Skip to Content

Saturday, March 2nd, 2024
تاقە شاعیری کورد … ئازاد ئەحمەد

تاقە شاعیری کورد … ئازاد ئەحمەد

Closed

 

 

 

 

ئه‌گه‌ڕێمه‌وه‌حه‌فتاکان؛

ئێواره‌یه‌کی یه‌سینینی بوو، چرووت به‌ده‌ستێ، له‌مارکیز ئه‌چوو، له‌به‌رده‌م کتێبخانه‌ی ئاسۆدا وه‌ستابوو

وتیان ئه‌وه ‌شێرکۆ بێکه‌سه. ته‌مێ رژایه ‌ئه‌و ناوه. په‌ڕوتووکی فریشته ‌باری یه‌ سه‌ر شان و ملمان

                                                                    شیعری “ژیانێکی رامبۆیانە”

 

ئێوارەیەکی هاوینی ساڵی 1979 بوو لە کەرکوك، لەبەردەم کتێبخانەی ئاسۆدا لە شەقامی جمهوری، لەگەڵ فازڵ جاف و عەلی کەریم و محەمەد موکری و ئەواندا وەستابوو، سیگارێکی بە دەستەوە بوو و بە  روخسارێکی جیددی یەوە ئەیڕوانی یە خەڵك و شەقام. ئێمەش، کۆمەڵێ لاوی تازە هەڵچوو، تازە ئاشنا بە ئەدەب، شەیدای شیعری شێرکۆ؛ مارف عومەر گوڵ، کەریم پەڕەنگ، مستەفا گەرمیانی، جەمیل ئەمین، ئیحسان حاجی غەفور (باوکی چۆپی فەتاح)، نەوزاد ئەحمەد ئەسوەد، فایق سەعیدو من، بە شەرمەوە لەولاترەوە وەستابووین، بە ئیعجابەوە تێمان ئەڕوانی، رووشمان نەئەهات بچینە لای، بەخێر هاتنی بکەین و خۆمانی پێ بناسێنین. مارف عومەر گوڵ نەبێ، چووە لای و داوەتی کرد، بەڵام شێرکۆ زۆ بە ئەدەب و بە خەندەیەکەوە داوای لێبوردنی کردو، پاشان لەگەڵ فازڵ جاف و ئەوان بەرەو نادی بەڕێ کەوتن. ئەوە یەکەم و دوا جارم بوو شێرکۆ ببینم. ئەم هاتنەی شێرکۆم لە شیعری “ژیانێکی رامبۆیانە”دا تەوزیف کرد.

جارێکی دیش، زستانی ساڵی 1983 بوو لە بالیسان، سێ کەس هاتن بۆ لامان، دوانیان دەموچاویان پێچرابووەوە، یەکێکیان نەبێ، کە ناسیمەوە، کەریم عوسمانی دەرهێنەری شانۆیی بوو. کە لە شەڕی ناوخۆی ساڵانی نەوەتدا بێسەروشوێن کرا. ئەو سێ کەسە تاوێك لامان دانیشتن، لەگەڵ محەمەد موکری دا کەوتنە گفتوگۆ. پاشان کە رۆیشتن، موکری وتی یەکێکیان شێرکۆ بێکەس بوو، ئەوی دییان پێم وابێ وتی رەئوف بێگەر بوو. زۆرم خەم خوارد کە نەمناسینەوەو لەگەڵیاندا نەدوام. ئیدی دوای ئەوە، هەتا کۆچی دواییشی کرد، شێرکۆم هەرگیز نەبینییەوە.

نازانم بۆ، پاش مردنی هەر ئەدیبێك، هونەرمەندێك، ئنجا دێمەوە سەر خۆم و لەخۆم ئەپرسم؛ بۆچی هەتا لە ژیاندا بوو بە دیداری شاد نەئەبووم، بۆچی وێنەم لەگەڵیدا نەئەگرت، گفتوگۆم لەگەڵیدا نەئەکردو بە ڤیدیۆ تۆمارم نەئەکرد؟… پێم وابوو شێرکۆ بێکەس خواوەندێکی دێرینی کوردەو لەسەرەتاکانی مێژووەوە پێی خستۆتە سەر ئەم خاکەو پەیامەکانی بە شیعر دەرئەبڕێ. شێرکۆ شاعیری هەموو سەردەمێکە. وەکو چۆن بە مۆسیقاری میسری محەمەد عەبدلوەهاب ئەوترا “موسيقار الأجيال”، ئەکرێ بە هەمان شێوە، بە شێرکۆ بووترێ ” شاعیری نەوەکان – شاعر الاجیال”. رەسول عەمزاتۆڤ ئەڵێ “لە هەموو سەردەمێکدا گۆرانیبێژێك هەیە، ئەوانی دی کۆرسن”. گۆرانیبێژی ئەم سەردەمەی ئێمەش، بە هەق، شێرکۆ بێکەس بوو. لە سەردەمێکا شاعیرانی کورد قەسابخانەیان بۆ شیعری کوردی ناوەتەوە، شیعری کوردییان لەناو پایزو گەڵای وەریودا نوقم کردووە، شێرکۆ بوو هەیبەت و شکۆی بۆ شیعر گەڕاندەوەو شیعری گەیاندە هەموو ماڵێكی کورد. جوانترین شیعر بۆ کەرکوك و شەهیدانی کەرکوك (ئازاد هەورامی، مامە ڕیشە،…)، شێرکۆ نووسیویەتی.. جارێکیان مەریوان وریا قانیع وتی “خواستی شاعیری کورد زۆر بچووکەو لە سلێمانی و هەولێرو کەرکوك تێناپەڕێ”.. بێگومان وایە، ئەمەش هەموو شاعیرانی کورد ئەگرێتەوە، شێرکۆ بێکەس نەبێ. تەنیا شێرکۆ توانی سنووری ئەو دوو سێ شارە ببەزێنێ و، نەك هەر کوردستانی مەزن، بەڵکو توانی شیعری کوردی بگەیەنێتە هەموو رۆژهەڵاتی ناوەڕاست. تەنانەت عێراقی یەکانیش لە نێوەندی ئەدەبی کوردیدا تەنیا ناوی شێرکۆ ئەبەن.

جارێکیان، هەر ساڵی 1979، شاعیری بە رەگەز فەڵەستینی (خالد علي مصطفی) لە کەرکوك. لە هۆڵی بەڕێوەبەرایەتی راگەیاندنی ناوخۆ کۆڕێکی شیعریی کردەوە، فایق سەعید پرسیاری رای شاعیری کرد لەسەر شیعری کوردی. ئەویش لە وەڵامدا وتی “بە داخەوە شارەزاییم لەبارەی شیعری کوردی یەوە نی یە، تەنیا (شیرکو بیکەس) ئەناسم”. ئێستاش، پاش تێپەڕبوونی پتر لە 30 ساڵ، ئەو پرسیارە رووبەڕووی هەر ئەدیبێکی عەرەب یان عێراقی بکەی، یەکسەر ئەڵێ شیرکو بیکەس. شێرکۆ بێکەس بە هەق باڵوێزی شیعری کوردی بوو. بە کۆچ کردنی شێرکۆ شیعری کوردی ئیفلیج کەوت. باڵوێزێکی دیی شیعر بەو زووانە سەرهەڵناداتەوە. کێ ئەزانێ، رەنگە بۆ سەدەی داهاتوو. 

هەروەکو (ئاینشتاین) لەبارەی (گاندی)یەوە وتی: “نەوە پاش نەوە دێ بەڵام کەس باوەڕ ناکات پیاوێکی وەکو ئەو لە گۆشت و خوێن هەرگیز لەسەر ئەم زەوی یەدا رێی کردبێ “، ئێمەش هەمان شت لەبارەی شێرکۆوە ئەڵێین.  

 

 

بەریتانیا

 

Previous
Next
This site is registered on wpml.org as a development site.