیواره‌ سامگرتووه‌كان ده‌كه‌وێ‌ 

ده‌سته‌كان له‌وه‌یشوومه‌ باران ده‌چنن 

له‌باخه‌ڵیا سێوی ئاده‌می به‌دیناكه‌یت 

له‌ته‌وێڵیا پسووڵه‌ی بێویژدانیان هه‌ڵواسیوه‌ 

كێ‌ ئاڵای مه‌حره‌می ده‌روێشانی بینیوه‌ 

پارچه‌ قوماشێكی كه‌سك 

ده‌فێكی مات 

شمشێرێك له‌نوور 

خواوه‌ندێك له‌ئاشتی 

به‌سته‌یه‌ك له‌فرمێسك 

نووزه‌یه‌ك له‌نزا 

گیرفانێك له‌موفه‌ڕك 

هه‌توانێ له‌به‌هره‌ 

كه‌په‌نجه‌كانت …

گه‌ڵای موحیبه‌تیان ده‌ركرد 

بوونه‌ سایه‌ی دارێكی گه‌وره‌ 

ده‌بینی ده‌روێشێ حاڵدایگرتووه‌ 

كراسی ئه‌ستێره‌و ردێنی هه‌وره‌ 

جه‌سته‌ی له‌سۆزی خوایی ده‌چۆڕێ‌ 

وه‌لێ‌ دان به‌بوونی تۆدا نانێ‌

به‌ته‌مه‌نت مێژووت داده‌گیرسێنێ‌ 

 

 

Previous
Next
This site is registered on wpml.org as a development site.