مامۆستا گیان

مامۆستا گیان منی منداڵ

منی خاوه‌ن ئاسمانێكی

فراوانی خه‌ون و خه‌یاڵ

منی ده‌رون به‌فری چیا

منی دڵ پڕ خۆزگه‌ و هیوا

منی تینووی حه‌زی فێربوون

تینووی زانست،تینووی خوێندن

به‌ هه‌ستێكی ناسك و پاك

هاتوومه‌ به‌ر ده‌ست تۆی مه‌زن

چاوه‌ڕوانم به‌ هێمنی و 

به‌ سۆزه‌وه‌ تۆ بمدوێنی

به‌ بارانه‌ وشه‌ی ناخت

ئه‌و تینووێتیمه‌ بشكێنی

منی منداڵ باخچه‌ی ناخم

پڕ پڕ له‌ گوڵخونچه‌ی به‌هره‌ن

به‌هۆی تۆوه‌ گه‌شه‌ ده‌كه‌ن

به‌ دڵسۆزی تۆ پێ ده‌گه‌ن