حکایەتی کەرتەکانم…شوان عوسمان
کە تۆ لەمن ئەبی ،کەرتێک لەمن ئەبێ ،
من لە کەرتێک ئەبم..
ئەوە فیراقی کەرتە ،کە کەرتم ،کەرت ئەبێت ،
من کەرت ئەبم ، کەرت کەرتم ئەکات…
کەرتم لە کەرتت ئەبێت…
تۆ کەرت ئەبیت ،
کەرتت لە کەرتم بەرئەبێت…
کەرت بوون هەر ئەوە نیە تۆ لەمن ببی ،
من لە تۆ ببم..
تۆ لەتم ئەکەی بە خۆت ،
تا لەت ببم..
لەتێکم لەتتر ئەبێت ،
بە تۆ..
من کەرت ئەبم ،بە خۆت…
هەر کەرتێکم لەت ئەبێ ،هەر لەتێکم کەرت ئەبێت…
تا خۆم کەرت کەرت ئەبم…
کەرتەکانم لەت ئەبن ،لەتەکانم کەرت ئەبن..
من لە نێوان لەت وکەرتەکانمدا ،
رێگایەکم نیە ،بۆ یەکبوونم تا کەرت نەبم..
تا لە دووڕیانێکدا دوولەت ئەبم…
رێگا لەتم ئەکا ،
دووڕیانێک کەرتم ئەکا بە خۆی..
جێیەکم دیار نابێ پێیدا بڕۆم ،
جێگا شەقارم ئەکا…
ئەڕۆم و چەند ئەکەم وەکو خۆم لێ نایەتەوە ،
قەت وەکو خۆم نابم ،
شەقار شەقارتر ئەبم..
بستێکم نابێت تا خۆمی تێدا خڕ کەمەوە ،
خۆمم پێدا کۆ نابێتەوە..
تا لە شوێنێکدا چەند جار بەسەر خۆمدا ،
دابەش ئەبم ..
لە خۆم دەرئەکرێم…
ورد ئەبم ،بوخارم پەرش ئەبێت..
بێ ئەوەی بزانم رووم لە کام روودا ئەبێت ،
چوونم بۆ کام لادا ئەچێت..
بە هیچ لایەک ناگەم ،
خاڵەکانم لێک دوور ئەکەونەوە ،
پارچەکانم بەرباد ئەبن..
پارچە پارچە ئەبم..
هەر پارچەیەکم بەرەو لایەک ئەچێت ،
تا بایەک هەبێت، بەبا ئەبم..
پارچەکانم ناگەنەوە بەیەک ،بە مەنزلێک ناگەنەوە ،
من ناگەمە مەنزلێک تا بە ماڵێک ئاشنا ببم..
ئەڕۆم هەر بەڕێوە لەت ئەبم ،
وەکو پەلک ئەوەرێم..
لە دوورەوە لەتەکانم ئەبینم ،
لەوێدا لەتم ئەکەن ،ئەوەرن ،
ئەبارن..
لێرەدا کەرتەکانم کەرتم ئەکەن ،
لەوێدا لەتەکانم لەتم ئەکەن..
دووریەکان زێتر ئەبن ،دوورترم ئەکەنەوە..
مەوداکان ماوەیان نابێت تا بمگەننەوە یەک ،
لە خۆم دوور ئەکەومەوە ،لە خۆت دوور ئەبم..
جارێکی تر خۆم بزر ئەکەم..
کەرتێکم لەبن باڵمدا ،گەرم نابێتەوە..
کەرتەکەی دیم خۆی خڕ ناکاتەوە ،
تا خڕم کاتەوە…
من خڕ نابمەوە ،
تا تۆ کەرت بیت ،بە من.
تا من کەرت بم ،بە تۆ…
تا کەرتی تۆ لە کەرتی من دوور کەوێتەوە ،
تا کەرتەکانمان بەیەکتر غەریب بن…
هەریەکەمان کەرت ئەبین ،
کەرت کەرت وکەرت ئەبین..
لەت لەت ولەت ئەبین..
ئەوەیە حکایەتی کەرت بوونی کەرتەکانم ،
لە ساتی کەرت بوونم بە تۆ ،
ئەی نیشتمانم ، نیشتمانی کەرت کەرتم …
شوان عوسمان-ئەمستردام
-٣/٧٢٠١٣