Skip to Content

Thursday, March 28th, 2024
شه‌هرامی نازری  …. له‌تیف فاتیح فه‌ره‌ج

شه‌هرامی نازری …. له‌تیف فاتیح فه‌ره‌ج

Closed
by December 1, 2013 ئەدەب

 

 

ده‌نگێك له‌ناخی ناخه‌وه‌ دێته‌ ده‌رێ‌، ده‌نگێك مرۆڤ ناچاری ئه‌وه‌ ده‌كات له‌ به‌رده‌میدا هه‌ڵوه‌سته‌ بكات ، ناچاری ئه‌وه‌مان ده‌كات له‌به‌رده‌میدا تاس بمانباته‌وه‌و له‌گه‌ڵ روحماندا ئاوێزان بێت ، ئه‌وه‌ ده‌نگی هونه‌رمه‌ندێكه‌ كه‌ ئێستا له‌ شه‌ش ده‌یه‌و نیو نزیك ده‌بێته‌وه‌و  هێشتا زرینگه‌ی دێت، ئه‌و ده‌نگه‌ سروشتیه‌ ده‌نگی شارامی نازریه‌ ، ئه‌و هونه‌رمه‌نده‌ی تایبه‌تمه‌ندی خۆی هه‌یه‌و هونه‌رمان له‌ ئاستێكی به‌رزو باڵادا نیشان ئه‌دات ، هونه‌رێك كه‌ ناتوانێ‌ لۆكاڵی بێت و سنوره‌كان له‌به‌رده‌میا هه‌ره‌س دێنن و ئه‌توێنه‌وه‌، نازری زیاتر له‌ 35 ساڵه‌ به‌ ده‌نگه‌ سۆفیگه‌ریه‌ زه‌رده‌شتیه‌كه‌ی مه‌ستمان ده‌كات و جار له‌ دوای جار به‌رهه‌مێكی ناوازه‌ ترمان ئه‌داتێ‌ ، شه‌هرامی نازری له‌و ده‌نگانه‌یه‌ كه‌ مرۆڤ تێری لێ‌ ناخوات ، ئه‌و هه‌ركه‌سێك كه‌مۆكه‌یه‌ك دركی هونه‌ری هه‌بێت و له‌ موزیك تێبگات ناچاری ئه‌وه‌ی ده‌كات هه‌موو جارێك بگه‌ڕێته‌وه‌ سه‌ری، جا بۆ ئه‌وانه‌ی ئاستی تێگه‌یشتنیان هه‌ڵكشاو تره‌ زۆر زیاتر په‌یوه‌ست ده‌بن پێوه‌ی.

شه‌رامی نازری هه‌ربه‌ته‌نێ‌ هونه‌رمه‌ندێك نیه‌و به‌س ئه‌و سیمفۆنیایه‌كی قوڵه‌ ، ده‌زانێ‌ چۆن ده‌ڵێت و چی ، فێرمان ده‌كات چۆن به‌ دیار موزیكه‌وه‌ بوه‌ستین ، پێمان ده‌ڵێت له‌ ئامێری ساده‌وه‌ ئاوازی جاویدانی ده‌رده‌چێت، له‌وشه‌ی ساده‌ مانای نه‌مری و به‌رده‌وامی دروستده‌كرێت، ئه‌مه‌ش جیاوازیه‌كی گه‌وره‌یه‌، جیاوازی ئه‌وه‌ی مه‌رج نیه‌ ده‌یان ئامێر ریز بكرێت و ده‌قی زۆر قورس به‌كار بهێنرێ‌ ، ئه‌مه‌ ئه‌گه‌ر چی ئه‌و ده‌قانه‌ی كه‌ شه‌هرامی نازری له‌ ئه‌لبومه‌كانی خۆیدا به‌كاری هێناوه‌و تا ئێستا من نه‌متوانیوه‌ گوێم له‌ هه‌موویان بێت ده‌قگه‌لێكن سه‌ره‌ڕای ساده‌ی قوڵ و مانا به‌خشن ، ده‌كرێ‌ بڵێین هه‌رده‌قێك حه‌كایه‌ت و چیرۆكێكه‌و سه‌رله‌به‌ریان داستان ئامێزن، له‌ نێو كوردا كه‌م هونه‌رمه‌ند هه‌ڵكه‌وتون، كار به‌و جۆرو شێوازه‌ له‌سه‌ر داستان بكه‌ن ، یان راستر ئه‌وه‌یه‌ بڵێین چیرۆكی زۆر باو هه‌ڵبژێرن و به‌رگی داستان بكه‌ن به‌به‌ریدا، جیاوازیه‌كه‌ی شارام له‌وانی تر ئه‌مه‌یه‌ ئه‌و داستان بۆ مرۆژ دروست ده‌كات و نه‌خشه‌كانی ئه‌و داستانه‌و هێڵه‌كانی به‌ ئاواز و ده‌نگ ده‌كێشێ‌ ، ئه‌و كارێك ده‌كات كه‌ مرۆڤ ناچاربن په‌ره‌ به‌ ئاستی هۆشیاری خۆیان بده‌ن له‌ بواری هونه‌رو موزیكدا .

ده‌نگ و ئاوازی شارام ده‌نگ و ئاوازێكی لۆكاڵی نین ، ئه‌مه‌ش وای كردوه‌ كه‌ ئه‌و وه‌ك هونه‌رمه‌ندێك له‌ ده‌ره‌وه‌ی ماڵه‌كه‌شدا وێنه‌یه‌كی تر بێت ، وێنه‌یه‌كی جیاواز  بۆیه‌ له‌ شارێكی وه‌ك ئه‌سفه‌هان له‌كه‌م شوێن سێدیه‌كانی ئه‌ویش به‌ته‌نیشت سێدی گه‌وره‌ هونه‌رمه‌ندانه‌وه‌ دانه‌نرابێت و خوازیاری نه‌بێت.

من كه‌ گوێ‌ له‌ شارام ده‌گرم ، گوێ‌ له‌ زكرێكی قوڵی مرۆڤه‌ توڕدراوه‌كانی خودا ده‌گرم كه‌ هه‌ڵدراونه‌ته‌ سه‌ر زه‌وی و خه‌ون به‌ گه‌ڕانه‌وه‌وه‌ ده‌بینن بۆ زێدی هه‌قیقی خۆیان.

ئه‌و ده‌مباته‌ دنیایه‌كی دیكه‌وه‌ له‌گه‌ڵ ئه‌و دا به‌ته‌نیشت داستانه‌كاندا ده‌ڕۆم و لای فه‌رهادو مه‌م و مه‌جنون هه‌ڵوه‌سته‌ ده‌كه‌م و گوێ‌ له‌ خوڕه‌ی چه‌م و وژه‌ی باو هاژه‌ی سروشت ده‌گرم ، له‌گه‌ڵ ده‌نگی شارامدا ده‌بمه‌وه‌ سروشتی و بیرم ده‌چێت كه‌ من مه‌حكومی ئه‌به‌دی زه‌ویم.

Previous
Next
This site is registered on wpml.org as a development site.