Skip to Content

Monday, April 15th, 2024
دەسەڵاتى کوردى چیمان پێ دەلێت ؟!

دەسەڵاتى کوردى چیمان پێ دەلێت ؟!

Closed
by November 25, 2013 گشتی

 

 

 

 

 

 

ئێمە لەمێژە درکمان بەوە کردووە کە دەمێکە و بەتایبەت لەدوواى پرۆسەى ئازادى عێراقەوە ، نەغمەیەکى ناسیۆنالیستى ڕووکەش و ساختە خەریکە بە قوڵى دونیاى ئێمە وێران و خاپور دەکات ، نەغمەیەک بەدەستێکى هەست و سۆزى عەوام بۆ خۆى پەلکێش و بەدەستەکەى تریشى زام و برینەکان قوڵترو قوڵتر دەکاتەوە و کێشەو ململانێى قورستر ڕووبەڕووى کۆمەڵگا دەکاتەوە و دەیخزێنێتە نێو پەیوەندییەکانى ئینسانى کوردەوە ، بێگومان کەرکوک وەکو شار ، وەک پێگەى جیۆپۆلۆتیکى ، وەکو پێگەى کۆمەڵایەتى و روحە فرەیى و پلورالییەکەى ، جیاوازتر لە شاران و شوێنانى ترى کوردستان ئەم وتار و نەغمە ناسیۆنالیستەى تێدا تەوزیف کراوە و خەسترو قەترانیتر ئەم ئاوازەى تێدا ساختە کراوە ، بەمانایەکى تر چیتر کەرکوک لەوە دەکەوێت کەیس و بابەتێکى نیشتمانى و نەتەوەیى باڵاو پیرۆز بێت ، بەپێچەوانەوە  بەڵکو لەوە نزیک دەکرێتەوە ببێتە بەرداش بۆ ململانێ پرۆکێنەرەکانى دونیاى سیاسەت و سیاسەتکاران . 

ئێمەى نوسەران ، ڕوناکبیران ، هونەرمەندان ، شانۆکاران و رۆژنامەنووسان ، چەندین جار ویستومانە نامەو بەیاننامەى دەستەجەمعى بنووسین ، بەڵام ترسى گەورەمان لەوە بووە بێ بنەما تومەتى تەخریب و تەخوین بخرێتە پاڵ وەزیفەى مەعریفیمان و بەئاراستەیەکى تر لێکبدرێتەوە ، دیارە ئەمەش هەڵەیەکى ترى کوشندەى سیاسەتە لەژیانى کلتوورى و مەعریفى ئێمەدا ، کە بەردەوام خۆى دووبارە دەکاتەوە ، بەڵام ئەمجارە دەمانەوێت ڕوونکردنەوەیەکى گرنگ ، ڕوون و ئاشکرا سەبارەت بە ئەداو روئیاى خراپى دەسەڵاتى کوردى بخەینە سەر مێزەکانیان لەمەڕ مامەڵە کردن لەگەڵ ئەم شارەداو بەتایبەت نەوەیەکى ڕوناکبیر کە لەم شارەدان و ئێستاشى لەگەڵدا بێت باجى گەورەیان بەخوێن و ئێسک و فرمێسک داوەو دەیدەن ، بۆیە چیتر ئامادە نین خۆیان ژێر پێى یارییەکانى دەسەڵات و بەڵێن و پەیمانە وەهمییەکانى بکەن ، بەڵێن و پەیمانگەلێک خوودى خاوەنەکەى بڕواى پێ نییەو دەیەوێت باوەڕ بە کۆى کۆمەڵگە بهێنێت .

ئێمە  تەواو هەست بەوە دەکەین کە دەسەڵاتى کوردى دەیەوێت لەرەمزە جوانەکانى کەرکوک و گەرمیان بدات ، کە نوسەرو روناکبیر هونەرمەندەکانییەتى ، واتا پێش ئەوەى کەرکوک بکات بەزۆنێکى وێران و خاپور ، دێت و لە سیمبولە  دیارەکانى ئەم شارە دەدات بەوەى تائیستا  بچوکترین رێزى لەم نوخبەیە نەگرتووە ، لەم سۆنگەیەوە ئێمە پێمان وایە دەسەڵاتێک ڕێزى رۆشنبیرو قەڵەم بەدەستەکانى نەگرێت ، بێگومان ڕێزى خەڵکەکەیشى ناگرێت ، گوێ بۆ رۆشنبیرەکانى نەگرێت ، گوێ بۆ ئینسانەکانى تریشى ناگرێت ، دەسەڵاتێک حورمەت بۆ نوسەرو و ڕوناکبیرەکانى دانەنێت ، ڕێز بۆ ئینسانەکانى ترى کۆمەڵگاش دانانێت . 

دیارە چەند رۆژێک پێش ئێستا وەزارەتى رۆشنبیرى ، ناوى ئەو کەسانەى بڵاو کردەوە کە کۆمەک دەکرێن بۆئەوەى بتوانن هەر هیچ نەبێ کەمێک ژیان و گوزەرانیان باشتر بکەن و کتێب و پرۆژە هونەرییەکانیان شەرەفمەندانە بخەنە بەر دەست خوێنەرو بینەر ، بەڵام زۆر بەداخەوە ، ساڵى پار لە کۆى (790) کەس تەنها ( 20 ) کەسى خەڵکى (( دڵ و قودسى کوردستان )) ى تیادا بوو ، ئەمساڵیش زۆر ناعادیلانەترو تراژیدى تر لە کۆى (( 694 )) کەس تەنیا ( 5 ) کەسى تێدایە خەڵکى  (( دڵ و قودس )) بن ، وەک ئەوەى بڵێى ئەم شارە نە ڕوناکبیرو نە هونەرمەندى تێدا نەبێ ، بێگومان ئێمە هەر ساڵى پار دەلالەتە قوڵ و ریشەییەکانى ئەم سوکایەتى پێکردنەمان هەست پێکرد ، کە دەلالەتى سیاسى و حیزبین لەسەر حیسابى کەرکوک و کەرکوکییەکان ، وەزارەتى ڕۆشنبیرى کە بانگەشەى ( ڕێزگرتن لە قەڵەم و مەعریفەت ) دەکات و ، واى پیشان ئەدات رێزى نووسین و داهێنان دەگرێت ، بەڵام ئەمە نە جارى یەکەمەو نە جارى دووەم کەرکوک و گەرمیانییەکان سوکایەتییان پێ دەکرێت و رێزو و حورمەت لە ماندوو بوونیان ناگیرێت ، وەزارەتێک کە مەعریفەو هزروو هونەر و ئەدەب ناناسێت و بێ هیچ پێوەرێکى مەعریفى لیژنەى هەڵسەنگاندن دروست دەکات و دوواجار رێزى لیژنەکەش ناگرێت و هەڵیدەوەشێنێتەوە و بەئارەزووى خۆى پارەو پولى وڵات بەسەر خەڵکى شیاو و نەشیاودا تەخشان و پەخشان دەکات ، ئایا ئەم وەزارەتە بە  چ شێوەیەک و بەکامە پێوەر بە خۆى دەڵێت ( وەزارەتى رۆشنبیرى ) ؟!

بۆیە ئەوەى بۆمان گرنگە بە هەمووانى بڵێین لەم چەند خاڵەدا چڕى دەکەینەوە :

خاڵى یەکەم : دەبێت هەرچى زووە وەزارەتى رۆشنبیرى سەبارەت بەم کارەى کردوویەتى ڕونکردنەوەمان بداتێ بەوەى بە چ پێوەرێک ئەم پارەیەی دابەش کردووە بە بێ رەچاو کردنى پرۆژەکان هەر کەسێک و بڕى چوار ملیۆن دینارى دراوەتێ ، لەمەشدا تەنها سیستمێک پشتى پێ بەستبێت بریتییە لە سیستمى گروپى ..!!

خاڵى دووەم : دەبێت وەزارەتى ڕۆشنبیرى ڕونکردنەوەى خێرامان بداتێ بۆچى ئەم وەزارەتە بەردەوام و بەئەنقەست مەبەستێتى سوکایەتى بەکەرکوک و رەمزەکانى بکات ؟ ئایا ئەمەى دەکرێت کاکى وەزیر دەیکات ، یان لە سەرۆکایەتى حکومەتى هەرێمەوە ئەم بێرێزییە رەوانەى ئەم شارەو رەمزەکانى دەکرێت ، ئەمانەوێت تێبگەین لەوەى کە ناتانەوێت خزمەت بە کەرکوک و گەرمیان و روناکبیرەکانى بکەن بۆچى سوکایەتییان پێ دەکەن ؟! 

خاڵى سێیەم : داواکارین هەرچى زووە لە کۆى ئەو کەرکوکییانەى فۆرمى ئەم ساڵیان بۆ سندووقى کۆمەکى کلتوورى پڕ کردۆتەوە لانى کەم سەد کەسیان کۆمەک بکرین بە پلەى A) ) _ وەکو خۆیان ناویان لێناوە .

خاڵى چوارەم : لەکاتێکدا ئەگەر وەزارەت بەپیرى خاڵى سێیەمەوە نەهات ، ئەوا ئەو کاتە ئەو ئەرکە کلتورى و مەعریفییە دەخەینە ئەستۆى پارێزگارى کەرکوکەوە پێى هەستێت ، چونکە بەهاوشان ئەو پرۆژانەى لە بوارە جیاجیاکاندا لەم شارەدا ئەنجام دراون ، پێویستە ئەم پرۆژەیەش وەک پرۆژەیەکى گەشەى مرۆیى تەماشا بکرێت ، کە دەچێتە خانەى ئاوەدانکردنەوەى شاروو بووژانەوەى گیانى بەرپرسیارێتى و ئاستى روحى تێکراى پێکهاتەکانى ئەم شارەوە . 

خاڵى پێنجەم : بێگومان ئەگەر وەزارەتى رۆشنبیرى بەزوویى وەڵامى خاڵى سێیەم نەداتەوە و ئەو داواکارییە جەوهەرییە جێبەجێ نەکات ، ئەوا ئێمە هەڵویستى تووندى دەستەجەمعى خۆمان رادەگەیەنین و خۆمان و قەڵەمەکانمان لە هەموو بڕیارو ئامادەگییەکى ئەو وەزارەتە بێ بەرى دەکەین . 

خاڵى شەشەم : چاوەرێى کردەوەى وەزارەتى رۆشنبیرین ، کردار نەک قسەى دووبارە کە بەو پەڕى سوکایەتى دەزانین . 

ئیمزا / کۆمەڵێک نوسەروو روناکبیرى شارى کەرکوک و گەرمیان .  

1- بورهان ئەحمەد..شاعیر و وەرگێڕ

2- هیمداد شاهین..نووسەر و لێکۆڵەر

3- سەباح ئیسماعیل .. نووسەر و وەرگێڕ

4- حەمە سەعید زەنگەنە.. چیرۆکنووس

5- دانا عەسکەر .. نووسەر و شاعیر

6- لەتیف فاتیح فەرەج .. نووسەر و ڕۆژنامەنووس

7- شاڵاو محەمەد.. ڕۆژنامەنووس

8- مەهدی زریان .. شاعیر و ڕۆژنامەنووس

9- موعتەسەم ساڵەیی..نووسەر و ڕۆماننووس

10- موعتەسەم ساڵەیی.. نووسەر و ڕۆژنامەنووس

11- عەبدوڵا سڵێمان(مەشخەڵ) ..شاعیر و وەرگێڕ (کەنەدا)

12- مەحموود نەجمەدین..نووسەر و چیرۆکنووس

13- سامان محەمەد..نووسەر و مامۆستای زانکۆ

14- هەردەوێڵ کاکەیی .. نووسەری کەلەپووری

15- عەبدوڵا زەنگەنە..نووسەر و وەرگێڕ

16- عەبدولڕەحیم سەرەڕۆ.. نووسەر و وەرگێڕ

17- ئەحمەد عارف..شاعیر و چیرۆکنووس

18- دابان کامیل..هونەرمەند موزیکژەن

19- حەسەن جومعە..شاعیر

20- عەباس جەمیل جێماو..شاعیر و هونەرمەند

21- محەمەد حەداد..شانۆکار

22- نوێنەر فاتیح .. ڕۆژنامەنووس

23- عەبدولستار جەباری..ڕۆژنامەنووس و وەرگێڕ

24- ڕۆزار ئەحمەد..شاعیر

25- ڕامان حوسێن..هونەرمەند پەیکەرتاش (فیلەندا)

26- سالار ئیسماعیل سەمین..چیرۆکنووس و ڕۆماننووس

27- بورهان سلێمان..ڕۆژنامەنووس

28- ئاسۆ چرپە..شاعیر

29- شوکور ساڵەیی..بەڕێوەبەری پەیمانگای هونەرە جوانەکان

30- بورهان بەرزنجی..شاعیر

31- ڕێبوار تەیب..شاعیر

32- خالید باشبڵاخی..شاعیر

33- هێمن حەسیب ..ڕۆژنامەنووس

34- عەباس مەجید داودی..شاعیر و نووسەر

35- شاسوار محەمەد..هونەرمەند موزیکژەن

36- شوان سەدایی..شاعیر

37- سەڵاح قابیل..شاعیر

38- سۆران کامەران..ڕۆژنامەنووس

39- تەها تەیفور..نووسەر

40- هێمن دەلٶ..ڕۆژنامەنووس

41- ئەحمەد هەستیار..شاعیر

42- شەریف محەمەد عەلی..نووسەر

43- عوبێد ئەحمەد..نووسەر

44- عەلی عومەر..نووسەر و وەرگێڕ

45- ئیبراهیم مەجید تاڵەبانی .. شاعیر و نووسەر

46- هاشم عاسی کاکەیی.. نووسەر و ڕۆژنامەنووس

47- نزار محەمەد سابیر..نووسەر

48- هۆشیار بەکر عەزیز..فەرمانبەر

49- سێبەر ئەحمەد..شاعیر

50- ئەمیر فەخرەدین..مامۆستای زانکۆ

51- جەلیل محەمەد شەریف..نووسەر

52- شاخەوان کەرکوکی..نووسەر

53- خالید عەبدل..نووسەر

54- عەبدولوەهاب ئیسماعیل..ڕۆژنامەنووس

55- هیوا حوسێن ئەمین..نووسەر و ڕۆژنامەنووس

56- ڕزگار شوانی ..نووسەر و رۆژنامەنووس

57- ئەسعەد جەباری..نووسەر و ڕۆژنامەنووس

58- حەسەن عەلی حەوتەغاری..نووسەر

59- ئومێد عەندولڕەحمان جاف..ڕۆژنامەنووس

60- ئەنجام سەعید خالید..ڕۆژنامەنووس

61- دلێر ڕەفیق عارف..ڕۆژنامەنووس

 

 

Previous
Next
This site is registered on wpml.org as a development site.