Skip to Content

Friday, March 29th, 2024
رامان…. ستار ئەحمەد

رامان…. ستار ئەحمەد

Closed
by September 4, 2012 هۆنراوە

 

 

چركه‌یه‌ك له‌حزوری خوادا راوه‌سته‌ 

ئه‌م به‌فری غوربه‌ته‌ له‌به‌رتا راماڵه‌ 

بچۆره‌ خه‌ڵوه‌تگای عه‌شقه‌وه‌ 

رامێنه‌ له‌جوانی به‌نده‌ی ئه‌وو 

له‌شه‌وه‌ تاریكه‌كان 

ئه‌ستێره‌كان بكه‌ گواره‌ی ئه‌و گۆرانییه‌ی 

له‌شۆربوونه‌وه‌ی حه‌ز 

بارینی تریفه‌ی ئه‌وین 

داڕمانی دڵ ده‌چێ‌ 

چركه‌یه‌ك راوه‌سته‌و 

نیگای قه‌سیده‌یه‌ك 

له‌جه‌رگی پێنووسێكدا بكێشه‌ 

وردبه‌ره‌وه‌ له‌بای ئه‌جه‌ل 

ره‌هێڵه‌ی له‌ناوچوون 

مردنی گه‌ڵای تاسه‌ 

چاوانت پڕكه‌ له‌ باران 

گیرفانه‌كانت… 

به‌رامه‌ی شیعریان له‌سه‌ر په‌خشكه‌ 

چه‌ند جوانه‌ … 

بۆنی خاك 

تامی جوانی 

چێژی ئه‌و وشانه‌ی به‌پاییزی هیواكاندا 

چاوشاركێ‌ له‌گه‌ڵ ته‌مه‌نتا ده‌كه‌ن 

ده‌جه‌نگێن دژی گوناه‌ و 

له‌سۆزی خواییدا ده‌توێنه‌وه‌ 

تاوێك چاوشاركێی ئه‌ستێره‌كان گڕبده‌ 

له‌گڕی خۆره‌تاوێكی هاویندا سێبه‌رێك سازبكه‌ 

له‌خوێنی نه‌رمه‌بایه‌كدا 

گه‌ڵایه‌ك به‌شه‌ونمی لێوه‌كانت پاككه‌ره‌وه‌ 

وردبه‌ره‌وه‌ له‌و لاسكانه‌ی عاشقی هێلانه‌ن و 

له‌سووتانێكا ره‌گی خۆیان جێده‌هێڵن 

رامێنه‌ له‌و هه‌وارگانه‌ی 

له‌ترسی چرایه‌كدا 

ئه‌ستێره‌یه‌ك ده‌ده‌ن به‌شاندا 

چركه‌یه‌ك له‌حزوری خوادا راوه‌سته‌ 

له‌رۆحی چۆله‌كه‌یه‌كدا 

درك به‌پیرۆزی ئاسمانه‌كان بكه‌ 

له‌چێژی ده‌نكه‌ ترێیه‌كا 

گلێنه‌ی هه‌ور رامووسه‌ 

له‌كردنه‌وه‌ی په‌نجه‌ره‌ی په‌رستگایه‌ك 

گه‌رووی رێگاكان به‌زام بناسێنه‌ 

به‌رماڵێك راپێچه‌و 

به‌په‌ڕه‌یه‌ك ده‌روونت ببه‌سته‌ 

 

Previous
Next
This site is registered on wpml.org as a development site.