پێنج شیعرى كورت …شیعرى: محەمەد كوردۆ

 1-نیشتمان
 
 ئێمە دوو مرۆى پڕ سووتانین
 خەڵك سەرقاڵى كۆكردنەوەى ماڵ و
 ئێمە هەڵوەداى راوكردنى
 چەن چركەساتێكى جوانین
 خەڵك شپرزەى ئیشى بەیانیان و
 ئێمە وێڵى
 پیاسەى
 ئێوارانین!
 دەڵێن: ماڵ نیشتمانێكى بچكۆلانەیە
   ئێمە ماڵێكمان نییە پێكەوە كۆمان بكاتەوە
 ئاى من ئێستا ئەزانم
 ئێمەى خەڵكانى رۆژهەڵات چەن بێنیشتمانین!!
 
 2-نازانم چاوەڕوانى کێ دەكەم؟!
 ژیان  وێستگەیەكى دڵتەنگە 
 هەموو دەمەو ئێوارانێ 
 من چاوەڕێ دەكەم
 دەڵێم دێت و
 داواى دەستە میهرەبانەكانى لێدەكەم
 دەیانخەمە سەر دڵم
 تامناڵ دەبمەوە
 ئینجا وڕكى لێدەگرم و
 گێچەڵى پێدەكەم
 لەناو قژ و
 لەبەینى مەمكە بۆنخۆشەكانیا
 تێر چاوشاركێ دەكەم
 ئاى بەڵام هەمووجارىَ
 شەو دادێت و
 كەس دیارنیە و
 منیش نازانم چاوەڕوانى کێ دەكەم؟!

              3-وێنەكانى ناوچاوم
 لە ئێوارەیەكى خەمگینا
 ژنێك
 لەشێوەى فریشتەیەكى نازەنینا
 پرچى بەسەر شانیا شاباش كرد
 بەدڵێكى لێوانلێو لەسۆز و میهرەوە
 دەستى خستە ناو دەستم و
 پەنجەكانمى پڕ لەئێوارە باشكرد
 بەبۆنى گۆى مەمكەكانى
 دڵمى وەك لیمۆى حەپەساو قاش قاشكرد
 بەرلەوەى بڵێم ماڵئاوا
 سەرنجێكى ئەفسووناوى تێگرتم
 هەرچى وێنەى ژنى جوان لەناو چاومابوو
 هەمووى وردوخاش كرد!!
 
 
 
 4-ژیربوونەوە
 نیشتمانەكەم گریا
 بەحیكایەتێكى ئەفسانەیى و
 بەچەن بەڵێنێكى درۆ ژیر بۆوە
 كتێبخانەكەم گریا
 بەدیوانێكى ئەدۆنیس و
 بەرۆمانێكى ڤیكتۆر هۆگۆ ژیربۆوە
 مناڵەكەم گریا
 بەفیلمێكى ڤاندام و
 بەوێنەیەكى رۆناڵدۆ ژیربۆوە
 دڵم گریا
 هەرگریا و هەرگریا
 هەرچیم بۆ هێنا بێسوود بوو
 سەرەنجام
 لاى دڵە میهرەبانەكەى تۆ ژیربۆوە!
 
 
 
               5-دار
 لەناو هەموو دارەكانى ئەم وڵاتەدا
 دارێكى نەشمیل چاو دەدەم
 دەیكەم بەتۆو
 لەبرى مەمكە نازەنینەكانت
 بەگەڵا نازدارەكانى ئەو
 دڵ و گیان و
 بوونم زاخاو دەدەم
 هەركاتێكیش
 هەستم كرد دووریت زۆرى بۆ هێناوم
 وەك كەسێك سرووتێكى ئایینى جێبەجێ بكات
 تێر تێر دارەكە ئاو دەدەم !