Skip to Content

Friday, May 27th, 2022

دەرەنجام … بایز مستەفا

Closed
by October 9, 2013 هۆنراوە

 

 

 

من دەمگووت :

    ” خۆشەویستی :

     موعجیزەی فڕینیی ڕۆحە ،

    بە جەستەی ئاسمانەکانی لەزەتدا ! ” 

تۆ دەتگووت :

    “خۆشەویستی :

    گرمۆڵە بوونی جەستەیە ،

    لە ناو ڕەحمی فڕیندا ! “

    **    **    **

من دەمگووت :

    ” ژوان :

    ئاودانی درەختی بەردەوامییە ،

    بە پەنجەی شەونمەکانی ماچ ! “

تۆ دەتگووت :

    ” ژوان :

    ڕا گۆڕینەوەیە ،

    بۆ نوسینەوەی دەستورێک بۆ ژیان ! “

    **    **    **

من دەمگووت :

    ” گوڵ :

    لاسایی کردنەوەیەکی  ناتەواوی  سروشتە ،

    بۆ لێوەکانی تۆ ! “

تۆ دەتگووت :

   ” گوڵ :

    پێشنیاری باغەکانە ،

    بۆ دیاری نێوان عاشقان! “

    **    **    **

من دەمگووت :

    ” گریان :

    ( نا ، ببورە..ئەوکات گریانمان نەدەناسی ) “

    **    **    **

لە بیرتە ئەوکات ،

لە ساڵە بێ وەرزەکاندا !

لە شەو و ڕۆژە بێ کاتژمێرەکاندا

پێناسی هەموو ووشەکانمان دەگۆڕی ؟!

    **    **    **

ئاخ ..

ئێستا دەزانم ،

عاشقەکان 

جیهانێکی تریان هەیە ،

زمانێکی تریان هەیە 

 

 

    ( بایز مستەفا )

 

 

Previous
Next