گازندە … …. نەوزاد بەندى

 

 

 

 

-1-

چەند خێرا فامیلى مۆڵ و

ماجدى مۆڵتان هێنایە سلێمانى

لێرەیشەوە کۆمەڵێ مۆڵ ئەبەنەوە هەولێر..

بە ماوەیەکى پێوانەیى ،

خەونەکانى خۆتان دێننە دى ..

زۆر زوو..

بەشەو ڕۆژ شۆڤڵەکان ..

کرێکارەکان ..

ئەندازیارەکان ..

چەو و

لم و

چیمەنتۆ ..خەونەکانتان بۆ ئەکەن بە ڕاستى ..

بەڵام ئەو خەڵکە نەک خەونیان نایەتە دى ،

بەڵکو واقیعەکەیشیان ،

هێواش – هێواش ئەڕەوێتەوە و

ئێوە بە هەرزان لێیان ئەکڕن ..

ئایا قەت بیر ناکەنەوە لەوەى

ئەو ڕەعیەتە ، ئەمرن و

خەونێکیان نایەتە دى ؟

قەت بیر ناکەنەوە مناڵەکانى نیشتمان ،

ساڵەهاى ساڵ گۆرانى بۆ  خاڵخاڵۆکەى خەونێ ئەڵێن و

کەچى نانیشێتەوە لەسەر پەنجەیان .. ؟؟

قەت بیر ناکەنەوە ،

هەموو نیشتمان بووە بە ژێر پێى 

خەونە بەدیهاتووەکانى خۆتانەوە ..

خەونەکانتان تەنانەت چووەتە  ئاسمانەوە ..

خەونەکانتان خەریکە بانکەکان و

کۆمپانیاکان و

هەوارگەکانى ئەوروپایش داگیر ئەکا ..

( تۆزێکیش خەونى بەدیهاتو،

بەشى دایکى شەهیدان بدەن ..

بەشى بریندارەکانى شۆڕش بدەن ..

بەشى بێوەژنەکانى شۆڕش بدەن ..

بەشى مناڵە بەجێماوەکانى 

هەگبەکەى کیمیاوى و

ئەنفال بدەن .. )

تێ بى نى :

لە دنیادا من ڕقم لە دروشمە ،

چى بکەم ؟

ئەڵێم بەڵکو بەو وشانە ،

تۆزێک ڕاچڵەکن ..

پارچەیەک بەردى حەلان ..

لەتێ لایتى زینۆن ..

بخەنە سەر سفرەى ،

لاوێکى گەرمیان ..

کە نە باوکى بینیوە .. نە دایکى ..

مامى تاکو شەش ساڵى بەخێوى کردووە و

ئیتر داویەتیە دەست شەقام .. ..

ستونەکان بوون بە خوشک و براى ..

دینارە دڕاوە 

عارەقاوییەکان ،

بوون بە تەنها مۆم و چراى ..

 

-2-

ئازیزەکەم ..

هەتاکو تۆم دۆزییەوە ،

خۆمم ون کرد ..

 

-3-

دەوڵەمەند نابى بە قوربان ..

دەوڵەمەند نابى ..بەساقە ..

هەتا بە قازانج نەڵێى قانجاز ..

هەتا بە ئەنتەرناشناڵ نەڵێى عەنتەڕناش ..

بە ملیۆن بڵێ : ملوێن

ڕادیۆ : ڕادوێ ..

مسیۆبوشى : مستەرگوشى ..

هەتا لە پەنجەرەکەوە ،

بوتڵە بەتاڵەکە هەڵنەدەیتە سەر شەقام ..

هەتا هەموو جۆرەکانى جڕت نەزانى..

هەتا لە پەنا و پاسارەکانا بە پێوە میز نەکەى ..

هەتا کتێب لە ماڵەکەتا قاچاخ نەبێ..

هەتا کفر بە خوا و

پێغەمبەر و

شیعر و

هونەر و

نیشتمان نەکەى ..

دەوڵەمەند نابى ..بە قوربان ..

دەوڵەمەند نابى .. بەساقە ..

 

-4-

ئێمە هەروا بوین ..

لە ناوەڕاستى موناجاتا ،

پێنج دەقیقە سەماحمان کردووە بۆ ماچ ..

لە سێ یەکى ڕەقسى شەرقیدا ،

30 ڕۆژ مۆڵەتمان وەرگرتوە ،

بۆ ڕۆژووى ڕەمەزان ..

لە وەختى ئیزافى براکوژیدا ،

پێنج دەقیقەمان لە مایک خواستوە ،

بۆ ئەوەى کۆمەڵێ دروشمى قەڵەو ،

دەرخواردى میللەتێکى لاواز بدەین ..

ئێمە هەروابووین ..

لە حەرەمى دۆلاردا ،

مۆڵەتمان لە فرانکلین وەرگرتووە ،

بۆ ئەوەى شیعر و

هەڵوێست و

بنەماکانمان بسوتێنین ..

لە بەردەرگاى ڤیلاکاندا ،

یەک چرکە مۆڵەتمان لە خوا وەرگرتووە ،

بۆ ئەوەى پێش بەربانگ ،

ڕۆژووەکانمان بشکێنین ..

پێش جەماعەت ،

دەستنوێژەکانمان بشکێنین ..

ئێمە هەروا بوین ..

هەروایشین

هەروایش ئەبین ..