فانتازیای ژمارەكان

 فانتازیای ژمارەكان
 
 عومەر جەلال
 
 1
 یەك خودا و یەك عەشق و یەك ژیان 
 بەهەردوو دەستمەوە
 هەرچەندە كۆیان دەكەمەوە
 سەرەنجام هەر یەك دەكات
 
 2
 من لە گۆڕستانێك  لەدایك بووم
 دایكم ناوى مردووەكانى دەنووسی
 باوكیشم كێلى بۆ گۆڕەكان درووست دەكرد
 
 3
 هەمیشە خەون بە منداڵییەوە دەبینم
 وەك منداڵ دەگریم و
 وەك منداڵ گەورە دەبم
 وەك منداڵ ژن دەهێنم
 وەك منداڵ دەبمە باوك
 
 
 
 4
 تەماشاى هیچ ناكەم كە دەیخۆم
 جگە لە تۆ و ئاو
 قوم قوم رادەمێنم و دەیخۆمەوە
 
 5
 گیرفانى دڕاوى هاورێكەم
 هێما بوو بۆ مەرگى دووەمى
 لە چاوەڕوانى دەستێكدا
 
 6
 هێند لە دواین وێنەت راماوم
 كاتێك ئەلبومەكەم  دادەخەم
 پاش چەند رۆژێك چاوەكانم
 شوێنى خۆیان دەدۆزنەوە
 
 7
 لەگەڕەكە كۆنەكەى ئێمە
 شێتێك هەیە ,
 بەزستانان خۆى رووت دەكاتەوە
 هاوینانیش  لەناو ئاگردا دەنوێت
 
 8
 شیعر و كوفر
 دوانەیەكن
 بۆیان نییە جیاببنەوە
 
 9
 باخچەكەمان
 دارى شیعرێكى تێدایە
 هەرگیز نامرێت
 omerjelal@yahoo.com