Skip to Content

Sunday, June 16th, 2024
تاوێک پێش مردن  … نەوزاد بەندى

تاوێک پێش مردن … نەوزاد بەندى

Closed

 

 

 

 

-1-

لە شوراکانى ژیان نزیک کەوتومەتەوە ..

مەرزى مردن ئەبینم ..

نازانم لە کێ بپرسم ،

لە کوێ کەل و پەلەکانم دابگرم ؟

بە پێ ..

یان بە سواریى ،

ئەو هەڵەتە ببڕم ؟؟

 

-2-

لە پشت پەنجەرەوە ،

گوێم لە هەناسەى مەرگە ..

دەستى خستۆتە گیرفانەکانى و

تى شێرتێکى پەمەیى لەبەردایە ..

زەردەخەنەیەک لەسەر لێوێتى ..

وەک ئەوەى دەمامک بێ ، وایە ..

بە دەرگاکاندا ئەڕوا ..

سەیرى ژمارەکانى ئەکا ..

بزانێ سەرەى کام دەرگایە ..

 

-3-

ئەمشەو تا بەیانى نانوم ..

بزانم بۆچى ڕۆژگار ئەمانخەوێنێ ..

بزانم ئاسمان چى بە زەوى ئەڵێ ..

ئەى زەوى

هیچ لەبارەى ئێمەوە ئەدرکێنێ ؟

بە پێى پەتى ئەڕۆمە حەوشە ..

کزەبایەک سڵاوێک ئەکا و

ئەڕوا بۆ ئەو سەرى دونیا ..

نازانم دونیا بەسەر ئێمەوەیە ،

یان ئێمە خەریکە ئەپچڕێین لە بنیا ؟؟

 

-4-

دەست ئەکەم بە گیرفانما ،

هیچ شتێکم پێ نیە بە کەڵکى دیاریى بێ ..

کلیلەکە لەسەر دیوارەکە بەجێ دێڵم ..

نامەیەک بە مۆبایلەکەم ئەنوسم ..

ئەینێرم بۆ هەمو ناوەکان ..

تەنانەت بۆ نانەواخانە و

مریشکفرۆش و

فیتەرەکانى مەعمیلم ..

(کوڕەکەم چمکى کراسەکەم ڕائەکێشێ ..

ئەڵێ :

بابە ! بۆ ڕەنگت زەرد بووە ؟

خۆ تۆ بەشداریى بانگەشەى هەڵبژاردنت نەکرد ! )

 

-5-

سەر لە ئێوارە ..

گوێم لە دەنگى پۆلێ مراوى کێویى بوو ..

کۆچیان ئەکرد بۆ باشوور ..

( خۆزگەم بەخۆتان ..هەزار جار ..

خۆزگەم بەخۆتان ..

هەم زەمین نیشتمانتانە و

هەم هەموو ئاسمان ..

ڕازى نین زستان میزاجتان تێکدا و ..

هەموو شتێ بەجێ دێڵن :

لە ترسى مردن ..

لە پێناوى ژیانێکى جوانتر ..

خۆزگەم بە خۆتان !

Previous
Next
This site is registered on wpml.org as a development site.